（2011年9月）

「魚唔過塘唔會肥，做消防員幾十年有得做，但體能教練呢個機會過咗就無，年紀大咗你更加唔會想試 !」

「無話邊個取代唔到邊個，你走咗好快有人取代你。但人生係你自己嘅，你應該揀自己想行嘅路」

老總呢幾句說話係我印象中好深刻，令我決心離開舒適區，成為消防處第十期體能教練 ( Physical Training Instructor PTI )。

之後我試過玩龍舟、搶包山、健身、體操 ...... 但都唔適合自己。我突然諗起曾經跑過比賽，於是我再次著上跑鞋，想認真跑一次。

人生第一場公開賽事，係鑽一里 4 x 400 米接力賽，喺中環遮打花園舉行，仲有電視現場直播。來到總決賽，我代表消防長跑隊，同 PTI 師兄弟一隊，負責最後一棒。

我好重視今場比賽，等緊接棒嘅時候，心情緊張到爆燈，仲開始失去信心，亂諗野：

「我復出後第一場賽事一定唔衰得。」

「全世界喺道睇緊我。」

「點解會安排我跑最後一棒 ?」

「千祈唔好靠我追。」

「我希望我嗰隊最後一個到。」

「咁輸咗都唔關我事。」

⋯⋯

結果我嗰隊第二個交棒到我手上，我拎住支棒，心入面好亂，諗埋好多無謂嘢，短短 400 米，都跑到亂晒，最後 100 米已經爆咗，被人過晒，結果最後一名衝線。

嗰一場賽事，真係瘀到爆，我代表消防長跑隊，代表成個部門，係現場直播下，輸咗 ! 我無面目見師兄弟，亦都知道原來自己嘅潛能只係咁渺小，我唔想再累街坊，打算同師兄弟道歉，然後黯然咁離開跑步界⋯ 

我最唔甘心就係三年前無心插柳之下都跑到耀眼成績，今日有心栽花，卻已經跑唔返三年前嘅水平。唔通嗰段真空期真係無辦法彌補？

子威突然拍拍我膊頭「聰，你跑得好好，人哋跑短跑嫁，400 米邊夠佢哋鬥，如果鬥 5000 米就有得鬥」我突然又領悟到，跑步嘅發展亦唔係咁窄，仲有分長短距離，短跑贏唔到可以試下跑長啲。感到有返啲希望，好，下次又試下跑長啲！

賽後，四師兄弟，坐喺茶餐廳嘅卡位，第一次聽佢哋講跑步話題：

邊場邊場比賽

走咩咩 pacing

場賽事走成點

呀邊個邊個跑咩時間

下一場比賽幾時幾時

⋯⋯

我雖然完全答唔到咀，但淨係聽佢哋講都覺得好有趣，原來跑步有咁多學問。

佢哋話嚟緊有幾場賽事隊際唔夠人，想我幫手。我覺得被重視，雖然我跑得無佢哋咁快，但其實我仲可以做好啲，好想貢獻自己嘅力量，為佢哋出一分力。

同三年前比較，感覺唔同咗。我搵到果份作為跑手應有嘅使命感，呢一日之後，我覺得自己成為一位真正嘅跑手。

————————————

現時視角：

三年可以測試到自己係咪一個甘於平淡嘅人。然而，我睇清楚自己唔鍾意舒適，當一定落嚟，就想挑戰新嘅事物。如果當日無離開舒適區，我都唔會跑步，大概我今日會係一個捧住肚腩，非常平凡嘅人。我本身係一個對跑步零認識嘅人，當時資訊無咁發達，連 Facebook 都未有，真係咩嘢都唔識，係逐少逐少慢慢學返嚟。

我會同人講鑽一里係我跑步生涯嘅開始，因為呢場賽事之後，我先搵到作為跑手應有嘅使命感。所以我2011 年 24 歲嘅時候先正式開始跑步，到而家跑步年資 9 年。