昨日早上演的港珠澳大橋香港段半馬拉松，39 歲著名長跑好手陳家豪重披港隊戰衣領軍，伙拍 4 位高徒出戰，結果家豪以 1:18:48 衝線，在兩名「徒弟」兼港將迎接下完成港隊生涯最後一戰。賽後，家豪在個人社交平台以長文剖白近 24 年運動員歷程的高山低谷，亦正好以文章為自己港隊生涯作一個小總結，文章獲家豪授權轉載。
| 有今生無來世 |
容許我寫下自己的虛榮嘢，24 年我代表過香港大約有 24 場比賽，9 次破香港紀錄，2005-2013 連續 9 年入選香港隊。
高峰時期 2006-2009年/2019-2021年
今日呢一場（11 月 19 日港珠澳大橋香港段半馬拉松）99% 係我最後代表香港比賽，但唔係我最後一場比賽，我都會參加比賽玩下。
圖 / CHAN KA HO 陳家豪 facebook
其實由上年開始真係無諗過我可以再代表香港跑比賽，上月收到通知真係想喊出嚟（有個不知名嘅電話打電話嚟，以為騙案，對方未講嘢，我已經同佢講唔好再呃我啦，拜拜，原來田總打俾我確認我入選香港隊，他們立即用私人電話打俾我先知原來頭先不知名電話係佢）。我真係好幸運，唔知用咗幾多幸運先可以有今次香港隊呢個組合，香港隊成員其他四位（張耀樑、莊司暘、湯樂愉與曾曉彤）都係我嘅團隊，能夠和學生們同一HK team, 仲要係三代人（80 後 90 後 2000 後），真係有今生無來世。在我跑步生涯高峰的時候他們只是得十歲八歲的小朋友，今日我的告別戰有他們在一起戰鬥別具意義。
圖 / CHAN KA HO 陳家豪 facebook
要數到我對上一次代表香港應該係 2013，足足十年，2013 年尾超級fit，但受傷了，一傷就兩年幾
2014 受傷
2015 受傷
2016 復出入返香港隊（無代表出賽）
2017 年個勢都唔錯，贏左幾個田總大賽
2018 年生咗瑤瑤狀態沉一沉
2019 年唔甘心，好想做到最好及入選一次香港隊先退役，年尾10k 破 pb 30:57
2020 年 5000m pb 14:58, 10000m pb 31:08 ，其中一萬米的成績更入選左香港主辦既亞洲越野賽，可惜疫情取消了，又一次錯過無得做香港代表
2020 至 2021 年真係好 fit 可惜無比賽，原本計劃一場半馬場一場全馬靚仔時間就光榮退下來（真係比疫情打低我啦）
2022 年心態開始頹廢下來，加上身體健康有少少警號，無咩點練強度，但係爛船 3 分釘，多謝@Ekiden 安排去日本跑半馬，又意外pb 1:08:39(馬後炮：我最高峰時目標 1:06 尾 1:07 頭），就係呢場比賽令我入選今場東亞半馬錦標賽
| 不完美但圓滿 |
2023 年又係狀態低沉及傷患年，跑一日抖幾日，以為好返又再痛，中左 Covid 抖左成個星期無痛，跑幾日又痛返，好飄忽，直至 10 月底收到通知入選香港隊，立即操練，去睇物理治療睇脊醫，做埋我最驚針灸，多謝 Angel Au， 舊患越來越好了，但係心急操練，休息不足，肌肉又拉親，又係練下停下………加上本身11月真係好忙，舟車勞頓好頻撲，比賽前幾日都做唔好準備。
圖 / CHAN KA HO 陳家豪 facebook
到比賽（港珠澳大橋香港段半馬拉松）熱身時都有啲緊緊的感覺，做唔到我平時舒服既跑姿，同埋一開始又興奮狀態衝咗出去，超出本身能力，好快出酸，而路段好挑戰，唔係好斜但係暗上暗落我真係無力上斜（以前當平路，依家真係搞唔掂），一路係咁失速，最後追返一起步跌倒受傷既魏賡，一齊跑返終點。時間真係唔好，仲差啲比貞哥（姚潔貞）追上黎，有一刻諗過不如一齊同貞哥衝線由佢陪我完成香港隊使命應該最好不過，但係今次我係香港隊，如果我咁樣做嘅話呢真係比人鬧，唔好諗啦，有魏賡都好呀頂住先啦。今次唔完美嘅係，從台灣回來兩日既湯樂如（湯樂愉），因為甲型流感參加唔到比賽，唔能夠齊齊整整一Team 人出賽。
最後多謝隊友，多謝香港田徑總會，多謝一直支持我現場同我打氣既朋友
雖然唔完美，但我都覺得好圓滿㗎喇，我係一個好幸運嘅人，多謝晒！
