【話題】點解香港咁少靚女跑全馬?(上)

園丁
發表於2015/05/25
1,937次點閱
0人收藏
加入收藏
(圖片來源:園丁)

3月中,與友人去日本四國的德島馬拉松,有幸認識資深跑友X先生。短短3日的旅程,我們與X四次巧合相遇:先是周五晚在JR站旁的居酒屋相識;周六早上Expo前在街頭偶遇;周日比賽前排隊去廁所時又撞到;比賽結束後,在帳幕內食緊大會提供的免費烏冬期間,又再次碰到X。


如此有緣,賽後當然要一齊慶祝。德島巿中心其實得嗰幾條街,餐廳一係唔開門、一係就滿晒,3個中佬搵咗兩條街,終於搵到一間仲有位嘅地道火鍋店,如狼似虎大擦重量級橫綱鍋,用Suntory Highball Whiskey送德島名物「阿波尾雞」。


通曉多國語言的X,加拿大讀書、意大利工作、娶埋鬼妹、揸意大利護照、呢幾年在大陸幫人管理貿易公司、一放假就去外國跑步,尤其係日本。佢單車和馬拉松都玩,馬拉松PB跑過Sub 330,勁過園丁多多聲。


大家飲多咗兩杯,去到runners’ high high之際,跑馬界閱女無數的X,就爆咗一句話:「去咗咁多地方跑馬拉松,真係發現跑香港馬拉松(講緊42.195公里,唔係十公里半馬)嘅女仔,大多數都幾樣衰!」


呢句話,真係酒後吐真言。園丁自問馬拉松唔算跑好多,香港以外都有廿幾三十個,但都覺得呢句話好中肯。香港雖然多靚女,撐傘的後生靚女尤其多,但身邊真係無乜靚女跑馬拉松(係無乜,唔係無呀),俾到盡都係跑半馬。香港演藝界就係一個縮影,跑馬嗰個叫徐豪縈,唔係謝安琪,劉心悠只係跑十公里,唔係馬拉松。


「係啦,日本都唔知有幾多靚女!又靚、身材又好,單係睇佢哋嘅跑姿,fit到爆嘅身材,已經好多幻想空間。有啲仲鬼咁死快,死追爛追都追唔到佢,想見多一面都無機會。」我都忍唔住插把口。


的確喺日本、美國同台灣的馬拉松,噏唔出名的靚女有、噏得出名的明星model都有,跑道上總有一個靚女跑在左近。好似台灣一個歐陽靖、一個王麗雅,兩位model跑得、睇得又寫得,莫講話鼓勵唔少後生女跑步,就連男仔都吸引埋去跑。


香港的role model只有「肯雅徐」徐濠縈。我好懷疑香港究竟有多少女士,包括徐濠縈自己,想被冠以「肯雅X」的別名呢?(待續)