鹽湖比賽分享 (Part Four)

Ying Chai
發表於2018/11/13
773次點閱
人收藏
加入收藏

今日狀態好差,返到campsite第一時間拉下筋鬆返下對腳


每日我都好堅持開燼煮熱野食(有啲跑手只會就咁用涼水沖野食)暖下個胃同補充能量,早上會有杯熱飲,晚餐會飲熱湯


返到camp site 後我一直憂心忡忡,尤其好快亦已經見倒Chiara 都返左終點,同我只係相隔十幾分鐘。可能我個樣太悶悶不樂,Gurkan 主動走埋嚟問我有乜事,我直言今日狀態好差個人好快已經好攰,好擔心聽日會跑唔郁。佢安慰我話其實個個人都會一樣會有疲態,叫我放鬆就好了。諗諗下又覺得佢講得好。而加擔心咁多都無乜用,總之盡力就已經得了。於是我收拾心情,拿拿聲洗衫、抹身、做下cool down。黃昏briefing 嗰陣宣佈成績,仲總結左頭四日嘅比賽時間。咦!原來我同總成績第二名嘅Anne 相距都有1小時40分之多。連Jerome都同我講左句:You have pretty much time! 似乎只要我慢慢跑無爆的話,勝出嘅機會其實都相當大。


放鬆心情後欣賞下四週景繳,有好多lama 響度呀


搵隻lama同佢集下郵先


緊張嘅心情,又好似昊時舒緩返不少。因為下一日就跑落鹽湖了,大家都好雀躍同期待著,興奮之情亦難以掩飾,briefing 後大家仲有講有笑柴娃娃輕鬆下吹左一輪水先訓覺。鹽湖呀鹽湖, 我明天終於可以同你見面啦!!


踏入鹽湖陽光反射更為猛烈,加上高海拔下紫外光更強,大家都嚴陣以待


可能個人既緊張又興奮,我繼續唔係好訓得著,鬧鐘未響我就已經起左身。Jerome 響開賽前再三叮嚀我地要 “protect yourself from the sun”,因為 “all you can see today will be white, white and white!”,白色地嘅地面就好似雪地咁將陽光反照上嚟,加上高海拔紫外光極高,真係好容易會變左烘(火農)麵包!Jerome 亦再三強調每個參賽者都一定要全程帶住太陽眼鏡,佢話試過有參加者中途除左眼鏡,結果第二日就雪盲左睇唔倒野。響鹽湖上比賽雖然係一個難得而又獨特嘅體驗,但如果無為意比賽嘅特質而準備不足嘅話,其實亦會有反效果造成嚴重傷害的。


跑埋呢條壆就衝落鹽湖啦!


終於開跑啦~好興奮呀!!我地先由草地跑上一條石壆再跑落鹽湖;石壆有1km咁長,一路跑我個心唔知係無氣定激動卟卟卟卟咁跳得好利害;之前啲擔心、焦慮,呢一好似完全唔記得晒咁,只係知道向住前面衝出去。去到壆尾我就咁向前一大跨跳左出!好野!我終於再次踏足鹽湖啦!


由踏入鹽湖開始就似road run,大家能力差距不大大家距離好接近


爬左上去仙人掌島上面影返落嚟


即時我真係忍唔住尖叫左幾聲!之前原本有諗住keep 住什麼什麼Pacing 去跑呢30km, 不過跑到落去就忘晒形~算了!用自己舒服嘅pacing 跑吧!唔好比咁多心理包袱自己~今日最緊要唔好爆亦要留力,因為聽日嘅42km 先至係全個比賽嘅主菜。起跑初段好清涼,跑得好爽,不過之後就好考韌力了,因為之後嘅晝面都只係一大遍白色、白色同埋白色。因為只得白色一片欠缺近距離嘅座標,路標亦較遠大概500m 先有一個,跑跑下我仲發現自己原來偏離左原先嘅跑道好多要拿拿聲挨返埋去;哎呀!蝕左好多時間添!


準備日出嘅鹽湖,一片橙紅


30km後個太陽高高掛好好好曬同埋好熱,我最後決定放慢腳步行陣當留啲氣力比聽日衝


到cp 前都尚算順利,但一到cp 阿Anne 就從後趕過了我,連Laura 都只係響我後面幾個身位。果然如我所料,嚟度跑硬地大家實力唔爭太遠,加上賽左四日大家都適應晒高原耗氧,我已經無左明顯優勢,未幾連Chiara 都跑左上嚟。原先我諗住半程後可以稍作休息跑下行下,但見佢地咁貼近我當堂唔敢大意繼續同佢地keep住響附近嚟跑。半程後開始烈日當空,越嚟越乾同好灼熱,有一段時間我一度見到前面嘅畫面係左右兩邊擺(我應該係曬到有啲暈暈地),但我都唔敢慢落嚟繼續頂,直至淨返兩km到終點,我見「安全」了先慢落嚟鬆一鬆留一留力。最後Laura 第一個衝線,我緊隨佢後面,Chiara 一分鐘後亦到埗,Anne 數分鐘後也到了~女子組今日可謂由頭鬥到落尾,真係難分難解~


