渣打馬拉松2019

全馬初體驗 #What Doesn't Kill You Doesn't Make You Stronger

發表於2019/02/20
418次點閱
0人收藏
加入收藏

年年都玩渣馬,但 #今年想學人掛個牌係頸,所以手痕抽全馬組(其實想跑半馬,又點知今年個個組別都有牌拎🙈)

打開天窗說亮話,其實今次係十級淆底,因為唔知點入手,真係唔駛上垃圾車已經好開心。全馬跟毅行對我來說,是一件危險又任性嘅決定,幸好男朋友十分支持我,俾咗個好好嘅建議:「你練多啲長課啦,儲吓里數,起碼走得哂」。

人始終有惰性,渣馬前一個月都只係嘗試過一次30km嘅長課,就上戰場(仲要患感冒加左腳itb舊患)。

#人生如馬拉松

雖然狀態不佳,但我對自己講要好好享受今次初馬,要諗返當初你第一次跑10km嘅原因同鬥心。

起步頭21km,我自覺掌握到跑步嘅節奏(雖略帶保守),面上仍保持微笑。跑至昂船洲,天氣開始轉涼,又落著細雨,眼見橋邊停泊巴士上坐著披著錫紙嘅跑手,心情漸漸變得沈重,身體亦感到被風不斷侵襲,此刻,唯有心裏提醒自己不停步才不會倒下。

但最困難的階段才在後頭, #長課不足嘅報應來了,人人皆說愈接近30km,每個人必定經歷「撞牆期」。我左腳嘅ITB終於發脾氣了,雖然我從逆之女的山賽起已經熟悉它的脾性,但它竟然拉埋右腳一起作反。

我崩潰了,兩腿完全摺不起來。我跑吓又走到路旁拉臀部。每抽一下,我看見有跑手瞄一下我,那刻並不好受,好似俾定了「跑不下去」的結局。

#我不甘心,既然到了西隧橋口,為何要放棄?我不斷啪gel、啪cramp fix、不斷拉筋,無所不用其極,不能停止腳步,un都要un住行。

#下次衝線不能哭

終於挨到轉入銅鑼灣鬧市的小橋,終點在望啦😭,鬆一口氣嘅同時,眼框亦已經忍不住流馬尿,回想剛才那段起跌,如夢一場。沿途聽到街上有人叫我不要喊,繼續跑,那不絕的歡呼聲使我非常鼓動。最後1km的大直路段,我竟然忘記雙腿痛楚,保持正確跑姿,直奔維園。

#馬拉松教曉我的事

馬拉松尤如一生縮影,必然經歷甜酸苦辣,你要學會享受、忍耐、堅強,我相信跑多幾次就會有更深體會。
每一次都係一次學習。今次係要更聽男朋友話,練多d長課, #好好善待身體,下年再戰💪🏻

此區為網友的心得交流平台,以上內容不代表運動筆記HK立場