上周紅館舉行的香港公開羽毛球錦標賽，「鄧謝配」直落兩局不敵中國組合 4 強止步，完成二人最後一次香港公開賽。賽後，「鄧謝配」異口同聲表示不捨，其中謝影雪亦特別在社交平台發文，抒發自己運動員生涯對香港公開賽的特別感覺，以及感激香港球迷不離不棄，熱烈打氣的難忘片段。
圖 / hkbadmintonassn
| 感激球迷伴奏式支持 |
「每個運動員生涯都有個期限，最後一次出戰香港公開賽，踏出場一刻，原來自己都好希望呢一場比賽沒有限期...」謝影雪表示，2006 年第一次參加香港公開賽，自己當時仲係甚麼都不知，白紙一張，以一股傻勁走上賽場，轉眼間就去到最後一次參賽：「時間過得真係好快。由以前開始打波時完全無人認識，未必有人記得我嘅名，到今日全場拎住我同俊文既應援打氣，個感覺好神奇，從來無諗過自己可以有呢一日、呢一個畫面。」
圖 / hkbadmintonassn
4 強不敵中國選手行人止步，對於最後一次主場作戰，謝影雪跟拍擋鄧俊文都表示非常不捨，謝影雪接受訪問時感謝球迷支持之餘，更希望他們繼續支持年輕港將。「這是我們最後—次主場作賽，真的不捨得，感受到全場都支持我們，氣氛極好，好像去了演唱會，只差沒有熄燈開閃燈而已，令我們很感動，希望這熱烈的支不會因沒有了我們之後亦消失，而是繼續支持年輕港將。」
圖 / hkbadmintonassn
她表示，小時候打波總覺得好似係自己一個打，近幾年比賽，就好似全香港球迷一齊同他們上場一樣，每一球都有打氣聲去「伴奏」。「完成比賽後，終於可以抬頭望望大家，感覺大家都好似我哋朋友一樣，一路行一路同大家揮手告別，其實心入面好唔捨得大家。但自己亦會好好記住呢一個畫面，將來一定係人生入面一個好窩心的回憶。」
| 感激何一鳴循循善誘 悉心指導 |
回憶過的的一星期賽事，謝影雪表示每晚打完比賽後，跟俊文都忙著跟教練總結、治療，但球迷就一直係場外等，知道大家都是放工趕過來，又累又熱，但都一直堅持等他們。「雖然頭幾日因為要趕住番去休息，只可以同大家影一張大合照，但大家都無怪責我哋，好愛錫我哋，真係非常多謝。」
圖 / hkbadmintonassn
此外，她特別提及，這次除了是自己跟鄧俊文最後一次香港公開賽，同時也是總教練何一鳴帶領他們最後一次的比賽：「好多謝 何 Sir 咁多年來教我哋嘅所有事，除咗打波外，亦教識我哋好多做人道理，令我學識要做一個成功運動員之前，先要做一個好嘅人。自己都算係比較叛逆嘅運動員，多謝何 Sir 從來無放喺心上，仲處處為我地著想，多謝何 Sir。」
最後謝影雪再一次多謝大家，多謝紅館呢個夢幻嘅舞台，更笑言原來除歌手外，紅館都可以為運動員帶來美夢。「希望大家以後嘅香港公開賽，都會繼續支持我哋每一位香港球員。」睇一場少一場的「鄧謝配」下周將轉往常州參加中國公開賽，同時月底的澳門公開賽他們雖列為第 1 種子，但他們仍未決定是否出席。
此文章由「香港運動筆記」最初發表於 https://shorturl.at/qxyby
