Union Cycliste Internationale (UCI) and Zwift 於上月（11 月）27 至 28 日 以虛擬賽形式全球同步舉行，香港女單車手江琳首度參加單車總會舉辦的比賽，就成功入選了全球頭 50 位，更成功爭取到出戰明年 2 月 26 日舉辦 2022 UCI Cycling Esports World Championships 的參賽名額。 運動編輯團隊有幸與她進行了專訪，了解更多這位運動健將！
江琳為其中一位亞洲區女選手入選 2022 UCI Cycling Esports World Championships 。（ 圖片來源：ZwiftInsider ）
是次 Union Cycliste Internationale (UCI) and Zwift 賽事是將全球分為五大區，歐洲、美洲、大洋洲、亞洲和非洲，每一區各有男女 5 個名額。 要爭奪該區的名額，首先先分析選手以往於 ZWIFTPOWER 的表現，鑑定為 A 組選手。再要參加兩個預賽證明你是 A 組選手的能力，大會為了防止選手作弊更要求遞交一大堆資料和片段。審核完畢後，就需於 Continental Qualifier Races 與同區選手競逐 5 個名額。這個賽事與其他國際虛擬賽事一樣，選手只需於家中踏著大會認可的單車機，就可線上與其他選手同步比賽。
接下來，江琳準備出戰的 2022 UCI Cycling Esports World Championships 為電競世錦賽與平時 ZWIFT RACING LEAGUE 的聯賽不同，並無計算衝刺分數，亦都無 QOM 的分數，第一個於終點衝線就是冠軍。
江琳因為疫情的關係才開始沉迷單車機，主要用來減肥。（ 圖片來源：Kong Lam ）
疫情下先開始踩單車！？還是玩 ZWIFT ！？
疫情下，你們有沒有發掘到自己的新興趣？原來江琳因為疫情的關係，自己的工作和球會的練習都暫停了，才開始真正接觸單車運動。 她指：「呢個時候就開始沉迷踩單車機減肥，短短幾個月左右都減左十幾磅，就連全屋既衫褲都要買過晒新。之後慢慢開始參加 ZWIFT 嘅電競比賽。機緣巧合之下，現實中又識到班車友帶我踩真嘅單車，就開始真正接觸真實版嘅單車運動。」
江琳和她的車友。（ 圖片來源：Kong Lam ）
她還指：「自己之前從未試過參與過正式嘅單車比賽，只係兩年內瘋狂玩 ZWIFT 嘅比賽。」再問到她是次賽前調整：「其實，都真係零準備。 都係網友講笑咁叫我去試吓，反正對我哋呢啲業餘到不行既『師奶』嚟講都係 MISSION IMPOSSIBLE，又唔洗錢。點知咁好彩又俾我負碌入到圍。」她還笑言：「我諗最大嘅心理關口係為咗達標，好短時間要踩幾個好高強度嘅比賽，真係踩到懷疑人生。」
努力做好自我準備！（ 圖片來源：Kong Lam ）
現正緊湊地準備世錦賽
大家最大的焦點相信是落於於世錦賽的賽前準備上，她指：「我諗最主要係調整練習方針，而家基本上都係以強身健體同減吓肥為目標。不過為咗應付職業車手既舞台，VO2MAX 真係要再下多啲苦工。目標嚟講，你話要同職業車手去較量，但數據上，好坦白話你知係無可能。 不過，我都好希望盡我所能，希望跟到主車群有幾遠得幾遠。」
江琳本身是一個全職的中學運動教師，世錦賽的賽前準備應該與工作上有所取捨。她亦坦言：「我哋呢啲業餘嘅平民車手，叫得做業餘都係工作行先，興趣其次。不過，我呢個職業又咁啱同運動相輔相成，做體育老師要有一個強健嘅身體素質，先勝任到日常工作。而日常工作見到小朋友好青春咁學習同練習又可以令到我呢個老師更努力練習。 唔好話要成為大家嘅榜樣，至少我地都係一齊為各自既夢想努力緊。 比賽前，有聖誕節同新年嘅長假。希望可以好好善用推高到個訓練量，再 OVERLOAD 多啲個身體，刺激下佢成長。」
自小已是運動健將 現時因工作關係集中於足球和單車上
以前於求學時期，江琳會打手球、踢足球、打跆拳、跑山，還會參加 FULL ADVENTURE 和三鐵賽事，是名副其實的「運動健將」！
