【香港四徑】新任紀錄保持者梁俊強 Jacky 細說比賽全紀錄!

Jacky Leung
發表於2021/02/17
4,860次點閱
0人收藏
加入收藏


HK4TUC 10th edition 298km 14500m+ 72hours

因為上年運用多方策略幸運地完成,今年有資格去報名,入了 Waiting List 第六位,即係同唔駛落場無咩分別。疫情關係,外國選手都無奈要放棄參與,去年 12 月 9 日才確定由 Waiting List 直上正選。參加原因只是為 Recall and Refresh memory,時間目標只是快過去年已經滿意。同時也要為學生的 HK100 認真準備,慶幸 HK100 同四徑相隔一個月,所以都足夠時間 Recover 參與支持這個自我挑戰。


   今年規則再度收緊
No❌ Music, Poles
Yes✔️ Mask, Hand sanitizer

Support points: 3, only between trails 
Supporters: 1, 可以落手幫跑手
Driver: 1, support 時只可以坐司機位,唔可以離開坐位及落手幫 Supporter 或跑手
Transportation: 衛徑藍田地鐵站至太古地鐵站,中環至梅窩坐船。

路線:逆走麥里浩徑、衛奕迅徑、港島徑、鳳凰徑

    Part 1,麥理浩徑 100km (Supporter: Janice Cheung 車手:Sun Ho)


年初一早上 6:49 排尾三從屯門 M200 出發,引水道上溫度清涼,一邊跑一邊睇日出,遇上Jacob,不過佢見到我如見鬼一樣爆句「嚇死」,互相鼓勵後繼續走 M10-9。先後遇見 Chang、Fanny、Chris、Leo。無去蓮姐補水,反而 Refill 山水。上禾塘岡遇見 Will、Virginie,大帽山山水位遇上 Nikki,不過佢搞 Filter咀搞咗一輪。去到四方山附近就小拗一下,就知大鑊唔推得,之後只可以保守前進。M4 遇上楚健,可惜佢嘔咗兩次,互相鼓勵下繼續前進。


氣溫開始上升,上年在 80km 已經胃出事,所以這個位係一個心理關口,好彩平安過到北潭坳,帶著疲倦身軀到達東壩,不過無乜力走 M1,只可收慢走回北潭涌,到達時大叫好肚餓,換過 Tracker 後,Andre 話我舊年唔可以,今年無。估唔到去 Supporting car 係要 jog 上樓梯,呢下真心笑咗。換衫食飯就出發南涌,路途上小睡片刻。

    Part 2, 衛奕信徑 78km (Supporter: Janice Cheung 車手:Sun Ho)
21:23 南涌出發,可以在清涼黑夜中走過八仙嶺及九龍坑山,在九龍坑山落山時遇上 Tom,原來他有腹痛,未能進食及跑落山,他打算作小睡舒緩情況,可惜山上太凍,不過他戰意仍然熾熱,內心強大真的令我非常佩服!


走至太和食個杯麵出發,不過眼訓這個天敵來襲,而且力量的確下降中。走過城門金山及全港最悶的引水道去到沙田坳士多,竟然老闆早起拜神,可以再買杯麵食。可惜今次吃不消,食幾啖已經想作嘔,無奈棄丟於扎山道垃圾桶。


精神及體力下降的情況下走至藍田,終於頂唔順要破戒飲可樂同食燒賣,又出奇地竟然可以上返力,在暴曬的陽光下繼續由太古走至赤柱。在赤柱食飯時要用退熱貼及冰墊降溫,換衫後坐車小睡便到達石澳。

    Part 3, 港島徑 50km (Supporter: Julia Hui 車手:Ken Leung)

換上輕裝後,13:30 石澳巴士站起步。不過天熱如夏天,龍脊多人如旺角,邊叫邊走,順利通過土地灣及大潭篤。


上年深夜上大風坳時又眼瞓又幻覺又頹廢,今年日照時上的確精神好多,順利到達大風坳見到細通,問我有冇打算 Sub50, 我斬釘截鐵話無,唔到我去諗。


走至淺水灣道油站 Refill,再睇太陽位置,開始諗下船期。12:00? 22:00? 21:00? 20:00? 行上布力徑時拎電話出來認真 Check 船期,可以一試 20:20 快船,唔得就 21:00 慢船。

