終於,一嘗了退場嘅滋味 - 初次踏足100 miles賽事,朝聖之旅 UTMB

Ying Chai
發表於2017/09/08
1,948次點閱
0人收藏
加入收藏

終於,一嘗了退場嘅滋味。初次踏足 100 miles賽事,朝聖之旅 UTMB。最後我要選擇離場退賽。


由知道抽中 UTMB 開始一直戰戰兢兢,未去到最後一刻都唔確定自己係咪真係會出賽

(圖片來源:Ying Chai)

下定決心後連番加緊練習, 經常練至通宵達旦(圖片來源:Ying Chai)

難得父母長途跋涉嚟捧場, 加強左我要完賽嘅決心(圖片來源:Ying Chai)

知道比賽時間天氣冰涼, 有助我嘅發揮, 頓時為我打左一支強心針(圖片來源:Ying Chai)


冰涼嘅天氣可謂"開正我嗰瓣",賽前亦有充分嘅休息,傷患有明顯好轉,還有阿媽預備嘅住家飯,萬事俱備。確是起步開得好順,一直有氣有力, 50km前嘅 cp均比我預期早左到達,時間鬆動之餘仲令我可以主動去揾返 d研究員做埋個測試。不過長途賽可以發生好多事,前段狀態幾好也好,未到最後一刻都唔代表什麼。尤其今次第一次玩 100  miles,我一直都有留力,加上 20km右腳膝頭外側開始有份撬下撬下嘅感覺,呢份感覺,似曾相識,響北極馬拉松都曾經出現過,所以逢係落山我都放慢只係順勢落。


雖然未係最佳狀態, 但仍會全力以赴(圖片來源:Ying Chai)

準備就緒, 出發啦!(圖片來源:Ying Chai)


只是去到 40km左右撬下撬下開始變成赤痺,去到 50km後更是變成疼痛,60km左右由山頂落山,痛楚更一發不可收拾,右腳稍為微曲就劇痛。好不容易落到65km 嘅 Cp Lac Combal,時間開始變得緊絀也好我都停了差唔多三十分鐘及按摩痛楚位置。我咬緊牙根嘗試繼續,點都捱到 Courmayeur 再看看情況如何。 但是落山,真係舉步為艱,我知有機會 cut off前都到落唔到 cp,就算落倒,往後仍有 86km,仲要係大起大落,隻腳捱唔捱倒?我不禁問自己 : 我是否需要退場?


氣温冰涼令我發揮得好好, 上山先有地有氣有力(圖片來源:Ying Chai)


身邊不停有朋友越過我,佢地都加以慰問同鼓勵。落到 Courmayeur,剛剛好一分鐘前 cut off ,我諗都唔諗標出場館。既然趕得切,就繼續看看。Courmayeur後嘅 cut off開始放緩,我企圖探試一下能否慢慢走下去。其實除左落山,上山或平路一直無問題,上 60km那座 2500m高嘅 Col de la Seigne正在横風横雪,我可以比平時更快嘅 pacing上山,仲不停越過唔少外國跑手。由 Courmayeur到 Refuge Bonatti主要為上山及平路,我仍可以追趕,更試圖偷多一點時間愛嚟落山用。只是由 Refuge Bonatti到 Amouvaz主要係落山嘅路,短短 5km,我足足用左一個小時四十五分鐘。到 Amouvaz時比 cut off早三分鐘到達,工作人員問我 : go on?  Or stop here?


UTMB 沿途景緻相當壯觀(圖片來源:Ying Chai)

行到呢度, 腳痛情況有增無減, 但見倒如此漂亮嘅日出, 提醒我要咬緊牙關繼續下去

(圖片來源:Ying Chai)

雖然腳痛令我嘅時間慢左好多, 但我不忙享受比賽, 樂在其中(圖片來源:Ying Chai)


要響 3 分鐘時間做決定,殊不容易。往後嘅天氣氣温更低,山上只係負 10 度,都唔係問題。只是要在力氣充沛下要選擇剪帶,確是殘忍。然而上到 Grand Col Ferret,打後有 10km嘅落山,我好清楚隻右腳會負荷不了。由 50km 開始痛,我頂多左 45km,我盡左力。我知沒有逞強嘅餘地,也不能愚昧一味死充。往後陸續有好多 team 嘅賽事,我亦需要對我嘅隊友負責任。我沒有 "未試過DNF" 嘅心理包袱,最後用左 30 秒時間做左個決定,好清晰咁同工作人員講:I stop here.  


最後決定退場,我感到無悔。我知道,先一定會再嚟!(圖片來源:Ying Chai)


望住工作人員剪左塊 BIB上面嘅 bar code,我沒有苦澀嘅感覺,反而覺得上左一堂重要嘅一課。唯一嘅遺憾,就係父母第一次山長水遠地走嚟睇我比賽,卻無法見倒我衝線嘅畫面。好記得一出發我轉頭同亞媽講 : 終點見啦!我亞媽仲笑得好開心不停話好。不過從當時佢雀躍嘅心情,我知佢多左一份明白,因乜解究亞女成日飛嚟飛去,仲要逢係星期六日成日唔見人,返親屋企就損手爛腳兼爛身爛世,然後仲要洗到成個浴室都係泥。佢地一向都唔理解我做乜要成日咁頻撲同攪到自己咁辛苦,今日返到民宿,佢地知我肌寒交迫特登煮定飯等埋我返嚟食,佢地不停問左我好多有關比賽嘅野,阿媽仲話 "估唔倒係咁熱鬧",我知佢地多左一份認同。我話下次揾個同樣咁熱鬧嘅比賽再帶佢地去,會近 d響日本等佢地唔駛舟車勞動咁辛苦。不過大前提要等我練好 d先,因為,我要佢地下次一定可以睇倒我衝線。


簡單d講,即係繼續要成日週圍飛,禮拜六日繼續成日唔見人……


延伸閱讀
南極100公里超級馬拉松賽後感

越野殿堂的入門體驗 101公里的CCC

殊不簡單的金牌夢

發言
還沒有人發言耶!快來當一樓!