講起粉腸朋友，你生命中少不免會出現幾個。呢種生物同豬朋狗友唔同，豬朋狗友會令你沉淪，而粉腸朋友往往會響你迷失既時候發揮關鍵作用，分分鐘你人生既轉捩點都係因佢而出現。

大概響2018年渣馬前三個月，有個朋友同我講，計劃響2018渣馬做BQ (波士頓馬拉松參加資格)，達標的話就可以拎到2019波馬入場券。話說呢位粉腸朋友好有毅力，2016年皇者全馬因為太搏命而攪傷左，跟住2017渣馬PW埋，之後傷患不斷，頻頻搵朱生。哈！不過佢勝在係跑界小強 (曱甴)，連核爆輻射都唔怕，點都打沉唔到佢，用左一年時間進行復仇訓練，家陣居然要挑戰BQ咁夠薑添。

「哦~ 係呀？咁你加油啦吓！」我事Q但咁敷衍答左佢。「唔係呀，你同我同年紀架嘛，BQ門檻咪一樣，一齊做時間，一齊去跑波馬啦！」條粉腸興奮地回答。

咩呀？同年紀所以就一齊衝BQ？牽強左D喎師傅….

當然呢條粉腸就緊係唔會放過我，搏哂老命咁放毒，又咩人一世物一世，點都要參加過波馬既、又咩人生無撼呀、依家唔做就冇機會架啦又盛….一大堆果d膠野。「長途耐力我係有少少，但速度不嬲唔係我強項，加上依家得番三個月時間，扣埋tapering只得兩個半月，況且中間重有美半同皇者全馬，點攪得切呀？」我真心覺得唔夠時間。

嗱，就咁，通常呢D故事既劇情，都係件蛋散朋友繼續係咁疲勞轟炸，而我又緊係跟番劇情咁落左搭啦，如果唔係又點會有呢個故事。

好！得番兩個半月咁點攪先？時間就肯肯定唔夠架嘞，惟有盡做，攪得幾多得幾多啦。首先要做既就係，cut哂我最愛既超長課同埋唔再上山，跟住晚晚走去做16k tempo，同埋我至Q憎既interval，星期六就33k長課或者21K速耐。又為左應付渣馬D斜路，要keep得住平路既pacing，走去衝梅子林，嘔哂白泡咁濟呀陰功。

唉…大佬！跑黎跑去都係城門河或者馬鞍山，最遠都係去到大埔，對於我呢匹脫彊野馬黎講，真係悶到hi hi！我好想全香港、九龍新界四圍跑呀！不過既然應承左自己要做，就點都要攪惦佢架嘞！但其實心裡面一直都詛咒緊果條粉腸朋友。

如是者一直悶蛋地訓練到12月尾，黎到左皇者全馬，就利用呢個機會試下腳，發覺速度上係提高左，但都係唔夠快，結果淨低果三個星期又死死地氣，繼續悶蛋咁死衝爛衝....

好啦！終於1月21號嘞，咁渣馬既比賽過程我就唔詳述嘞，反正都係咩都唔Q理，向住終點飛奔，斷氣？話Q之！老抽？話輪之！衝衝衝衝衝衝！總之無野可以阻到我！而途中好多老友向我打招呼同嗌加油，我都因為太集中同埋斷哂氣，所以連回應既力都冇。其實好驚大家以為我咁串唔啋人，各位唔好意思啊！

最後想講既係，雖然今次渣馬既完賽時間 (3:13:14)，並唔係D咩驚天動地既成績，但響呢兩個半月既訓練，同埋響比賽既過程中，我係冇揸流灘，毫無保留，堅係盡哂力，對得住自己之餘，亦達到今次既目標。

而好意外地，雖然今次比賽過程中咩都唔理，完全專心競賽，以為都應該冇咩相架嘞，點知搵到既比賽相，比以往更多更多，真係非常感謝各位攝影師。而響眾多比賽相當中，呢一張雖然冇chok爆pose，冇靚跑姿，冇動人情境，亦冇特別既構圖，但佢係我最愛最鍾意，感受亦係最深。

何解呢？

因為所有滿足、滿意、為自己盡左力而高興既感覺，已經完全反映響呢個....經已多年冇出現既笑容之中。

Facebook 專頁: 教主Joe Lee