後半段嘗試加少少速,走返鬆對腳,走至貝路道前遇上 pong pong,問佢係咪追 20:20 定 21:00 船,佢話隨心,因為身體好多狀況,又痾又嘔又腳痛,我話不如一齊追 21:00 船,碼頭見。我 20:40 到達山頂,要追 21:00,呢個時候絕對係車手表演時候,20:56 成功到達六號碼頭入閘上船,在船上食飯、打 Theragun及小睡全部做齊。


    Part 4, 鳳凰徑 70km
落船時,Julien, Joan, Jono, Andre 等人已經 Ready 迎接我們,Julien 非常興奮指住身上 HKSAR 區徽對我說「You are the one to make history. 」「Allez, Allez, Allez」「Just keep going fast, you know pain is only temporary」但我仍然唔明佢講咩,佢急我唔急嘅情況下再食粥同做動態熱身,之後 Jono 同 Julien 都催我快啲走,話 Salomon 同我相差 52min,話可以追到,我即刻話我又唔係要做我Under 50,唔追。我就被催促起步,當時再望錶見到 39:24 才明白 Julien 句 make history 係點解,同埋仲乜急過我催我走。心入面就諗住上次訓練的時間及 pacing 感覺,只要唔太喘氣,就大大步咁走至貝澳及水口。

由於途中士多全部關門,所以 Refill 廁所水。走至狗嶺涌,見到有頭燈慢慢行,覺得好奇怪零晨時分啲營友一個人行出來散步,行近啲先發現跑手裝,竟然係 Salomon。我問「Are you ok?」佢話胃部不適,食唔落野,無哂 Energy。佢問我「Are you going to break 50?」我回答「Yes, I want to give a try. I just want to follow you and finish it together with you.」之後佢嘗試再走起來,無奈真的無哂能量。


走至分流二澳遇上狗,好在冇被襲擊,不過走了幾次 Interval,再加速消耗所餘無幾的能量。大澳公廁 Refill 後,開始最後 4 Peaks。順利過渡靈會山後,上落羗山時又突然無哂能量,行上山都飄,食物有限,只可食少少,好態少少就行快少少。


大約 5am 到達鳳凰徑牌,開始 set split 俾自己要 fulfill。由於消耗太大,成日出現食完野好快無電嘅情況,總算食夠有力上鳳凰山。日出前晨曦非常美麗,通過伯公坳後上大東山頂睇日出特別感動,餘下 1.5小時走 7k 返梅窩。落完南山再上樓梯真心腳軟無力,去到石屎路見到 Jeremy 同 Cosmo,心情開始興奮起來,但幻想完成時沒有哭的原因。

    Part 5, 到達終點


走至碼頭,見到一大班朋友等候,興奮地衝去親吻郵筒後,心情複雜並激動,實在難以理解,難以置信如何做到,只可感激 Julien 的說話,成了心理質素的最重要關鍵,完全感受到說話的力量係強大到可以超越自己。



四徑本身是沒有榮耀,沒有獎品,沒有分數,除了相片回憶,就只有隻身走進山野孤寂地面對自己的不足、失誤及黑暗面。香檳是四徑完成的洗禮,得到的是一種從新認識真正自己的新視野,而且各人都互相多了一份由心而發的尊重及尊敬。成功不代表勝利,失敗不代表羞恥。肯定的是沒有經歷失敗便難以成功。慶幸自己有機會參與其中,經歷當中的高與低過程,學懂及修行忍耐,更會珍惜 supporters 的協助,做好自己,挑戰自己。感謝 Andre 團隊使大家在疫情限聚情況下,都能夠順利舉行 HK4TUC 。感謝 support team Janice, Sun, Julia, Ken 的專業 support。感謝大家的支持,希望這也是大家一個美好的回憶。


圖:Jacky Leung, ViolanAlan.photos, Photosbyme Photography 遊。我攝

美術/剪接:K

採訪:艾頓