【香港賽事】渣馬、姚潔貞與主場之利

高達奔
發表於2015/02/02
839次點閱
0人收藏
加入收藏


(圖片來源:高達奔)

過去跑咗好多次渣半馬和渣10K的精英姚潔貞,今年第一次挑戰渣馬的全馬,亦係佢人生嘅第二個馬拉松(佢第一次喺日本跑,時間喺2小時58分),最後以2小時45分45秒,得到亞洲組第七名。

以香港嘅標準黎講,姚潔貞呢個成績真係好堅揪。

《蘋果日報》當日報道,姚潔貞話比自己預期嘅時間慢了1分鐘,主要因為路面不平,再加上狀態一般。「賽前我預設最低標準是一定不可以慢過2小時48分,再看途中會否有驚喜,現在出來的時間比理想慢了點。」

姚潔貞啱啱轉做全職運動員無耐,第二馬已經跑到245,距離奧運B標只喺兩分幾鐘(見註腳),真喺有些少可惜。相信喺因為渣馬太難,蝕咗時間喺三隧三橋同風阻度,如果條路平坦啲,佢應該好大機會已經達到標準嘅成績,大大增強下年衝奧運入場劵嘅信心。

香港馬拉松精英運動員其實幾蝕底,因為渣馬唔會畀到佢哋主場嘅優勢。渣馬太多上落根本唔可能做PB,而且沿途亦無同胞嘅打氣和支持,就算香港人想出嚟撐都無辦法,絕大部份嘅賽道路都喺行人止步。沒完沒了嘅公路和隧道,對曾因怕悶怕長,而唔想轉跑全馬嘅姚潔貞(見《蘋果日報》去年12月17日的訪問),更加喺悶上加悶。

正如姚潔貞於1月24日, 接受《蘋果日報》訪問時講到:

公路賽道較多上落斜及橋上風勢大,影響跑手表現,部份海外選手為求取好成績爭入世錦賽今年無參加渣馬,如要貼近國際水平,大會應增加平坦路段。

如果渣馬平坦啲,有多返少少人氣,等多啲香港人可以為佢加油,姚潔貞喺主場入圍奧運嘅機會一定大大增加。可惜,一日香港嘅主場之利形同虛設,香港嘅精英運動員要衝奧運標,只好參加外國嘅比賽了。

祝願姚潔貞唔單止達到B標,連A標都達埋,攞到2016年巴西里約熱內盧奧運馬拉松嘅入場劵。亦祝另一精英周子雁加油,同姚潔貞雙雙殺入奧運馬拉松!