#沙田友學馬鞍山史

#香港人講香港歷史

作為廿幾三十年嘅沙田友，喺過去嘅星期日(2019年6月23日)參加咗一個好有意思嘅跑山活動 - 鞍山探索館x運動筆記礦工跑，認識馬鞍山礦場同馬鞍山村生活圈嘅歷史。原來係一段好特別嘅香港歷史，以下係盡量記錄同大家分享，希望冇記錯同記漏:

話說喺二十年代嘅馬鞍山就有人用露天人手開採鎢呢種礦物，開始咗呢一段礦工歷史。及後喺日治時期，日本人開始喺馬鞍山礦場僱用礦工開採赤鐵礦，運去日本用以煉鋼製造兵器。開採咗嘅礦產就會喺山腳嘅碼頭，即係而家馬鞍山耀安同恆安嗰個迴旋處嘅位置，運上貨船，戰時就運去日本九州福岡小倉嘅八幡煉鋼廠供應日本內需。

二戰之後，有台山人喺香港成立咗大公洋行，繼續引入日本八幡製鐵所嘅現代化採礦技術，將礦產不斷開發作大規模開採。當時引入嘅技術非常專業，包括爆破同礦洞隧道、採礦路軌同採礦車等等，簡直就好似迪士尼灰熊山谷咁嘅情況。喺國共內戰嘅背景下，又有一批國民黨背景嘅北方人逃難落嚟香港，聚居喺馬鞍山村，全盛時期係一個有成萬人居住嘅生活圈，而嗰度就好獨特地有好多北方嘢賣嘅地方，例如係包子、饅頭、餃子同麵條等等。而除咗充滿北方人之外，亦有客家人、潮州人、留喺度為礦場提供技術同知識嘅日本工程師，仲有基督教信義會同天主教會呢兩個信仰群體嘅外國牧者同工提供教育同醫療等等嘅需要，可以話係一個小香港嘅呈現。

呢班礦工喺六十年代末因為礦業息微，而要另覓工作，但由於佢地全部師承日本人，有啲甚至去過日本學藝，因此好多香港當時嘅重要基建工程，一聽到係嚟自馬鞍山嘅礦工，尤其係做爆破嘅，都可以話係必請。我地嘅獅子山隧道、1978年通車嘅地鐵荃灣線，如果冇呢班承續日本人技術嘅礦工，就冇呢啲基建。今日諗番呢個背景都真係幾有趣，沒有國仇家恨，只有為生活而努力嘅一班小人物，無論係為兩餐嘅礦工，定係戰後留低傳授技術嘅日本人。

再講番馬鞍山村嘅生活，由於曾經有濃厚嘅國民黨歷史，所以村民以前係過雙十國慶。而因為村內只有小學，如果佢地嘅子弟升中，過去調景嶺嗰邊讀書，由於係姊妹村，國民政府會支持啲子弟讀書。而再講礦工同日本工程師嘅關係，原來佢地同我地一樣，假日就會一齊行山，行嘅就係馬鞍山上昂坪去西貢呢啲我地都好熟嘅路線，頓時覺得呢段歷史都好有人情味。再講多少少關於信義會嘅社區工作，原來喺呢啲村民都漸漸移居到山下，加上1962年颱風溫黛摧毀了居民的房子，教會就為佢地建立咗一條信義新村，香港有好多條叫信義新村嘅村落，都係由信義會幫手建立。

今次嘅活化歷史嘅跑步活動，令我更加熱愛香港，香港人嘅身分同歷史要靠我地每一個人去傳承同守護。各位熱愛香港嘅跑友，我地一齊努力為香港跑落去！