環港島
兩年前第一次參加環島，撞著紅雨雷暴腰斬，跟住2020 因為疫情取消，環島大計無限期擱置，直到呢次活動，就決定要完成佢，不過最後分四次先可以完成
Day 1
海洋公園 ==> 中環 17K
貪方便跑完可以即刻走人，唔駛再搭車轉來轉去。作為新界人，呢段路其實只試過夜跑一次，今次晨跑+逆向，新鮮感100 分。
疫情下海洋公園無左一車車嘅遊客，但估唔到真係會有十幾人帶駛瑜伽蓆準備入場對住缸魚做瑜伽，証明左『魚樂無窮』呢條橋真係有收視。
鄉下仔第一次黎到香港仔見到咁樣賣魚，阿女睇相後問我點解唔買返兩條海鮮返屋企加餸？！
環島有個好好嘅規定，只要去齊打卡位影相，總距離夠數就 OK, 絕對唔介意跑跑下迷路，所以，今次就趁機會係華貴邨迷下路，迷左落去個瀑布灣公園。呢到真係幾正，望住個海或瀑布野餐應該好爽！
經過長命上落斜後，終於到達數碼港，亦都開始遇到其他環島跑手係到打卡喇！望望地圖，應該仲有一段上斜，就基本上之後係平路，不過10 月天氣都仲係好熱，再加上準備打風，太陽正正係頭頂直曬落黎，都真係好難頂。
跑跑下見到好多人影相，原來到左港鹿推介嘅港島六大其中一大@芝加哥，入面原來有古跡架。
堅尼地城補水，轉過灣就到達碼頭，阿女叫呢到做 Instagram Pier, 好明顯係要打卡，P 圖, 呃LIKE！
跟住最後係海濱直落到上環孫中山像，中環天星碼頭收工搭船返屋企。
Day 2
中環天星碼頭 ==> 杏花邨 13K
突如其來的無風無雨八號風球假期，早餐後即興決定出發，做過追風中年。
無人嘅天星碼頭，無車龍和道，無塞車嘅紅隧，銅鑼灣禮炮，沿途只得少數跑友，微雨清涼，咁好天氣唔出黎跑就真係嘥咗。
可惜北角碼頭嘅小食檔無開，少左一個開心補給站。
去到鯽魚涌海邊，明顯感受到風勢雨勢加劇，雨點打落身上感受到陣陣刺痛，還有 8 號風力的逆風跑，心中團火即刻燃燒起來，不停步，低著頭迎難而上。同時回憶起從前狂風暴雨下跑渣打，跑街馬，即刻覺得而家 d 真係濕濕碎！回憶總是美好的，不知何時才可再次比賽!
杏花邨地鐵站作為今日尾站，順道踏足杏花邨海旁@8 號風球新聞直播熱點，見證記者的辛勞，加油!
環港島Day 3
杏花邨 ==> 大潭水塘 22K
大清早杏花邨再出發，首先到達小西灣運動場打卡，然後就開始踏上龍脊之路。
大會要求其實唔駛上龍脊嘅，不過今日真係好好天，難得黎到，無理由唔上埋去姐。
落返黎石澳，就要展開漫長而乏味嘅畫青蛙腳趾之旅，無景，無風，但有太陽，真係非常磨滅鬥志嘅 9K。終於睚到大潭水塘見到條橋喇！
剩返最後 13K 就可以完環島，不過望住個巴士站(好吸引) ，又望下手錶(要趕住交人)，再望下個天(太陽係正頭頂好鬼熱)，腦中諗起大會講嘅野，『唔駛急住完成，分開幾次慢慢玩，慢慢享受！』，所以今日決定係呢到完結，下次繼續。
環港島Day 4
大潭水塘 ==> 海洋公園 13 K
都係大清早起步，而呢段第一次跑，亦真係好多地方原來未去過，新鮮感爆燈!
赤柱美利樓最入有公園，公園有北帝廟 + 千年古井。
舂坎角有鬼佬，真正住洋樓，養番狗。
小學社會科教科書見過嘅淺水灣天后像，今次終於見到真身。
疫情限聚令下，淺水灣，深水灣，咩灣都封場唔俾入，但無過量遊客嘅南灣海濱長廊又真係好舒服。
終於返到海陽公園，正式分4次環島一圈喇。
早起的鳥兒有蟲吃，跑完都未夠10:00 am，返到屋企仲有好多時間陪女溫書。
此區為網友的心得交流平台，以上內容不代表運動筆記HK立場
