係四徑終點 Andre 分享 11 年前同朋友輸賭「你認為有無人可以連走香港四徑？」身邊嘅人搖搖頭，認為無人可以做到。結果 Andre 喺新年假期一次過走完四徑，挑戰成功。過程中嘅痛苦超乎想像，但亦換來無比嘅成功感，於是佢想帶人感受他嘅經歷，Hong Kong Four Trails Ultra Challenge 從此誕生。每逢農曆新年就有一班挑戰者因為不同原因向Andre寫信接受挑戰。而我為左達到一個更遙遠嘅目標而需要籍住四徑尋求突破而接受挑戰。
香港四徑挑戰行走期間需要 self support 自我補給。
（圖片來源：Facebook @Wong Ho Chung 黃浩聰）
香港四徑挑戰 - 以逆走方式跑麥里浩徑 100 公里 > 衞奕信徑 78 公里 > 港島徑 50 公里>鳳凰徑 70 公里，全長 298 公里，15000 米攀升。行走時需要 self support 自我補給，只有徑與徑之間先可接受補給，及跟隨指定交通工具作轉換。
只有徑與徑之間先可接受補給，及跟隨指定交通工具作轉換。
（圖片來源：Facebook @Wong Ho Chung 黃浩聰）
170 公里係我嘅極限，挑戰中，200 公里後每一步都係超出臨界點嘅試煉，每踏一步腳都會痛，能量系統亦已經超出負荷，有反胃嘅感覺。但我相信呢個係超越極限必須經歷嘅過程，係我想要嘅感覺。
喺最後一徑嘅最後 20 公里靈會山，正值第二晚 2am - 4am ，當時已經超過 42 小時體力消耗，體力同精神處於最薄弱時，仲落起滂沱大雨，大霧到伸手不見五指，視線需要集中喺頭燈射向地面嘅一米，進退兩難。來到昂坪 7-11 無開，周圍似鬼城一樣著左燈播緊音樂，但唔見一個人。
幾經辛苦捱到日出，雨勢減弱，爬上大東山之際，我見到周圍嘅草木都變成咗人（可能我真係太渴望見到人）。但我知道眼前所見嘅係幻象⋯既然眼看不清真偽，就用心去感受。我感覺到自己呼吸聲，心臟仍然跳動，腳仍然有力⋯於是我跑起來，jog 上大東山，用肌肉嘅躍動叫醒沉睡嘅意志，我衝破幻象，出一身汗之後回復清醒，然後見到山腳下嘅梅窩，直奔向終點。喺眾人歡呼聲下吻上綠色郵筒，為今次挑戰作結。有人話我看睇落唔攰，臨尾仲跑到，但真正明白我感受嘅，可能只有 Andre 同歷屆完成者。
（事後翻查資料指出人嘅精神狀態處於最薄弱時，需要籍住「腦補」填充眼見景象因而產生幻覺）
黃浩聰今次不但打破大會紀錄，更成史上第一人 Sub-48 完成四徑。
（圖片來源：Facebook @Wong Ho Chung 黃浩聰）
成績總結： 麥里浩徑 - 13 小時 36 分鐘 交通時間 - 00 小時 49 分鐘 衞奕信徑 - 12 小時 28 分鐘 交通時間 - 45 分鐘 港島徑 - 6 小時 45 分鐘 等船時間 - 30 分鐘 坐船時間 - 40 分鐘 (7:40pm快船) 鳳凰徑 - 11 小時 22 分鐘 總時間 - 46 小時 55 分鐘 |
曾小強 Stone 今次擔任黃浩聰支援之一。
（圖片來源：Facebook @Wong Ho Chung 黃浩聰）
在此特別感謝 Viann 同小強做我今次嘅 Support，盡在不言中。仲有路上遇見嘅花生友們同我保持距離、係屋企收看「移動點點」嘅觀眾、沿路拍攝嘅攝影師們、以及各媒體日以繼夜追蹤嘅小編們，令今次挑戰得到更多人關注。謝謝！
黃浩聰表示今次挑戰於不同方面可以做得更好，尚有進步空間。
（圖片來源：Facebook @Wong Ho Chung 黃浩聰）
今次挑戰未算完美，假如在挑戰前試路、裝備運用、營養補給、轉換中途休息、以及四徑嘅體力分佈幾方面再做好啲，仲有進步空間。但我暫時未能再挑戰，因為開始要為更遙遠嘅目標做準備。
The North Face Hong Kong 今季套衫幾靚 COROS Hong Kong Vertix2 跑完四徑仲剩72%電 Nippihealth_hk 骨膠原補充令我無傷無痛 Yvonne Lui Trust 呂姵霖基金會 運動員贊助 #TheNorthFaceHK #NeverStopExploring #tnfhk #thenorthfaceadventureteam #Coros #CorosHK #ThePeakHunter #TPH #Nippi #Hammernutrition ViolanAlan.photos Photo credit. 當然仲有好多其他攝影師及靚相未能盡錄請見諒 |
文章來源：黃浩聰
Facebook: Wong Ho Chung 黃浩聰
Instagram: @hochungw
