2016年12月31日，對好多人黎講，係一個準備慶祝的日子。但對我黎講，卻係一個緊張的日子，皆因小弟會參加一個對自己體能黎講係一個極之受考驗同嚴峻的越野跑比賽，全長115公里，基本上係圍著個大帽山咁跑（或行）。起點為荃灣荃景圍遊樂場，途經：石龍拱、農場鮮奶、大欖林道、深井、大棠山路、大欖涌道、藍地水塘、公庵山、大棠、四排石山、掌牛山、井坑山、蠔殼山、蓬吉鄉、雞山嶺、打石湖、北大刀屻、大刀屻、嘉道理農場、四方山、碗窰、草山、最後在火炭為終點。

基本上，在難度上，賽道可分為三部份。第一部份由起步點至大棠，第二部份為四排石山、掌牛山、井坑山、蠔殼山，第三部份為蓬吉鄉、雞山嶺、打石湖、北大刀屻、大刀屻、嘉道理農場、四方山、碗窰、草山。

第一部份，基本上好多都係平路，當然有上上落落的斜路，但幅度不大，問題係兜黎兜去，兜到我頭都暈埋。當我們在荃景圍起步後，我用了差唔多2小時到達CP1農場鮮奶（比預計快了半小時），初初我還以為我們一眾參賽者會到達農場鮮奶的店鋪為檢查站，但原來係廁所隔離，不過都好，可以讓我們解一解決、洗洗面。也可以品嘗到免費的農場鮮奶。原本我唔想飲的，因為驚之後落黎既時間會搞肚，但咁遠黎到，點都要試少少，好彩之後都冇事。CP1我只停了5分鐘左右，就繼續我的前進。離開農場鮮奶站後，天已黑齊，開始我兜黎兜去的路程了。跟本上，我所見到路牌都同荃錦公路有關連的。到了晚上9點幾，我終於到達CP2，深井。在這個檢查站，我可以免費品嘗到深井燒鵝+瀨粉。食完、補給完就走，冇記低停留時間，不過應該冇hea。之後再上山繼續旅程，繼續兜黎兜去，會觸及麥理浩徑第九、十段、即是大家睇紅葉的地方。但當然未有耐出現，就算出現，咁黑都見唔倒，或冇心機睇。當我走到其中一段路之後，發生一段小插曲，就是突然見到前面有位師兄跌左落山，我連忙上前看，原來他太眼訓所致，但冇理由，當時只是晚上10點幾，點解咁快眼訓？初初我還以為他所走的是大會賽道（因為大會賽道成日都有大路轉入小路的），但最後先知咁大鑊。不過好在我身邊有位純粹操通宵山的非參賽者師兄幫手救援，後來知道該師兄冇事安全，才繼續我的行程。之後已經冇乜點track時間了，之後到了虎地燒烤場，見到一班人係度BBQ，我係佢地側邊經過，佢見我係參賽者，仲問我要唔要姜茶，我毫不客氣咁同佢地講：要。佢地隨即問我有冇杯，但我話係個袋度，咁佢就同我講：唔洗搵！我地有杯。然後我就可以立刻享用到溫暖的姜茶了，非常感謝當晚的師兄姐。到了CP3。喜遇跑山跑友做支援，不過唔係我叫的，皆因他們是支援他們的朋友，但見到我就唔好意思唔支援我啦！哈哈！我可以食倒愛心粥同可以飲倒可樂，實在太正了，真的很感謝我朋友既支援。之後繼續行程，當時已經是深夜，夜爛人靜，慢過我既人就繼續慢過我，快過我既人就繼續係前面，跟本上我係獨自上路，幸好有位師兄願意同我一齊行，這位師兄好好，一邊行一邊分享他的登山經歷，大家都傾得好開心，大家到了屯門徑後跟甩左（我都唔記得點解），之後的路段，我要獨自走藍地水塘和公庵山，最後到達大棠。一講到公庵山，真係印象難忘。它的路段大多都是沙石，好跣，之前練習時，我有幾個位都要請教過高手先知點上，今次都不例外。當時一邊上，一邊驚上唔倒，天又黑，我記得果時小腿有少少抽筋，在未完全抽的時候，我立刻啪左粒鹽糖，立刻冇事。到了公庵山山頂，前面有一班參賽者師兄係度“媽” 聲四起，後來知道是行最前果位參賽者師兄帶錯路（落錯山），連累一班照跟既師兄媽媽聲，我在後面知道後卻大聲講，落木梯位係前面，突然覺得自己好叻，哈哈！落山後，清晨5點到達大棠了。到了大棠檢查站後，又撞番師兄，原來佢都係剛剛到，我們還相約一齊打四個細佬，即係我之前我所提及的第二部份。續...