2020年對囉嗦大叔嚟講，本來有好多大長征計劃，不過一個突如其來（或者係早有預謀）嘅武肺，令至全世界停擺。出國旅遊冇希望了、大型跑步比賽冇機會了；大家心情繼續變差，尤其每一日發生無稽新聞，負能量與日俱增，如果搵唔到出氣渠道，恐怕壓力爆煲做出傻事。所以無論環境有多敗壞、天空有多黑暗、良知有多扭曲、公義有多缺失，最最最緊要係自己永遠保持正向能量，頭腦冷靜、身心愉快，記著囉嗦金句「生活飲食要檢點、講過就要做得到」。所以，雖然原定八月參與嘅格魯吉亞極地賽順延一年，大叔仍然想喺今年嘗試一下呢種多日超馬賽事嘅滋味，咁不如自製一個超級簡易版多日超馬賽啦！

日期：23-29/11/2020

時間：隨心隨意

路線：

一日運筆環小魚（～60K）

四日運筆環新界（～180K）

兩日UTML環大魚（～100K)

結果呢？

23-26/11/2020

呢四日大叔走咗去環新界，第一日原本喺去大嶼山，不過實在起唔到身，所以就即時調整計劃，改變行程，首先挑戰新界國度。第一日首先游走熟悉嘅路線，從家門出發一路向北，終點設定响50公里左右嘅北區大水管。第二日又係從家門出發，但今次改為一路向東然段向南，唔經唔覺就到達50公里外嘅大埔公路馬騮山。嚟到第三日，身心靈仍然感覺良好，一大清早便搭車到上水再從回大水管，然後一路向西，探索不曾走過嘅邊境地段，果然被深深吸引著，尤其野生動物、過境候鳥更加引人入勝，值得一再重臨，最後更加超額完成，抵達終點三聖邨。

所以餘下一日，只需要走少過30公里，便可以實踐環新界壯舉；雖然不能做到第一個參賽者完成，但呢個個人紀錄將會永遠屬於自己記憶之中。最後成績，頭頭尾尾連埋行錯冤枉路，環新界總共走了195公里，好變態啊，自己都唔能夠想像做得到。下年癲傻252，施sir我都係唔玩喇。

27/11/2020

繼續環小魚，因為之前四日嘅運動量，大叔亦不敢太過進取，只係用膠遊mode來欣賞大嶼山美景；不過路線實在太長，而且有好多大幅度上落斜，以至行程嚟到深夜都未能完成。更不幸嘅係，嚟到貝澳天后廟之後，竟然行咗上UTML條路，入咗芝麻灣郊遊徑，所以時間用多咗，路程亦遠咗，一條友被困山旮旯又心慌慌，都咪話唔驚。唯有到咗分岔路，飲啖水、食補充，再睇吓地圖，搵條捷徑殺出重圍，兜兜轉轉，終於重回正確軌道，但身心靈已經受挫，好唔容易嚟到零晨先返到終點東涌（亦即起步點），在沒有心理準備之下多行12公里。

明日大嶼與約定山友同行嘅100K點算好呢？痛定思痛，其實當我行分流至石壁引水道嘅時候，都想過呢個問題，但係我說服唔到自己有個好好嘅理由，第二日又要响度用相反方向走多一次，況且充足休息真係非常重要，加上四日嘅環新界，五日嘅總里數都會超過250公里，都可算係完成咗一個多日賽嘅里數。所以大叔覺得見好就收，沒有大傷痛狀態比以前好；來日方長，今次呢個Big Project就此完結，跟著就係準備詳細報告，一連五日記載每次長征點滴，讓大家一起從新或再次認識我哋好L鍾意嘅香港，可能會激發起每位跑友嘅潛能同夢想。

至於UTML環大魚，我遲早一定會KO到嘅；而「明日大嶼」，我就祝果班共匪、膠官、擦鞋派，早日冚家富貴！

如果要總結今次大叔嘅成績或者體驗/得著的話：

1. 每個人都應該在不同時間訂定人生目標，逐一去實踐；當回望過去，才會覺得生命有意義。

2. 當人生擁有目標，生活便變得更有價值、生命會活得更加精彩。

3. 適當的挑戰是必須的，太容易達標沒有成就感，太難又會變作挫敗感，成為壓力。

4. 人生沒有絕對的輸贏，今次你的失敗，並不表示沒有勝利的機會（但並不適用於賭博）。假如真的希望重新再嘗試，首先檢討、糾正錯誤、改變鍛煉計劃/準備功夫，再接再厲。

5. 以身作則、有問必答，將寶貴經驗無私分享；授受相向，一方面教導新人智識、另一方面又從新人中學習，反覆質詢自己、改良自我；大家互相扶持、提供正能量。大叔堅相信，一傳十、十傳百，正義榮光必重臨香江。

P.S. 其實經過呢五日不停嘅跑、行、走、躝、趌，總共消耗咗22465卡路里，而食入肚嘅好西肯定冇呢個份量，還有流失大量水份，在入不敷支嘅情況之下，大叔體重驟降3kg，所以又係進補嘅好時機，食飽飽之後，再出去鳩衝。