【讀者來稿】險線人士危險操作

Shogun
發表於2022/04/26
3,152次點閱
0人收藏
加入收藏


在討論森中行者 hongkongerer 的高致命風險爬山方法之前,我先講下究竟行山、爬山(即係險線撚眼中嘅險線)、攀石之間存在咩關係,因為我發覺到其實好多人都誤以為以上三者係互不相關嘅活動而將佢地完全分割,咁樣其實係理解唔到到底咩野叫做「山」。

其實,行山爬山攀石都只係反映一個人喺山野中嘅不同地形嘅處理,我引用一下外國勢力美國嘅登山評級系統 Yosemite Decimal System(YDS)。呢個系統係用於評估行山遠足、險線同攀登嘅難度。系統中主要分為五大類,簡單啲講即係 Class 1 ~ 5 。



  Class 1

即係超簡單嘅行山遠足,唔會對自己有即時生命危險,只要自己唔好 on9 到唔帶水唔帶野食應該都可以安全落山,香港四大山徑就係 Class 1。


  Class 2

可能要用手扶下石扶下樹,要簡單 scrambling,但都一樣幾乎冇潛在嘅生命危險,例如:釣魚翁主山徑、蚺蛇尖主山徑、鹿巢石林、一啲爆林路線。


  Class 3

開始有明顯嘅暴露感(凌空感),必須要用手爬,但都算係簡單嘅攀爬、繩索暫時都未必需要用住做扶手繩,跌落山有明顯嘅致命風險。


  Class 4

暴露感(凌空感)加強,經常需要用到繩索做下扶手繩。唔難爬,但通常一fall 嘅話,都好容易致死。


  Class 5

進入技術攀登程度,繩索會直接繫上安全帶以確保生命安全,無繩嘅fall 意味著嚴重傷害或死亡。呢到會再細分為 5.4 ~ 5.15 c ,係攀岩嘅等級。



不過我地香港攀石撚就跟法國 grade 嘅,但我講上面嗰堆野又同之後有咩關係呢?喇,香港攀山總會攀石跟法國 grade ,但係以我所知,香港攀山總會嘅山藝就跟上面嘅美國 YDS 系統。

森中行者用嘅方法係,一個人 free solo 到上方 build up 一個 anchor ,然後 set 條扶手繩落去俾攀爬者扶繩上攀,繩係固定而中間每個間段都有一個扶手環(阿爾卑斯蝴蝶結)。但應用嘅地形是否適合,就存在好大嘅討論空間。

登山嘅方法同標準,嚴格上係冇最終嘅答案,只有以知識、效率、風險評估同安全性之間做一個最實際嘅考量去應用唔同嘅方法。

但暫時我睇到嘅係,森中行者自稱上過攀岩同山藝但係就好似唔係好識將山藝同攀岩教嘅野運用返出黎,而且在一個不適合的地形,用一個不適當的系統去攀爬,而當中嘅一啲錯誤操作,加上將影片放上公開平台,都好嚴重地將錯誤嘅資訊帶俾觀眾。



  沒有足夠概念去應用各種技術

其實只要有一定距離嘅 fall ,金蛇纏絲手係會食哂所有衝擊力,好大機會係會斷手。個問題就黎喇,扶手環個用途就係俾你扶住爬而唔想你纏住隻手,咁點解唔去用?呢個就係其中一個問題所在,而其實山藝除左教阿爾卑斯蝴蝶結,應該仲有好多繩結例如普魯士結、意大利半結、臨時胸式安全帶,又點解唔去應用?

又以「格仔山」同埋「絕龍谷」為例,其實當中如果攀爬者喺繩索以固定而且冇收緊嘅狀態下fall,條繩係 buffer 唔到衝擊力,個 anchor 同自己個身體係食哂所有衝擊力,冇錯又係衝擊力呀。如果個 anchor 本身已經係 set 得好差係會直接成個承受唔到爆左㗎。

唔係話你覺得自己唔係攀緊岩,所以套系統就可以亂黎,跌落地一樣會輕則受傷,重則死亡。


  地形錯判

以飛鵝山險線為例,雖然唔係全條路線都係 Class 5 ,但最難部份一定係達到攀岩級別,山藝係唔會教你喺 Class 5 繼續用呢種方法,試諗下,呢套系統存在嘅最大危險係咩?條繩需要有 Leader 去 free solo 上去 set up,先撇除爆石爆 hold 呢啲另一個更危險嘅潛在風險,單以呢個過程,如果 Leader 失足嘅話,基本上連人帶繩飛落山,其他人咪喺個崖到企左喺到?使用者又有冇考慮到呢個情況?當然啦,你話我一定唔會 fall 我又吹你唔漲嘅,不過係咪真係次次都 100% 唔會 fall 先?


  真正最大嘅危險

真正 Free Solo 嘅人,佢地通常都好清楚知自己做緊乜,因為佢地知道自己係無繩獨攀緊,佢地知自己跌一跌就死。

但係,真正最大嘅危險係唔清楚自己危險,何謂之唔清楚自己危險?即係例如 Leader 根本就唔清楚自己 build up 嘅系統有咩優點缺點而胡亂使用、follower 以為 leader set 嘅繩好安全、Leader 冇足夠嘅概念去 build up 一個良好嘅 anchor,佢地識抱石綁樹做 anchor,但佢地唔識分邊啲石抱得、樹要幾粗先用得、樹健唔健康等等。綜合以上,其實佢地嘅系統根本唔足夠 backup 到佢地嘅生命。


將影片放在公開平台誤導觀眾係另一個嚴重問題,當現場嘅 partner 都有機會俾「系統」蒙蔽左以為係好安全嘅時候,隔住個 mon 嘅觀眾又會唔會睇得更清晰?同埋「格仔山日常訓練」呢個名都夠誤導人,「日常訓練」,即係個個人都做得咁嘅意思啦?

成年人唔一定有批判思考,唔係嘅話抖陰都唔會咁多人玩啲 challenge 死鬼埋? 100 個人有一個跟左你地啲方法去玩都夠死啦?唔應該將個波射俾觀眾,咁樣係超級不負責任嘅一件事。

其實你地點玩我真係理唔到幾多,你地都係一副搏盡無悔嘅心態啦,靜靜地玩囉,唔擺上網我真係冇乜所謂。



作者:@lsshogun