「由原點，再進跑道，望著標板的里數，從不可丟棄這白布....」頑張是一首歌，同時是一個跑會，更是一種堅持與精神。「頑張跑會」由本地搖滾樂隊 Kolor 主音蘇浩才（Sammy）和本地越野跑精英兼港隊代表「阿歹」謝覺偉共同創立，二人希望號召更多人感受跑步的樂趣；跑會不知不覺成立 3 年，由起初數位到現在近百人浩浩蕩蕩在深水埗運動場團練，Sammy 強調跑會創辦初心從來未變：「頑張之所以冇 IG 冇收費冇入門門檻，都係希望來到的朋友真係為自己而跑，冇任何壓力包袱或者商業性質，just running，nothing else！」
圖片由被訪者提供
| 頑張精神 |
Sammy 強調，最初跟「阿歹」一起創立頑張跑會，除了希望大家體驗跑步樂趣之餘，更能夠凝聚大家一起努力突破自己：「我哋特色係唔逼人跑嘅，係 enjoy 開心為主，成件事係無壓力嘅！」他感恩地分享，過去 3 年最深刻的，莫過於是團員的堅持跟努力：「在跑步及訓練的過程中，親眼目睹大家的改變真係可以話好安慰！雖然當中有朋友未必能夠經常出席，但無論大家去到邊度跑都好，大家的心態都係一樣，一樣咁喜愛跑步就足夠，呢個就係我哋嘅頑張精神！」
圖片由被訪者提供
關於「頑張」兩字，Sammy 道出背後的小故事，對他們有特別感情：「我哋有隻歌叫『頑張』，呢兩隻字係梁柏堅贈予我哋嘅，當時我哋收到都唔知咩字嚟，佢話係日文漢字嚟嘅，代表「奸爸爹」，即係加油嘅意思。」Sammy 後來想造一件跑衫給自己，立時想起這兩個字：「其實一開始只係想自己著，想造一件跑步嘅衫，其實全部嘢都係呢件衫開始嘅，因為呢件衫呢我就認識咗好多朋友，包括阿歹，都係因為呢件衫串連起大家嘅緣份，咁就開始一齊跑步」
| 頑張的一套我做到 |
一起去過多年，Sammy 坦言感覺就好像跟跑會跑友一起成長似的，跑會亦多次組隊參加本地及海外大型賽事，他坦言自己跑步及追求目標跟 3 年前亦有一點點的分別：「心態上的確有改變，宜家盡量唔好訓練到受傷為目標，始終感覺現在 recovery 到冇以前咁快，不過我諗身體調整都係一個好正常嘅週期，無論點，可以跑已經係好幸福嘅事。」
資料圖片
一個人可以跑得很快，一群人可以跑得更遠！Sammy 感恩表示，很感激所有曾出現及參與頑張跑會的跑友：「特別希望多謝所有嚟頑張嘅跑友，大家無分你我互相幫助，一齊跑一齊進步，在繁忙與勞累的生活中要攞出幾個鐘頭時間一齊運動的確係唔容易，所以一定要多謝大家先！」
圖片由被訪者提供
| 約定大家 四週年再見 |
眼見頑張跑會的突破和樂趣，同時令跑友也不斷進步而變得強大，就像看着初生嬰兒學走路般，如今更毋須再「獨個去對抗碉堡」，因為身旁已有一班好跑友共同進退，令 Sammy 甚是鼓舞！他形容見證跑友各種改變，猶如「睇住仔女出人頭地嘅一日」！展望將來，他直言覺得頑張現有的規模已經係最好丁可以及最純粹：「頑張之所以冇 IG 冇收費冇入門門檻，都係希望嚟到嘅朋友真係為自己而跑，冇任何壓力包袱或者商業性質，just running，nothing else。」
圖 / ig@sammysokolor
「頑張って」跟粵語「奸爸爹」三字的發音很接近。是替人打氣、努力的意思。如果有去過日本跑馬拉松的朋友，就一點都不陌生，在賽道旁的觀眾不停的叫著「頑張って」，為跑手打氣，大家聽到了也會燃起以頑強的鬥志向著終點奮力向前。頑張三年，初心不變，Sammy 強調：「堅持永遠係最難，請大家為自己嘅身體繼續堅持下去，約定大家四週年再見！」
採訪及撰文：TC
圖片由被訪者提供
此文章由「香港運動筆記」最初發表於 https://reurl.cc/AMm8ge
