【新手行山攻略】csl X 運動筆記 醒你輕鬆行山新手必睇指南

艾頓
發表於2020/02/28
2,781次點閱
2人收藏
加入收藏


自從爆發新冠狀病毒疫情以來,好多香港人都過緊無口罩就唔敢出街嘅日子。由朝笠到晚,嗰種鬱鬱埋埋嘅感覺,真係令人好乏味。所以,連平時好少去行山既朋友,都趁住呢個機會到郊外抖抖氣。今次我地就同大家分享一下行山新手嘅準備要訣:


三軍未動糧水先行

出發前一定要準備好當日嘅飲品同糧食。行山最緊要準備好食水。而家春天,有時都分分鐘廿幾度,如果嗰日無乜風,中午時份再曬一曬就分分鐘有三十度。唔帶水行山,唔係講笑,真係死得人。

「咁又點樣預備食水?」 飲幾多水真係人人都唔同,普通郊遊,每行兩個鐘山就要預備1公升食水。如果路線辛苦,就要預備更多食水。既然要帶嘅水都唔少,買樽裝水會浪費嘅膠樽都唔少,不如用私家水樽係屋企斟定水,慳錢又環保。

行山之前唔食嘢或者食唔夠,行行下會好快無力,分分鐘會暈低。一般行山,大概每三至四個鐘要食下嘢,份量大概係500卡路里左右,即係等如兩個麪包、或者兩條朱古力、或者一個巨無霸等等。最好係澱粉質嘅食物,咁先至飽肚。


天氣不似預期,應付工具要準備

正所謂天有不測之風雲。朝早出門果陣時可能好好天,上到山可能變咗落雨;又或者超猛太陽,所以一把縮骨遮真係行山最好嘅拍檔。如果純粹係怕曬要擋太陽,其實一頂帽就已經綽綽有餘。春天嘅一早一晚仲係有啲涼,風褸就顯得十分重要。而家真係唔好咁易畀自己病呀!你明啦!


首選排汗快乾的衣服

行山好難唔流汗,最底層嘅衣物要揀布料又薄又輕巧嘅,最好係有排汗同埋有快乾功能嘅運動衫褲,而棉質就可免則免。因為棉質衣服濕咗之後乾得慢,罨住唔只唔舒服仲好易冷親。同一道理,最好帶多件快乾Tee 行完山就馬上換走件濕Tee。


少量急救用品應急

行山係戶外活動,點都要應付一啲意外,萬一跌親擦傷,就要用到消毒藥水同膠布處理傷口。如果怕抽筋發作,市面有種舒緩肌肉疲勞同繃緊嘅噴霧,好值得有支係身邊以備不時之需。記得帶多個膠袋,將清洗過傷口嘅用品或者包裝紙帶走,保護環境嘛。


行山要瀟灑 背囊不可少

行山又要帶水、帶食物、帶毛巾帶把遮同帶多件衫。有啲人又會帶埋行山杖,起步果陣又會除低件外套,一個行山背囊就會方便到大家,記得要擺得落咁多嘢至好,太細個嗰啲係無用,一般有十至二十公升嘅容量就夠。


行山多多少少會製造啲垃圾。小編長氣都要講多句,行山要帶多個膠袋袋番自己啲垃圾,帶得上山就要帶返落山。



相關延伸閱讀: 

【新手行山攻略】csl x 運動筆記 春天忽冷忽熱 行山點準備?