續（二）...

他們給我橙和咸薯粉粥，真係一個好好的補給點，他們也體貼地為我加水和運動飲品，唯一美中不足之處（亦發生係多個補給站上），就係冇可樂！幸好我想到萬德苑有可樂賣，而且當時萬德苑還未關門，所以我仲可以買倒，而且買了兩罐，每罐7蚊，真係好抵！隨著天越黎越暗，我在TTF比賽中進入第二晚了，一邊飲可樂一邊上山，雖然論盡D，但的而且確會精神D（回魂能力果然有效）！其他參賽者都著晒頭燈了，形成了上山一條燈頭，場面非常狀觀。一步一步的上，終於到四方亭了，但仍未到四方山，仲有少少上山路，我唯有繼續努力。最後終於到達四方山落燕岩果個位了，D閃燈閃下閃下好似開party咁。但我唔想開party，我要落燕岩了。呢段路係我最憎的，一來要爆林，二來又跣、三來又斜、四來又要過竹林隧道，上上落落，好煩。幸好又有參賽者同我傾計，等我冇咁悶。當經過竹林隧道時，我個頭成日撞倒D竹，撞到好痛，其他參賽者見我成日“哎呀”，佢就出聲叫我小心D。但我卻同佢地講，小心冇用，小心都會撞，我都冇晒符，撞到我個頭好痛，痛都冇辦法，條路都要走落去。係我最“低潮”的時候，後面有人叫我，原來係跑班的同學仔叫我，佢地參加的係YTF 50k賽事，佢地嘅精神明顯比我好，皆因佢地唔洗玩過夜，我地可以一齊走落去碗窑，我們終於打了三個大佬，黎到最後一個檢查站。係呢個站，我同同學仔食倒一樣好好味的補給品，就係炒麵。可能我地當時好肚餓，乜都話好味啦！我地各人都食左三四碗。食埋就上路，打埋我地最後一個大佬，就係草山。我地一步一步咁上，沿住石梯上，唔知點解我對腳好有力，上上下左腳sip左落舊石頭度，我隨即提起隻腳，連塊石頭都撬起。上到鉛礦凹後，有位義工指引我地轉左上山，當時好大風好凍，義工仍然堅守崗位，實在令人敬佩。終於到了上草山最後果段樓梯了。我同自己講，要加油。好快就打埋最後一個大佬，終於落山了。上落山路段基本上係逆走麥理浩徑第七段。好開心，雖然我地走得比較慢，但沿途仲有義工堅守崗位引路同為我地打氣加油。終於到左路口轉左落火炭既位了，我忍痛都要堅持繼續，慶幸我還可以慢jog落去，不過係好慢。終於到了火炭黃竹洋村徑，落到去村口，後面突然有五個跑手過我地頭，經了解後，原來佢地係參加UTMT 162k賽事的參賽者，我地都不甘視弱，我地都跑埋一份，爆埋最後果k佢，終於到終點了。時間用左32小時32分鐘（大會時間）。我曾經俾一些高手話我呢個時間好hea，但我問心無愧，我第一次玩，我已經盡晒力了，可以唔DQ下完成賽事。雖然玩到損手爛腳，但可以完成賽事攞到完成杯，已經好滿足了。終點可以見到火車sir，我同佢講：我記得你係雞公嶺上同我講過，叫我唔好放棄。我成個比賽都記住你講呢句說話，結果我無辜負你對我既期望。（完）