【蝦叔周報】金標?生抽就關我事

蝦叔
發表於2015/11/25
2,698次點閱
0人收藏
加入收藏
渣馬升呢金標

上篇出街之後,跑友焦點都落了在心悠那裡。有人覺得她肯跑已經不錯,即使十年無太大進境,亦毋須對伊人苦苦相逼。但亦有跑友提醒蝦叔,大家對她如此「念念不忘」,全因當年劉美人曾自稱在運動場45分鐘完成10K。這個速度,在香港分分鐘有獎攞,難怪大家「銘記於心」了。無論如何,今年渣馬心悠加油啦,大家一定睇住你。無辦法,靚女係唔易做架啦。

講開渣馬,據報載,香港渣打全馬賽事終於在2016年正式升呢成為金標賽事。即係點?即係渣馬通過左國際田聯對高水準運動員人數、參賽國家選手人數、全封閉賽道、電視轉播、比賽成績及時公告、賽道飲水補給、獲得名次選手興奮劑檢查等等項目的相關要求,男女子頭十名更將直接取得明年奧運入場劵。


(圖片來源:IAAF)


(圖片來源:渣打香港馬拉松2016)

坦白講,蝦叔知道此消息後,反應就只有一句「哦」。老老實實,金唔金標的問題與大部分跑手幾乎可以話毫無關係。蝦叔身為普通參賽者,只能比較鄙俗地關心報名費、道路安排、起步時間、紀念Tee咩樣、完成獎牌靚唔靚等問題。金標?生抽來講我知道確係好味啲既。

正如近年台灣田中馬拉松聲名鵲起,一席難求,帶動到這個彰化縣小鎮亦變得廣為外人所知,甚至商機無限。他們贏,並非靠甚麼金銀銅標,而係贏在一份令參加者覺得回味無窮的參賽體驗。口碑載道之下,話知你乜標都無,參賽席位仍然遭秒殺。

報紙話咩渣馬現在可與東京、波士頓等大賽齊名,正式係唔知就嚇死,知就笑死。當然,渣馬升做金標賽事始終不是壞事,只希望田總唔好只係識好大喜功,盲目追標。在「成功爭取」金標之後,蝦叔衷心希望他們再接再厲,搞好賽事細節,讓「金標」有朝一日變得更加名實相副,這樣才是跑手之福。

本地體壇喜事重重

本地體壇喜事,豈只金標?繼港足迫和國足、伍家朗擊敗林丹、胡兆康奪得世界賽錦標之後,連跑壇亦喜訊不迭。

周六2015東吳超級馬拉松,港將林家禧揚威台灣,在24小時賽中跑出231.369公里成績,突破自己創下的226公里舊香港24小時超馬紀錄。蝦叔計計數,林鐵人時速9.64公里,連續維持24小時,真係強到唔識講!

香港超馬名將林家禧(圖片來源:運動筆記)

至於周日毅行者,冠軍隊伍2XU UFO隊以11:58:32率先完成賽事。這是自09年改賽道以來,首度由本地薑奪魁,認真恭喜!不過賽事亦有蝦碌:頂尖隊伍善跑隊同AWOO Team Nepal疑因路標問題,走多了八公里寃枉路!蝦叔一查,發現善跑最後12:52完賽得第三(走多8K都仲要有第三),而尼泊爾啹喀兵就頭十不入,而且仲有一名成員中途退出。事後有山友就話,山賽從來唔只考速度,更考熟路,所以今次對出事兩隊來講都算係一個好慘痛既經驗。

(圖片來源:Asia Trail Magazine

文藝running log勁賣

其實每個決定跑馬拉松既人,唔多唔少背後都有些故事。遇上慘痛經驗,睇下書,或者有助療傷。有本頗為另類的跑步書,最近在美國大賣,叫《Poverty Creek Journal》。

(圖片來源:Runner's World)

作者Thomas Gardner係大學教授,而且還要是文學教授。蝦叔經常話文藝同跑步冇衝突,這位文學教授正係好例子,他曽是全馬sub-3(三小時內完成)跑手,至今年逾60,仍保持每周5、60公里的跑量。他練跑的地方,就是位於美國維珍尼亞州一條叫「Poverty Creek」的徑道。

此書之所以另類,係因為這本並非傳統教人點跑的工具書,反而係寫出自己跑步時諗乜野的隨筆。全書52章,所謂「章」其實只係一段幾句。每周一章,正好一年,全書其實就係作者2012年的每周跑步思考筆記。寥寥數語,出自文學教授之手,筆底自然文藝到震。

睇到就慚愧,我地這些凡夫俗子就算神心到寫跑步紀錄,最多都係記低衝了多少圈,天氣如何等等的枯燥資料。只想不到,跑步紀錄也可以寫得如此文藝,並且可以大賣。

此書出版於2014年尾,起初反應好一般(講真都預左啦),直至早前,專欄作家Kathryn Schulz在著名雜誌《紐約客》寫了篇文大讚此書之後,此書旋即洛陽紙貴,不少跑友與非跑友都爭相訂購。蝦叔寫到這裡亦偷偷上亞馬遜裝過,本書目前暫時賣清,你都咪話唔勁!

附:

Runner's World書評

Kathryn Schulz《紐約客》相關文章

延伸閱讀