【愛護環境】復活節塔門淨灘後記 垃圾滿灘觸目驚心

La Pau
發表於2020/04/15
664次點閱
0人收藏
加入收藏

文章轉載自 Leo Mak

抗疫避災唔一定要學古人咁重陽登高遠足,香港人放假留多幾日喺屋企係唔駛死嘅,但係因為一場人為災禍卻令其他本來無事嘅大自然環境同野生動物無辜受災,咁我哋嘅行為又同嗰啲嚮往自由自在,唔肯戴口罩共同抗疫四圍播毒嘅白痴有咩分別?

塔門大草地經常引來無數遊人駐足紮營

尋日復活假第一日估計好多郊區都同其他熱門景點一樣,無可避免會成為假日「放監」但被困香港嘅市民復活避災勝地,依日難得放晴就再次嚟到塔門依個小島獨自去清灘,期間目睹遊人喺大草地跑跑跳跳放吓狗放吓風箏飲飲食食影吓相,宿喺間屋道太耐覺得唔自在就嚟草地上紮個營宿喺個營道HEA吓,除曬口罩四人以上聚集玩吓笑吓暫且擺脫城市嘅約束,不亦樂乎…

可惜喺過程中難免會習以為常地產生無數食品即棄塑膠包裝和餐具,大部份人食完飲完當然想即時棄之而後快,膠樽膠袋膠飯盒膠叉膠羹膠飲管隨處可見(卻未見有外科口罩),但最關心依啲垃圾嘅反而係喺嗰道生活嘅野生動物,佢哋除咗識得食草仲會好醒咁喺人類棄置嘅垃圾堆中摷廚餘維生,當然佢哋係唔會醒到識分邊啲係食得,邊啲食咗會長年塞喺個胃直至佢消化不能再食唔到嘢,行為變相係慢性「被自殺」幾時死咗都無人知又「無可疑」,因為抗疫大過天根本無人會理一隻新界牛嘅死活。

(最廣受關注嘅一張圖)垃圾站附近被胡亂棄置嘅垃圾卻引來牠們誤以為係可食用一併吞落胃部,等死

你不殺隻牛,隻牛卻因你而死,無錯,你可能會問新界隻牛食膠食到死(如貝澳Billy)關我鬼事?但個海食膠食到就嚟缺氧令全球氣溫上升就實關你同我嘅事,仲有啲海洋垃圾邊道嚟?真係山長水遠登島玩樂嘅人先至會為大自然環境帶嚟垃圾嗎?當然唔止…

雖然無認真作膠樽品牌調查逐一統計過,但粗略估計某幾隻非本地牌子(雖然樽身係印正體中文)嘅樽數量仍然係數一數二

記得前年「山竹」過後塔門弓背灣依道嘅破壞實在慘不忍睹,唔單止係超強颱風吹斷咗幾多棵樹咁小事,而係岸上堆積嘅垃圾數量個厚度相信係永遠都無法清得走,依日所見當年沖咗埋山邊嘅大小海廢依然健在,有啲太巨型難以清走,有啲就細到夾唔起出動吸塵機都吸唔走,好彩嘅就可以俾路過嘅義工見到執起佢,唔好彩嘅就深藏不露喺底層與大自然溶為一體,又或者被一波巨浪從岸邊扯返落大海,被好蠢嘅海洋生物或植物誤當成食物或宿主,從中吸收「養份」。

「山竹」過後積存於山邊樹叢中嘅海廢山,由於進入清理需要一定經驗同技巧故現場狀況與過去兩年差唔多無乜大改善

被海浪沖上岸邊嘅海廢都唔少,當中夾雜住一啲非常新淨根本好似我嚟之前至被棄置嘅新型垃圾

其實環境唔健康,受災嘅最終都係我哋人類,我哋係想逃避一場災劫同揾返久違嘅自由,但同時卻因此而為其他地方帶嚟災禍,唔一定係強國人入侵先會咁我哋香港人佔嘅比重都實在唔少,依方面竟然可以從現場收集到嘅垃圾作品牌調查後粗略估計到出嚟,實際數字我俾唔到大家我只係憑感覺嘅啫!

牛牛食草嘅位置下方石灘上,無錯上個月先至Set咗支監察鏡頭Mon住海岸垃圾嘅情況,但遊人嚟到享樂後產生嘅垃圾又點樣控制?無㗎!只能強制大家自律,棟個木牌呼籲吓啲遊人記得「自己垃圾自己清」,又或者等下次有義工組織嚟自發清理情況才能有望改善,只不過此等揾你唔島嘅偏遠地帶,你山長水遠千辛萬苦帶啲垃圾嚟現場棄置就唔係咁容易運離個島送去堆填,帶走嘅一係就當地摷食物嘅野生動物食落肚,一係就被強風吹走或岸邊扯返落海,再二次污染其他更偏遠嘅地方,繼續將災難轉移到另一個大家眼不見為乾淨嘅環境來承受,而塔門只不過係成個地球村嘅縮影,難道到地球很危險嘅時候我哋就有能力可以快快回火星去避災嗎?

弓背灣石灘嘅埋便三月時新樹立嘅「海廢監察鏡頭」

監察鏡頭後面嗰座發泡膠山「表面上」比過去嘅情況稍有改善,但其實只係經歷時日嘅洗禮後大部份細碎被隱藏喺泥土之下睇唔到而已

災害無論係有形定無形抑或係「新型」都好,真係一次都嫌多更何況係經自己將禍害擴散開去,其實過程中好多起因我哋都係可以避免嘅,例如減少不必要嘅日常消費行為,盡量唔買唔用即棄塑膠包裝嘅飲品同食品(小學生都曉自備水壺去旅行點解你唔識),即使買咗用咗都唔好隨意棄置堆填應考慮回收或重用,皆因現場所見執到嘅所有即棄物品其實大部份本來都係可回收嘅「不是垃圾」,即使佢只不過係一個膠樽膠袋發泡膠還是紙包盒,唔好同我講太複雜唔識塑膠分類同唔知送去邊道回收,識得學行就始終會有一日識得學走,只可惜大城市鼓吹嘅即食文化,卻令人類學習與大自然共存嘅行為不斷退步。

巨型發泡膠堅若磐石,海洋生物誤以為係岩石已被視作為寄居嘅宿主

發泡膠可以送去 迷失的寶藏: 發泡膠回收行動 Missing Link- Polyfoam Recycling Scheme 回收就未必人人都知,但浸過鹹水受過污染嘅垃圾唔可以回收就係肯定嘅事,問題係件嘢從你手上脫手一刻係最終堆填垃圾定係可回收物,全視乎閣下一念之差。(圖中外層包咗PP膠膜嘅湯麵碗乃混合型塑膠,兩者分離不易回收商都唔收)

環保走塑「源頭減廢」成日有人講講到口都臭,亦唔係個別人士嘅專利反正「疫」境自強就是有種有責任要學懂自救,咁我哋(包括所有大自然生物)共同賴以生存嘅環境又有得救嗎?難道大家唔覺得疫病嘅降臨係大自然對人類作出嘅無聲控訴嗎?我唔信教但深信凡事有因必有果,喺全球氣候暖化超越那個「臨界點」之前實在需要我哋自覺受災中嘅人類深切反思同行動,我唔想依一代人康復到香港但毀滅咗地球環境。