【Coach So 跑步解讀】點睇 Big Data 協助長跑練習?

Coach So
發表於2021/01/06
1,065次點閱
0人收藏
加入收藏

呢一篇 article 十分值得跑步人去睇,特別係想追成績嘅人同埋教練。內容係講跑步 app 收集咗大量跑手跑步數據之後,睇到一啲跑手習慣同埋訓練方向嘅趨向,篇 article 歸納咗以下幾點,我再補充我嘅睇法:
1) 想跑快就要跑多啲,就算慢跑都有用
香港奧運跑手陳敏儀曾經同我講:「其實跑得多就會叻」,我知係「係亞媽都係女人」嘅道理,不過知還知,做還做。普遍香港跑手一係總跑量唔夠,一係就將訓練量集中喺「衝圈同 Tempo」而唔太重視「一般耐力跑」,結果係受限於基礎有氧耐力不足而進步緩慢,或者衝到受傷。

2) 快跑訓練比慢跑更可以令跑手跑得更有效率,即係一樣 effort 可以跑快咗。我知又係「亞媽係女人」,不過關鍵係「輕鬆跑:快跑」嘅比例係幾多,有人話 8:2,有人話 7:3,有人話 5:5,以我經驗係唔同時期個比例會變,一般情況係慢跑佔大部份,但近比賽的確增加快跑比例會較好,不過冇前面嘅大量慢跑準備作基礎,增加快跑量亦未必會有好效果。

3) 精英跑手唔係課課都隊到盡,倒翻轉講要跑得多又吓吓跑得快,短時間係可以,但長遠咁做會易做成疲勞累積就會受傷,而且呢種慢性疲勞累積導至嘅傷恢復期亦都會較長。始終練咗要恢復到先至會變成自己嘅嘢,冇事先做到世界冠軍㗎嘛。


4) 進境可能會冇界限,但數據話我哋知身體可承受嘅訓練量同強度係有界限,當然個個人會係唔同。其中一個計算嘅方法叫 TRIMPS (TRaining IMPulse),就係用運動持續時間 (分鐘) 乘以心率,數據話 27000 係馬拉松訓練嘅 upper limit,即係例如用 150次/分鐘心率去持續跑 180 分鐘,都係果句「數據係咁講」,你冇必要去挑戰呢個數據,多過 27000 亦都唔會有獎頒畀你,當個參考囉。

5) 如果有接受過教練培訓嘅人一定會認識「訓練周期」,簡單講就係以星期為單位去設計訓練計劃,而令身體有更深度更持久嘅訓練刺激,而唔係單課計。
而且訓練單位都要分輕重,要記住如果慢嘅慢唔到,想快亦都唔會快得到,因為跟本未恢復晒去快跑。
分析仲指出,有 47% 嘅人練唔夠,14% 人練過龍,即係翻番上面 1-3 點講嘅嘢。

最後我想講,Big data 會令到電腦愈來愈清楚唔同人嘅身體狀況,可能遲啲會清楚過你自己,建議嘅訓練 program 亦都會愈來愈準確,過多 5-10 年就會有「AI 個人 program」。所以我認為作為教練應該多著重教運動員「心法」與「技巧」,否則教練好快會被 AI 取締。

圖片來源: PodiumRunner