【#真青公全走】花拉師姐逆走青公全紀錄

Flora Chow
發表於2021/04/16
2,637次點閱
0人收藏
加入收藏


愚人節,上午八時,上水古洞

之前跟師兄師姐參加了青公.真全走,但因為時間不能配合,所以決定自己跑。

面對着53K,心裏一直好忐忑。

昨晚祈禱的時候,我覺得自己好似耶穌受難前在客西馬尼園的祈禱⋯⋯不過這隻苦杯是自己攞嚟的...

清晨五點起身,坐車入古洞都搞咗個半鐘,未跑已經開始瞌眼瞓去到又要周圍搵廁所,終於6:00出門口8:00先開始跑。


今次逆走,由上水古洞開始。

頭14、5k是無窮無盡的車路車路和車路⋯⋯

孭住1.5L水、三隻蛋幾包gel⋯⋯想起耶穌背起十字架行苦路的痛苦⋯⋯

諗住開recovery pace,跑慢啲希望可以堅持耐啲,不過今日八丶九點已經好熱,件背心磨到心口同鎖骨位甩哂皮,啲汗一流落去⋯⋯真心辛苦。

好不容易出到元朗叫有啲人氣,但已經烈日當空⋯⋯我不停飲水、大概6、7K食一次gel,叫自己要保持速度,唔好諗,跑啦!

沿路一見有巴士,就想搭車返屋企算⋯⋯


去到屯門,又走錯路,來回幾次先搵返條靑山公路⋯⋯去到大欖又去錯咗往九龍個轉車站。

搵返個啱嘅轉車處,我已經彈盡糧絕,見到有汽水機即刻撲埋去想買水飲⋯⋯點知我張八達通冇錢唯有捱埋條青龍頭段出到深井先至補給。

去到荃灣,呢條係自己熟嘅路,心情都叫好啲,不過睇吓隻錶,其實仲有成十幾K⋯⋯53k絕對唔係一隻全馬+11K⋯⋯對腳又痠又攰,眼前是陽光普照的漫漫長路⋯⋯已經唔敢再諗點捱⋯⋯抬頭望望天空,低下頭繼續走就好。

葵涌段一段長長的上斜,完全提唔起腳,又累又渴,飲極水都唔夠,一次廁所都冇去⋯⋯意識迷糊的半行半跑躝上去⋯⋯落斜時盡量跑,開四分披追返啲時間,希望縮短痛苦的過程⋯⋯

到荔枝角,在牆外逗留了一會,我未食午餐,唔知大家今日嘅午餐是否妥當呢?

進入最後一段青山道,睇吓街道牌上的門牌號碼⋯⋯ 心一沉:6xx-6xx號⋯⋯救命⋯⋯仲有幾耐先到青山道3號㗎?

連講粗口嘅氣都冇,在滿是放飯人潮的街道上穿插,一段兩、三K嘅路,走了天長地久咁耐⋯⋯然後,突然到了!

沒有激動、也冇狂喜,第一時間走入去嘉頓買咗包生命麵包食⋯⋯

離開了,經師兄師姐提醒,才發覺沒有在青山道3號個街道牌打卡,又要走返轉頭⋯⋯(攰)


匆匆忙忙落跑緣搵牧師,型男師兄太高估我了他一早已在跑緣等我,支持下

之後我就回家買餸去,為咗增加自己完賽嘅動力,我早已公告天下,同街市啲叔叔姐姐講我今日要跑青山公路,佢哋一見到我出現、冇穿冇爛就好開心,賣菜的姐姐仲半賣半送請我食菜,好有愛!

雖然黑咗10度、多咗一個黑白分明嘅背心印、心口磨損左幾撻、右腳多了一隻黑甲,不過,一個人的逆走青公53K,是個難得的生命軌跡。