雖然今日唔係第一個衝線,但我確是無需要日日都拎第一名。往後只要保持jog倒同唔失太多時間,總時間我應該仍然係最快嘅一個。


唔知係咪之前嗰幾日訓得唔多,呢一晚我一訓低就好快進入夢鄉;訓足8 個鐘先起身精神真係 very good! 今日係跑最長嘅一日,總共要跑42km,差唔多一個全馬嘅距離。起步前Jerome 話女子組主要係二三名之爭,言下之意我已經一馬當先嬴左相當多嘅時間可以唔駛擔心。不過我自己就有保留,話晒自己甚至乎見過好多人跑全馬一爆起上嚟可以比平時慢左半個鐘至一個鐘不等,今日係比賽尾二嗰日實在不容有失一定要守好呢一關。今日整個目標只係唔好爆、唔一定要第一個衝線唔好失太多時間,同埋同對手保持響視線範圍之內(即係唔過500m)嘅距離就已經足夠。一起步唔知做乜好多男子組就衝晒出去,我就開住7分尾嘅Pacing 慢慢 Jog,眼尾不時望下有無女子組響我左右邊標左上嚟。結果今日Laura響8km 已經過左我頭,明顯地佢尋日拎左第一後激起左鬥心想衝返個成績;未幾Chiara 都慢慢越過左我,但佢時快時慢有時又會比我過返頭。我一直都唔心急,總之吊住佢地兩個尾嚟跑。如此一直去到 cp2 26km 佢兩個都響我前面不過500m。不過去到30km 嗰陣太陽真係好猛烈,我開始有啲跌walt,但同樣地佢地都係jog 下行下;計落數我急步行返終點都好同佢地時間唔會爭太遠,最後我決定急步下留下力衝最後嗰日。嗰陣我先發現原來我急步行都唔慢,一個鐘可以行 6km 多啲啲,我仲開住音樂一路聽住放鬆下自己,不知幾寫意~


陽光照射下鹽湖紋理好分明


有時間好得閒,拍下錯覺影片先~


今日我係第三名衝線,遲Laura 同Chiara 大概10分鐘,滿意(笑)。今日終點更加接近Saler de Uyuni 嘅中心位置,四週繼續白色一遍,好潔淨,與世隔絕,完全超自然好似跌入左第二度空間咁樣。今日跑完感覺唔算太攰,加上幾乎大局已定,所以好有心情去享受一下四週嘅恬靜。其實每一briefing 後Jerome 及醫生都會分頭問每一位參賽者是日狀態及感覺如何,今日Jerome 響我個營前問過我後仲加多左一句:“Congratulations, Jennifer!”,彷彿係預時恭賀我能夠勝出。嗰刻我真係又驚又喜,究竟我到最後我係咪真係可以嬴倒冠軍呢?


等待日出中嘅鹽湖


太陽出來了


不經不覺已經嚟到比賽嘅最後一日;今日一起身就發現個咀因為太乾燥同曬左多日兩唇腫起左(當堂唔靚女啦!)基本上呢一刻大家嘅成績同名次已經好鮮明唔駛再鬥,所以大家心情都好輕鬆。其實我計過數,就算我只係急步行,除非Chiara 佢地可以跑 6分以下嘅pacing, 否則我嘅總成績都會係最高。不過我還是選擇同大家輕輕鬆鬆一齊Jog 返終點。唔知係咪好想快啲有個定案有啲心手似箭,結果我、Chiara 同 Laura 都繼續係有啲競爭意味大家互相你推下我我推下你仲Jog 得快過啲男子組(佢地大部份響42km嗰日跑到攰晒要行下jog下),三個係都唔肯停係咁向前跑。直至最後嗰5km,真係大局已定,我先稍為放慢左個節奏,用僅餘嘅時間去感受呢個獨一無二嘅地方。慢慢地,終點個拱門逐漸呈現響眼前,嗰陣個心情真係澎湃到一個點!我拎左隻區旗出嚟,最後加速一口氣,衝過去!終於,我響天空之鏡鹽湖上完成左220km 嘅比賽啦!


感動時刻,無諗過自己能夠拎倒冠軍


唔好意思反轉左支區旗,不過我都要Post,因為我好想話比人聽香港嘅跑手都可以得o架!


衝左線之後真係好激動,我地大家都互助祝賀。Jerome 安排左頒獎禮都係響鹽湖上面舉行,佢話希望比大家一個畢生難忘嘅體驗同回憶。大會對每一個參賽者都好尊重,等齊所有人返嚟後先開始頒獎儀式,而且唔係只頒比三甲,而係不分先後地逐一宣讀每一個參賽者嘅名字同時間,最令我欣賞嘅係,大會邀請埋local helper 負責頒獎比參賽者,顯現無分膚色、無分彊界,無分階層,一起融合去成就整個賽事,大家都同等地重要。

由開始打算參加呢個比賽,足足準備左兩年。起初只係希望一盡所能唔好包尾令亞洲跑手被比下去,去到而加呢一刻可以同歐洲跑手一爭長短,成為第一個參加呢個比賽嘅亞洲女跑手之餘甚至奪得冠軍,似是夢幻般嘅意外驚喜,卻又係實實在在付出過所得來嘅成果。重遊舊地,帶比我嘅唔單止係一份回憶,更是一份信念:突破界限,打破枷鎖。凡是都有可能,最緊要係唔怕失敗盡力去作出嘗試。


延伸閱讀

鹽湖比賽分享 (Part Three)

鹽湖比賽分享 (Part Two)

鹽湖比賽分享 (Part One)