九龍站
對於我嚟講，環嘅意義就係要一氣呵成。最初由紅戰領導大神日月吹雞話要環九龍，初期各位隊友都無乜反應，之後我覺得都係50k啫，咪試吓玩囉，而且市區環跑，無咩好擔心及顧慮，於是加埋豆神，3人行一拍即合。全程睇得最多唔係風景，而係睇住隻錶剩番幾多K，最後日月去到3x K撞牆後無心無力，唯有鼓勵吓佢啦。最後大家都有一個迷思，就係將軍澳喺九龍區咩？

香港站

既然洗濕咗個頭，當然繼續第二擊環港島。鑒於小弟腎王年頭挑戰過修改路線比較綑邊嘅堅 · 環島，所以對路線瞭如指掌。今次有木火陪伴嘅新血沈沈加盟：諗住試吓㗎咋，跑得幾多得幾多。

年青人就係有嗰團火，不過你跑到心跳百九幾，小心身體呀！而日月依然3x K撞牆。可恨嘅係同人唔同命，同錶唔同里數，最後要補跑1.5K先夠數。

大魚站

第三擊環大魚依然處之泰然。不過突然心血來潮，加插一場鳳徑全走，目標好明確，只要行得晒唔使快。

由於山路緣故，當然要着番對山鞋，事緣曾經可以上得山嘅3對山鞋，只剩番1對無蝕底嘅“屎葛”，環九龍都係着佢，不過今次就覺得唔多掂，成日以為鞋櫳有沙，點知原來腳板底起咗水泡。所以話屎波架撐多，於是買番對貪佢夠輕又夠咬地嘅“馬花蹄”，但係呢對鞋可能同我嘅時辰八字唔夾，四分一路程左腳足弓已經開始痛，更加不幸嘅係唔小心仆街，傷上加雙唯有死跟。沈沈同埋木火中途喺貝澳加入，而且尾段時間成績理想，豆神決定鞭策撞牆嘅日月，最終10小時內完成，比預期快1小時。

新界站
今次打大佬對大家嚟講係一個考驗，有人提議分兩三次去完成，我當然係最搞事嗰位啦：178K啫，毅行都100K，多少少之嘛。豆神同我理念一至：咩叫“環”，“環”梗係一次過啦，分開就無咗意義。12月頭原定的3日假期，因疫情關係而取消活動，心血又來潮嚟一轉港島徑全走自私跑，今次終於感受到日月撞牆嘅感覺。不過仲有一個星期時間，開始擔心左腳足弓痛嘅問題能唔能夠完成得到，唯有多d休息，調節吓飲食。因為今次打大佬只得日月、豆神同埋我，而部份路段同埋夜晚無得補給，沈沈義不容辭做我哋嘅最強十卜，於是安排喺一半路程嘅大美督為我哋加油。可能有回醜coke打點滴關係，前半段路程非常順利，完全係超越預期。

但係後半段嘅路程惡夢就開始啦，撞牆嘅繼續撞牆，腳痛嘅繼續腳痛，唯有調節吓步伐，重新計算都應該喺計劃之內完成。可惜帶住負能量上路嘅日月，佢一直保持沉默，面帶仇容，但係都睇得出佢嘅努力，我哋互相鼓勵下，喺一條粗心大意嘅公路，加上3條濕滑嘅友仔，默默地繼續行。矇矇鬆鬆大家都無言以對，好似喪屍咁終於行到黃巴站，雖然清晨天色還未光，但昏暗嘅街燈下已經有食店營業，當然唔會錯過休息同埋補充體力嘅機會。之後沿着青公向元朗進發，車多塵多惡狗多，隔住馬路都衝過嚟，呢d係咪叫狗衝？當我同日月跛吓跛吓嘅時候，豆神依然渾身是勁，而且經過家門順道攞咗一對pole俾日月加持，實在太神了，馬上提升戰鬥力。不經不覺行到屯門，最強十卜沈沈加入戰團陪行，一齊食飽再次上路。由於氣溫驟降同埋近海越行越凍，雖然着咗風褸都難頂寒風刺骨，唯有行快兩步，好不容易嚟到深井。因為前後腳關係，於是喺便利店等埋日月同埋沈沈。日月可能唔想耽誤我哋時間，叫我同豆神先行一步，佢有沈沈陪住一路好走。於是同豆神商量之後，試吓爆去荃灣，為求達到目標，體內嘅腎上腺素急速上升，雙腳已經唔屬於自己喪跑，亦都感覺唔到足弓痛。由於去荃灣呢段青公要上落幾回，可以話係來回地獄又折返人間，好不容易到咗荃西，不過未完㗎，仲要跑返去葵芳起點，終於36小時內完成。