渣馬賽道微小(笑)攻略

William Leung
發表於2017/02/10
4,881次點閱
0人收藏
加入收藏

(圖片來源:123RF)

孫子兵法十三篇中,有兩篇都談及地利,事前掌握地利,對行軍取勝舉足輕重。渣馬號稱魔鬼賽道,其困難在於變化多端的路面及上落斜。筆者跑過三年全馬,嘗試整理一點心得,比首次挑戰同學有所準備。

10K
先聲明,我係屬於跑10K有經西隧的年代,惟一一次跑東廊好似係20世紀初既事,印象很模糊,中招者自負。XDDD
- 記得記得早上線~ 報名10K 有35000人,分6組,每組平均5800人,我印象中當年由興發街塞到去起點,足足塞左30分鐘,最後變左百萬行。
- 路線無咩特別,上落幅不大,唔塞人係幾好做時間的,田總賽,放心一定足10K。XD
- 維園道折返點有一處小上斜,然後直衝落維園返終點。
- 起點唔好自拍了,太多唔負責任既跑手,人多易生意外。太多人跑10K 怒衝200,頭幾分鐘打醒精神留意四週。(千奇唔好聽歌! 千奇唔好聽歌! 千奇唔好聽歌! 好重要,講三次!)
- 講真,賽道太易,無咩攻略可言,諗到咁多已經好叻。XDDDD

半馬 / 全馬
半馬路線同全馬路線有部份重覆,故可以一齊討論。(距離以全馬路線計算)
起點-4K : 尖沙咀美麗華起點至彌敦道亞皆路街轉彎位 (半全同路) 
- 此路段係暗落斜,加上起步階段有氣有力氣氛高漲情緒又high,請注意配速不要過快。
- 留意去年大會係路中心擺放大量雪糕桶,天未光又人多,小心PK。(舊年親眼見有跑手click 到飛起) 希望大會今年有改善。
- 人太多,不急於一時突破,反正3K後就會拉開,宜保留,左扭右過浪費氣力,亦容易叉錯腳扭傷。( 彌敦道好多大舊貓眼石)

4K-7K : 亞皆路街至西九龍折返點 (半全同路) 
- 左轉右轉,總次最後就係轉上西九龍公路,此處開始為半馬及全馬分隔路,半馬跑手經青葵公路直去青葵公路折返點,而全馬跑手就轉入青衣方向準備上昂船州大橋。此處幾應風,易搵人擋下風。
半馬跑青葵來回,之後可跳去西隧一段。

7K-10K : 昂船州大橋 (以下直至西隧前只關全馬跑手) 
- 迎來全馬路段第一個上斜,3K 上升50米其實不是甚麼大難關,而且初段有氣有力,應該沉著留力慢慢上。
上到橋面,咁就完成了25%路程了,昂船州大橋因為較新,路面是好跑的。

10K-15K : 南灣隧道至青馬橋
- 隧道是暗落再暗上,易均速。

15K-20K : 青馬大橋折返點及汀九橋折返點
- 青馬橋是暗上,路面比較'un' 腳,留意橋中間既駁位,頗闊亦滑腳,跑過時小心。
- 汀九橋折返點後至長青隧道均是暗落斜,放鬆步伐追回一點時間。
- 青馬及汀九折返點有大量相機,記得要醒神。
- 青馬汀九為補給大站,唔駛急於站頭取物資,小心人多地滑。

20K-25K : 長青隧道
- 暗落斜,但悶,出隧道見到葵涌,由了無人煙回到市區,覺得人生滿希望。
- 梁教練就駐守25K附近,必達同學自己執生喇。

26K-32K : 青葵公路至西隧口
- 以為出返市區就回到人間,少年人你實在太天真,太年輕了! XD
- 26K後呢4K,你見到市區但只有你係橋上跑,又好似跑極都唔見西隧既感覺太差了,沉著點吧。
- 呢段路面係微彎向一邊,留意平衡,拉路中心線跑。
- 28K 左右會撞半馬人潮。
- 未到奧海城仍然係悶。
- 去到西隧口係另一大站,有補給,有打氣,有大量相機,抖擻精神吧。
- 28k開始係落斜位到西隧口,不要心急加速,要走番均速,最多快少少

33K-37K 西區海底隧道付至干諾道西天橋
- 令人聞風喪膽既西隧終於出現喇! 以數據分析,1K 落30米再2K左右攀升50米本不是甚麼大不了。長課有走過梅子林,
或跑下西貢都足夠應付此等場面,難度係已經跑了33K後,再捱一段落斜上斜,肌肉很容易適應不了。(應該最多人係呢度拉筋....)
- 落西隧時應該不要貪心,緩慢地急步落,比時間自己調順步伐。
- 上斜用大腿,core 力量抽自己上去,碎步而上。
- 留心最易出事唔係上西隧,係出左西隧後一個大急彎再上干諾道西天橋,隨時抽筋。西隧出口 (港島) 至橋面雖然只有數百米,但此段路質素極差。

38K-40K 干諾道西天橋至龍和道
- 上到橋有一個水站,回下魂。
- 橋面都係爛路,合埋眼跑過算啦。 (粗口兩句少不了)
- 留意由海邊吹埋來既風,舊年幾乎人都吹起,不過去到呢刻都係硬食。
- 龍和道仲有一個落斜上斜......唉......(不過亦有大量相機)

41K至終點 龍和道,馬師道,軒尼詩道,維園
- 由干諾道西天橋落返IFC,開始係各路市民,打氣團集中點,打醒精神地chok 吧。
- 平時跑3K 好易過,但由IFC,見到蘋果,去到會展,走上馬師道,經過銅鑼灣,呢3K 好似來回地獄又折返人間,
世上最遙遠的距離莫過如此。
- 馬師道天橋係最後一條斜路,人稱'全馬虎度門',過左呢度門,幾殘都醒一醒喇,橋下有最少30部相機,數百粉絲等緊你,呢一刻,你寧願做一分鐘英雄,都唔想做一世烏蠅嘛!
- 落左馬師道天橋,到返維園只有1K,盡情瘋狂地暴走吧,讓圍觀市民羨慕吧,你做左佢地唔敢做既事。



配合呢條片,做一次視覺模擬。
記住,之前幾苦無所謂,笑到終點先係贏家

延伸閱讀