這唔係足底筋膜炎!4招分辨足底肌肉酸痛

Sport Alignment 力學矯正鞋墊中心
發表於2017/07/04
68,054次點閱
4人收藏
加入收藏

(圖片來源:Sport Alignment 力學矯正鞋墊中心)


好多呢類型痛症嘅患者會以為自己係足底筋膜炎。通常一開始問症時會係咁:

「覺得有咩唔舒服所以嚟檢查呢?」
「我腳板底痛,我諗我有筋膜炎。」
「係邊個位痛?(按住腳踭內側底部)呢度?」
「um...唔係...前少少呢忽肉。」
「會唔會朝早起身落床就針吉咁痛,但行一陣就唔痛?」
「唔會喎...反而係行得耐,例如兩三個鐘就會好攰好冤咁痛。」


仔細檢查會發現痛楚位置就如圖中「X」所示,而且痛楚會有幾項特徵:
1)長時間活動後出現
2)冤攰而唔係sharp pain
3)位置偏向腳內檔
4)按摩呢條肌肉時會好痛但係又會好舒服


同筋膜炎相比,的確痛嘅位置好接近,不過痛嘅感覺同埋出現時間會有分別,所以從中可以分辨到兩種痛症。


如果唔係筋膜炎,咁到底係咩痛呢?其實呢條肌肉叫做「Abductor Halluxis Brevis」。會好容易同筋膜炎混淆嘅原因,全因為佢地有幾乎一樣嘅接駁位:向前接駁住腳趾公底部,向後接駁住腳踭骨嘅內側。所以佢同足底筋膜係合力做緊同一件事,就係支撐住足弓。


可惜,都市人足弓往往因為唔同因素出現下陷,反而會拉扯住足底筋膜同埋呢條肌肉。由於肌肉用力時會收縮,如果一開始已經俾人拉扯住,就要用更多能量先可以收縮到,形成易攰易酸痛嘅情況。如果情況持續,足底筋膜少咗呢個幫手,有機會演變成足底筋膜炎,咁就會出現埋早上刺痛嘅情況。


所以有治療師建議足底筋膜炎病人訓練足底肌肉,不無道理。但係亦要同時留意足弓有無下陷嘅情況,如果有,單靠肌肉鍛鍊係好難根治到呢個問題。承托足弓嘅力學鞋墊,先可以令肌肉保持正常發揮,有效減少痛楚。


*本網站所提供之運動傷害相關資訊僅供參考,無法取代專業醫師的診斷與治療。如有急性病症,請逕行就醫,以免延誤病情;若有醫學諮詢需求,則或許可以到運動保健室問問跑友們的意見!


延伸閱讀

改善足底筋膜炎必練3招 不睇不專業



一週兩次 提升下肢力量訓練

教你如何根治黑指甲、灰指甲