每逢放榜，每個應考生都處於人生迷茫階段，對未來感到忑忐不安，對每個選擇都充滿恐懼，香港一名年輕跑手放榜後決定暫時擱置學業，毅然決定用剩餘的時間「搏一鋪」，即使失敗也不會有遺憾，這名跑手的名字便是鄭文皓。鄭文皓早前於 7 月1 日的澳洲黃金海岸馬拉松以 1:10:21 打破香港青年 U20 半馬紀錄，讓我們一探鄭文皓比賽過程和未來目標。

圖：鄭文皓

向著目標全速前進

鄭文皓從去年起便決意要打破 U20 紀錄，本來以為今年二月的香川丸龜國際半程馬拉松大賽能破紀錄，但今年頭起身體接二連三發出休息信號，即使出賽亦發揮麻麻，雪上加霜的是身體因訓練過多而產生勞損，唯有減輕訓練時間梅花間竹地跑。「不斷同自己講訓練上要沉住氣，唔好 overtrain。」食物方面亦有嚴格自律，戒垃圾食物，主要吸收碳水以及蛋白質。

鄭文皓接受運動筆記訪問（攝：Bang Tsang）

邊度跌倒，就喺邊度起返身！

鄭文皓之所以選擇黃金海岸半馬，一方是因為比賽時間適合，「黃金海岸既起跑時間係 6 點 15 分，唔同日本嘅半馬比賽 10 點先開始。」另一方面亦是因為天氣及賽道較有利跑手發揮實力，天氣清涼路段平坦，幾乎沒有上落斜，他直言：「嗰邊天氣舒服好多。」不過再挑戰黃金海岸半馬還有個最重要的原因：「最重要係上年差少少就破到，今年想係同一個地方做到。」

鄭文皓回憶起黃金海岸馬拉松（攝：Bang Tsang）

相比起香港的濕熱天氣，比賽當日澳洲氣溫清涼乾爽，溫度約 12 度左右，天時地利都眷顧他，儘管準備得不充裕，但也唯有頂住上：「由準備到比賽個日，我只係跑左一課強度咋。但上得起跑線，我當自己贏咗，冇得驚咁多，就盡全力跑。」

鄭文皓跑步的相片（攝：Bang Tsang）

「豁出去」

上年比賽初次參加黃金海岸半馬，鄭文皓的心態較為保守，「唔敢跟第一個女仔」。可能因為這次心態與覺悟都和上次比賽不一樣，比賽開始不久進取地跟緊著現美國半馬一姐 Keira D’Amato 。他回憶起當時情況：「跟咗 2.5K 左右就感覺唔到路，比每公里目標 pace 快 10 秒。」大約到 2K 至 3K 便跟不上。「去到 5K，10K 見到個鐘 16 分正同 32:40 都好驚訝。」因為他 10 公里的最佳紀錄為 33:55 ，這次比賽 10 公里比他最佳成績快 1 分 15 秒！

鄭文皓正面跑步（攝：Bang Tsang）

「跑完半程開始好攰好辛苦。」時間快亦有其代價，臀肌及大腿後肌抽筋，儘管如此他亦咬緊牙關不放棄，他想以成績回應眾人的期望：「冇諗過上岸，因為我好想做到，同埋我知道教練同女朋友今次專登飛過黎，我唔想再令佢地失望。」最終用盡全身力氣以 1:10:21 衝線，達成自己心心念念的目標。

鄭文皓衝線一刻（圖：鄭文皓）

差啲平紀錄？ 

「我唔記得（U20）個紀錄係幾多秒」。當時間到 1:10 跑到最後的大直路時便著急地跑回去，他回憶道：「我一路都記錯紀錄係 1:10:23，衝線時看見1:10:23 - 24，就即刻好驚，最多都是平紀錄。」頓時腦海閃過許多念頭，深感不安。「謝俊賢即刻過嚟安慰我，點知教練就大叫我破到。」才懵懵懂懂知曉自己破到紀錄。

圖：鄭文皓

想繼續打破極限

「我今年好任性咁放棄左學業，放榜個刻就放棄左學士學位，想比最後一年 Junior 睇下可以行到幾遠。」他認為這個決定經深思熟慮，畢竟一旦錯過這一年便沒有以後，最後 5 個月，他希望能破同門師兄 10 000 米及 10 公里的紀錄。「既然有一個目標，就應該毫不保留咁博一次。」

鄭文皓平常拉筋動作（攝：Bang Tsang）

「我知道上咗公開組嘅競爭會大左⋯⋯我覺得自己已經準備好，有更多係我實力之上嘅人先容易推動到我進步，我知道大家嘅目光應該放遠啲，唔止局限香港。」鄭文皓希望未來仍能繼續享受跑步，他認為必需眺望更高處才能進步，但亦不應忘記初心：「唔好忘記自己嘅初衷，唔好放大一時嘅失敗。暫時只係想做好運動員既角色、PB、接近亞洲同世界水平。」

鄭文皓與教練的合照（圖：鄭文皓）

假若鄭文皓當初沒有毅然擱置學業，假若他沒有跟在 Keira D’Amato 身後，可能那天他就破不了紀錄，為了夢想而卯足全力暫時放棄學業，可能將來會後悔，但鄭文皓抱著赤子之心追夢：「我諗呢啲就係青春，即使失敗，都唔會有遺憾。」

（攝：Bang Tsang）