由跑步素人到皇者初馬307

Ho Wai Kit
發表於2016/12/25
10,555次點閱
2人收藏
加入收藏
是咁的……小弟30有8,14年頭驗身發現嚴重脂肪肝。本身唔怕死,最怕老來週身病痛連累身邊人,所以痛下決心跟老婆做下運動跑步減肥。開始時極之痛苦,1k都要分開幾次先走得完。有想過放棄但心諗無理由咁衰仔講左做唔到,唯有硬著頭皮續小加上去。8個月後10k終於可以50分内完成。之後再次驗身脂肪肝被“燒”得八八九九,體重亦由最高175磅減到135磅,搞到啲損友見親我都問我第幾期……



身體健康左輕左,跑步變成習慣,個人開始對時間有要求。經朋友介紹join左啲跑友係深水埗運動場沖圈,開始接受比較有系統訓練。15年渣打半馬走154,16年PB 134。

今年渣打半馬後,希望嘗試再突破自己。不知天高地厚定下9個月全馬sub3目標。本身沖過下圈叫做接受到持續高心率走動,但年齡已高回復力不如以前,加上跑齡尚淺,如果同時“質”“量”齊加,恐怕會加重雙腳同身體負擔引致嚴重傷患,所以決定暫時放棄沖圈。訓練主要設定為強化大小腿同core耐力,係過去9個月亦達成平均月走量300k。



不過到11月中皇者全馬比賽將至,開始對自己能力有所懷疑…… 成日問自己:每月平均走得300k,啲長課普遍得28k,最長果課都係32k係咪可以完走42.195k呀?無速度訓練喎,點長時間keep住高披醒跑呀?愈諗愈驚,周圍問人意見同上網爬文…… 最後得出結論:“相信自己嘅努力,相信訓練”!

11/27適逢unicef 10k比賽取消,襯有啲狀態同天氣涷得12度,機不可失,決定走個高速啲嘅長課試下實力。慶幸25k平均披醒keep到408,總算加強返對自己信心。



比賽當日發揮大致順利,頭半132後半135。前28k有車勾,擋擋風走得比較輕鬆。28k後只剩得自己走,加上無人打氣都走得頗辛苦。至35k四頭開始發麻掉速,最後5k只能維持430-440披醒。入運動場過终點一刻,有啲唔相信可以係無撞牆無老抽情況下完成,感恩! 參考上年時間以為有獎攞但今年高手比較多,同組第六都走303,最後僅以全場18完賽。



故事至此,我都仲未有能力達到sub3。哩個係一個夢想,但我相信只要向住哩個目標繼續向前走終有一日一定會做到!



伸延閱讀