【渣馬】渣馬吔蕉 熟可忍生不可忍

高達奔
發表於2015/01/30
2,093次點閱
0人收藏
加入收藏
(圖片來源:主場博客)

多又如何?DLS,有一半都喺生嘅!

話說上上回高達奔片渣馬,竟然畀無電解質嘅蒸餾水,但意想唔到咁唔專業嘅安排,竟然都有跑友撐,仲話有Sport Drink同其他食物呀,無人叫你全程飲蒸餾水喎,況且你畀乜水都有人飲唔慣啦!


既然你都承認,唔可以全程齋飲蒸餾水,咁點解唔一開始就用礦泉水呢?渣馬嘅補給份量出名少,如果唔好彩Sport Drink無晒,食物又無晒,大家侷飲蒸餾水,咁咪好大鑊?點解仲要不必要咁,增加跑友水中毒嘅風險呢?


就攞跑界最高標準--波士頓馬拉松呢比,人哋沿途一樣有Gatorade,仲有Power Gel派,點解波馬用嘅係Poland Spring礦泉水,唔用蒸餾水呢?


就喺呢啲盲撐渣馬嘅跑膠,縱容渣馬長期是是旦旦、習非成事,就連派乜水呢啲最基本嘅ABC,都係完全錯晒。


*******


渣馬水唔識派,連食都喺一樣。年年一係得蕉皮、一係得生蕉。多得上年剷得勁,又畀人踢爆渣馬義工偷生蕉,渣馬今年終於唔敢再孤寒,放咗大量香蕉喺水站:



(圖片來源:主場博客)



生嘅,唔止一半,應該係超過一半,但係呢個水站,至少可以自己揀條熟嘅食。


(圖片來源:主場博客)


不過去到呢個站,個領導耍大牌,唔畀跑手自己揀,仲寸要自己揀的跑友「嫌污糟可以唔食」!

無得揀最大嘅問題係,你一定畀條生嘅我!


(圖片來源:主場博客)


朱古力站,渣馬維持一貫小家孤寒嘅作風,講明每人只可以攞一條,驚死你食咗佢隻車。



(圖片來源:主場博客)

搞咗十九幾年,號稱所謂盛事嘅渣馬,連準備入得口嘅蕉呢啲基本工作,都仲喺完全失敗。渣馬,你知唔知個恥字點寫?