【蝦叔周報】完全出口術指南

蝦叔
發表於2017/02/10
4,781次點閱
2人收藏
加入收藏

(圖片來源:蝦叔)

跑手啊,如果你覺得跑步真係只用一雙腿,你太年輕了。

運用語言技巧,隱瞞實情,或選擇披露部分事實,以求達到一己目的,這種行為,我們俗稱「出口術」。不少跑友,試過一兩次,收效奇彰,就食髓知味,養成出口術習慣,搞到練習用口,長課用口,比賽更加要用口。

其實出口術自古已有,歷久不衰。由大禹報稱自己唔返屋企係為治水,到現在習大大話「中國永遠不稱霸」;由伊甸園條蛇引夏娃食禁果,到現在摩連奴賽前盛讚對手銳不可擋,這一切全部都是出口術。

可以話,有鬥爭的地方,就一定有人出口術。幾萬人一齊跑的馬拉松,又點會例外?

長跑強國日本有項研究指出,馬拉松比賽前三日,係口術高峰期。網絡發達如今日,口術更加防不勝防,全面轟炸跑手。

渣馬如箭在弦,食住意粉,滑著手機,跑友左一個「應戰宣言」,右一個「光輝回顧」,戰雲密布到令你覺得自己好似去左巴格達。如果你有個假想敵的話,恭喜你,對手疑幻似真的狀態,更加會令你神不守舍。

OK,我知你好正義,不屑甚麼出口術。但所謂防人之心不可無,世事洞明皆學問,知識嘛,學定無壞,機會是留給有準備的人,您懂的。

人地都做左初一,你還不做十五?有必要時,十六都要做埋。

首階段:網上
出口術的至高境界,是盡量要令那些「關注」你的人放一百個心,以為你毫無競爭心態,在比賽時幾乎把你忘掉,閒庭信步回來,笑著問你的成績時,才知道被你擊倒了。

「沒有奇蹟,只有累積。」這句名言適用於長跑,更加適合用於出口術。

第一戰場,是社交網絡。在FB或IG發一個半個帖是沒用的,如果你不是那些撳左掣誤出一個逗號都有300個likes的KOL,你必須好好部署。

以下「組件」,建議賽前分階段搭配使用,每天都要出po,確保對手沒法看不到:

1. 相片:
診室背景,拮滿針或貼滿膠布電線的腳 / 藥丸袋一堆 / 病容照 / 慢pacing跑步紀錄 / 短途跑步紀錄 / 大堆食物

2. 文案:
跑完當贏 / 希望唔使上車 / 我仲落到場既 / 醫生話我咁樣點跑 / 我話要跑馬畀醫生鬧 / 已經係最長的長課 / 死得 / 我今次主力係想中鎗 / 一齊享受比賽! / 無練習也要加碳是常識吧 / 唔諗咁多,食左先講

3. hashtags:
#一年好快過啫 / #7分披 / #未上過車的馬拉松是不完整的 / #步兵 / #自暴自棄協會

4. emoji:
病樣 / 淚奔 / 馬騮掩眼 / 伸脷

次階段:現場
星期日,去到現場,約到對手就約,聲稱要「集郵」。約唔到就扮「偶遇」,總之點都要見到對方,畀戲佢睇,畀說話佢聽:

.扮無戴表、扮無電、扮要四處問人借gel

.扮新手、扮心神彷佛,刻意扣張號碼布去背脊(記得預留足夠時間偷偷地扣返岩)

.著厚羽絨,扮虧(視乎需要可以考慮著埋雪褲)

.搽到成面白曬扮病

.有sub 4實力的你:「你諗住開幾多?冇啦,我保守啲,六分半。」

.突然蝦叔上身:「其實跑馬點解一定要鬥快?點解唔可以欣賞下賽事(雖然係渣馬,是但啦)?其實馬拉松係一期一會......」

尾階段:終點 / 網上

如果閣下費盡心思搞咁多大龍鳳都贏唔到對手既,咁你自己面壁思過啦,可以唔使睇落去。

拿,如果你成功騙過對手快過佢,請不要忽略「善後工作」:

.對手問:「又話病既?」答曰:今日天氣好咋 / 咁岩跑跑下好返 / 隻藥膏有效 / 我搽左印度神油(雖然興奮,但建議唔好吹到太離譜,否則我驚有反效果,閣下畀人打鑊金的話與本人無尤)

.一臉誠懇:「冇啦,盡啦,跑埋今次我收山架啦。」(大阪4月7號報名,到時記住連戲,低調少少)

.搵返你對手合照出post,扮無分彼此:「大成功!大家成功逃過收容車!」

.出post,同finisher's medal合照,個樣一臉謙卑,或雙手合十。hashtag:#好彩

.如果唔想再做戲,不妨坦白:「出口術咋嘛,兵不厭詐,個個都係咁架啦!」

伸延閱讀

發言
還沒有人發言耶!快來當一樓!