自我挑戰

跑步，可以是一個人的事，亦可以是一群人的事。哪怕是一群人，真正要挑戰的對手其實是自己，或許是說是過去的自己。每次跑步都是以過去的自己為目標，為的是去撃敗昨天的自己，就像這次的自我挑戰，我做了一件未曾想過的事 - 環新界跑。

在今年10月才得知環島的活動，所以之前9月的九龍段就無參加（對我這個九龍人來說九龍段應該係最好跑），而10月港島段有打算參賽（當時跑了~15k，由柴灣出發去灣仔碼頭），最後因為個人原因放棄了，11月離島段就未能撥空，所以最後一跑就跑大佬 - 178公里的新界段。

路段分拆

因為本身都有自己既訓練，好難揾一個整日或幾個大半日去完成整條路段，惟有將178公里分為幾段大段路及一些短路，主要準側是以交通去分，長度都係在30~42k之間，大約是會比平時的LSD長，但又未到過全馬，短路程的主要近九龍的，會分期在recovery跑完成。因此，整條路就變了這幾段：

1. 大王爺廟 > 南涌天后宮 > 粉嶺龍躍頭覲龍圍門樓 > 出上水地鐵站（大埔去上水）
2. 上水地鐵站 > 梧桐河大水管 > 馬草壟路魚塘 > 錦綉花園 > 南生圍橫水渡 > 豐樂圍魚塘 > 轉彎出去（上水去天水圍）
3. 天水圍 > 青山紅樓 > 嘉頓工廠 > 荃灣碼頭 > 荃灣西地鐵站（天水圍去荃灣西）
4. 大學站 > 烏溪沙石灘> 水浪窩觀星台 > 猴塘溪營地 > 西貢碼頭紙船（大學去西貢）

而短程的散路段就有：

1. 大學站 > 大王爺廟
2. 沙田坳獅子亭 > 飛鵝山石碑
3. 荃灣碼頭 > 九華徑牌坊
4. 九華徑牌坊 > 沙田坳獅子亭
5. 西貢碼頭紙船 > 飛鵝山石碑

個人心得

如果要每段都留一大段心得，我驚打兩三篇都唔夠打，所以最後揀了不同路段中最深刻既部分留下些少回憶，希望未來回望時都記得當中的點點滴滴。

新娘潭段 - 新娘潭路本身沒有行人路可以跑，惟有跑馬路，跟車一齊爭路跑，大約都跑了3-4K才回到行人路位，再加上呢段車路有超長段既上落斜路段，之前好少做上落斜訓練，令到自己跑既時候有少少失速，而且亦比較危險，一上一落亦影響到之後沙頭角跑回上水的表現，每一刻都在想幾時先跑到返去。之前亦未有去過沙頭角段，只有前半段（由大王廟入鹿頸）有踏過單車，所以當時都係一邊搵路一邊跑，有個位跑錯左跑左去沙頭角既屋村入面。

當時搵呢個龍躍頭搵左一震先見到

天水圍段 - 呢段應該係4課入面跑得最快既一課，最主要係上落比較少，比較似平時在練的長課，尤其係南生圍個轉彎位，大平路又無車又闊，當時均速入左5分內（以自己LSD離講算好快），而且跑前1日食完buffet入滿左油，跑起上離好有力，再加上治路既整體經歷，景同事都好深刻，好似係邊景回望羅湖時的風景，南生圍眾人用相機打雀的奇觀，香港惟一人手橫水渡，天水圍後面的沙橘村及狗場。呢一段係惟一一段跑到最後有那種仲想多跑幾公里既感覺。

由香港羅湖望向中國內地時的風景

南生圍既跑步小徑，長且平的泥路

荃灣西段 - 由天水圍去荃灣西段主要經青山公路，由天水圍一路跑到屯門再轉青公到荃灣西。之前聽朋友講青公青公，呢次係第一次到訪青公，實不相瞞，青公比想像中好跑，風景怡人就不在話下，路徑明確而又有適量上落訓練，再加上人流不多，終於明白青公為何成為許多朋友的必跑半馬/全馬路段。要說最深刻莫過於當時到青公荃灣段（最後3-4K左右），當時因為補給不足而提早撞牆，最後只有跟住位師兄用6分速跑完最後青公下山路段。雖然只係6分速，但以個時既自己而言已經係最快既速度。

一早到元朗準備出發

西貢段 - 西貢段係全部入面最長既一段，整體40k（原本更長，連埋去彩虹段一齊跑，但最段因為體力問題所以提早完結），本身應該係搭車去西貢開跑，最後調轉離跑（容易預留時間提早離開）。全部路段有7成都係未去過（得一開頭入烏溪沙同最後北潭涌出西貢有去過），所以跑既時候好多時都要搵路，但景色優美，尤其係沿海岸線跑既路段（烏溪沙石灘，水浪窩入猴塘溪營地段），路途中的大草地亦十分宜人。但因路途較長，到最後有少許爆掉的情況，好彩當時離西貢市區已近，當下改變跑步計劃提早坐車出彩虹，否則可能不是坐巴士而是救護車了。

好牛不攔路，好路不攔牛

飛鵝山段 - 呢段由沙田坳獅子亭跑到飛鵝山石碑，本身當係recovery run，雖然事前都見到會多上落，但諗住慢慢跑應該無事，結果一開始跑就感覺到出事，跑到一半未去到回歸亭已經投降變左行山，行到落山位（完左麥徑到扎山道停車場）先開始跑返起。經過今日先發現自己上山既能力真係好弱，要再多加訓練。

上山時的風景係動力之一

九華徑段 - 呢段由九華徑牌坊跑去沙田坳獅子亭，第一次因為跑既時候入到村唔係好熟路，用多左時間先出返離金山，到準備入九龍仔郊遊徑時已經太夜（大約6點半，天已黑），當時自己無準備到任何照明工具（跑夜山離講好危險），於是決定沿大埔道落返去深水埗，明日再戰。第二日拎左頭燈，去到同一路段時都係6點15分，諗住應該可以7點半返到去黃大仙，但最後高估左自己既能力，係山上孤零零行左半個鐘，身邊一片漆黑，人又攰，仲要一路上山，個時真係好徬徨，惟一諗頭係想盡快返去見屋企人，好彩最後搵到路落返去沙田坳道，但到地鐵站都已經8點。

從九龍副水塘水壩望向香港

獅子山上的香港夜景

小小感想

好慶幸可以在2020年最後一個月完成一件創舉，雖然跟其他師兄師姐比仍然是斑門弄斧，見到他們有些可能用更少日數去完成，甚至一口氣完成178公里，有些可能跑了不止一個賽事，甚至跑了大滿貫，有些可能是兩個人，甚至一班人在跑，但不論如何，自己盡力完成就好了，能夠跑完所有路段，無傷無痛回到家中準備下次跑步已經是不幸中的大幸了。期望2021年或以後有機會再戰類似賽事！