前排網上有位移英港人「訴苦」，呻英國間屋太大花園太大難打理，嗰篇文章引來唔少回響，其實作為跑友由香港去到英國，我同身邊跑友都有好多「苦況」唔太習慣。

1. 無乜運動場跑400米一圈嘅倉鼠跑，英國通常都係得啲好大嘅公園，公園內係幾乎一望無際嘅草地，要搵田徑場細圈做計時就比較難。

2. 公園太少人，想好似香港咁為比賽練習攝位，係人群中左穿右插，直角假身，英國就無乜機會練到。

3. 地方太大，我係倫敦跑街跑得太遠經常會蕩失路，要開地圖搵路，唔似得香港多數地區一條路直線發展。

4. 倫敦地勢平坦，想跑下上落幾十米嘅長命斜就要專登去搵，或者要去到外圍先有，唔似香港依山而建，周圍都有大斜路。真係要搵斜路山路跑，就要揾散落四方既香港跑友介紹帶路。

5. 英國酷熱嘅日子太少，到咗9月倫敦嘅日頭已經得20度左右，想好似香港成日都有30度練下抵抗酷熱嘅能力，或者想跑到全身濕透滴水，英國得好短日子可以做到。

6. 自英國解封後，各城市賽事眾多，從fun run、5k、5 miles、10k、10 miles、半馬到全馬，搞到有報名選擇障礙，而且多數比賽都係實體賽唔係網上跑，要一take過無得斷開又無得自己揀時間出發。