球類運動與她原本愛好的運動性質都不同，問到為何她會接觸這項運動時，她指：「喺大學嘅時候，學校足球隊唔係好夠人，牛丸（陳婉婷）喺體育館到執咗我翻去幫手踢波，一試就上癮！踢波係最講求團體合作嘅運動，同時對女仔嚟講又好有挑戰性，所以一踢就踢咗十幾年。」
江琳所屬的大埔女子足球隊。（ 圖片來源：Kong Lam ）
運動習慣可以說是陪伴江琳長大，但近年運動量大減，只剩下與大埔女子足球隊的訓練和於家中踩單車機。未知是甚麼原因減少了其他運動呢？
她苦笑指：「最主要係因為年紀愈黎愈大。後生嘅時候可以 11 點球場練完波 12 點返到屋企，1 點瞓 ，聽朝 7 點又準時係操場同學生練緊跑，但係30歲後真係做唔到。但又想繼續強身健體，就開始接觸一啲 Life Long 嘅運動，例如：羽毛球，乒乓球，游水。咁啱踩單車機既可以足不出戶，慳返好多交通時間，又係一種 Low Impact 嘅運動，仲可以隨時地享受比賽嘅快感，所以就沉迷咗。」
有問到她對足球運動與單車運動兩種運動的想法，以及如何於兩者之間作出取捨：「兩項運動性質好唔同，亦有相似嘅地方。我最享受係身為團隊嘅一份子，為大家出一分綿力，達成目標。例如︰足球我踢後衛可以幫大家解到圍，輸送到個波去前場；而單車比賽踩隊際嘅話可以幫成隊拎到一啲分數，都係好開心嘅事情。 喺可行嘅情況，都係會去練足球先，因為足球嘅場地真係一地難求。有陣時，因為工作關係參加唔到訓練就踩下單車機保持體能，希望可以追返個節奏。」
（ 圖片來源：Kong Lam ）
細數單車運動難忘經歷 年中受過重傷腦震盪 幸得隊友扶持！
對於準世錦賽選手，當然不能不向她請教運動的難忘經歷，今次她向我們分享了單車運動的經歷。她笑指：「喺虛擬嘅世界中最難忘嘅係第一次踩 ZWIFT RACING LEAGUE，我啲隊友好認真討論要著咩 OUTFIT ，我覺得自己好似去咗參加環法單車賽一樣咁認真！跟住仲畀我認識到一個 60 歲嘅隊友，仲踩得快過當時嘅我，真係好誇張。」
今年年中時江琳受過重傷，她還跟我們分享了這個驚險經歷：「今年五月發生咗一次嚴重嘅單車意外，縫咗 70 幾針仲出現咗腦震盪，我完全唔記得發生咗咩事。我有印象嘅時候已經係幾個鐘之後，之後再做咗個手術，抖咗成個月。 好感恩身邊真係有好多好好嘅同事，車友一直幫助同鼓勵我。喺腦震盪最無助就嚟崩潰嘅時候幫我禱告，好神奇，之後真係慢慢有改善！而家唔止可以踩返受傷前嘅水平， 都仲有少少嘅進步，真係要 THANKS GOD！」
『無忘初心』先可以堅持到下來！
做運動員並不容易，平台期非常容易出現！究竟她是怎樣堅持下來的呢？
她笑指自己踩單車的車齡太短，起點太低還未出現到平台期，但坦言：「我好認同，堅持真係好困難！你幻想下每日收工唔好話做咗幾多嘢，個身體都已經曬完八個鐘，真係身心疲倦！基本上真係合埋隻眼係咁同自己講我好鍾意踩單車就跳上單車機做訓練。 都係老土個句『無忘初心』！ 我係嚟減肥㗎，肥返啲衫褲就唔啱著㗎喇！ 再諗下呢一個鐘你唔係單車機其實都係拎嚟上網，咁不如都係跳上車減下肥啦！當然，最重要係身邊有好多同路人佢哋都係日日返工又會做練習，算係一個互相支持同鼓勵，所以勉勉強強都算堅持到今時今日。」
繼續做好自己本分 「以生命影響生命」！
在香港做運動員並不容易，現時江琳為全職體育老師，同時為業餘運動員，時間十分緊湊。作為一個運動健將的她竟然原本沒有想過當全職運動員！她笑指指自己並沒有這樣能力，二來當全職運動員壓力太大。她反而更享受現在以生命影響生命的工作，因為可以利用自己的「多重身份」去推動本港的運動發展，嘗試發掘更多有潛質的青少年。
她指：「而家以身作則、身體力行，繼續同大家一齊做下運動。我諗愈多同路人，自然社會嘅運動氣氛會愈嚟愈好，成個風氣唔同，先有機會真正推動到香港嘅運動發展！我諗而家個問題唔係發掘唔到，而係家長同青少年會有所取捨。小學運動玩得幾好，升到間好中學，公開試又到，顧住學業就唯有放棄運動。有時真係心都酸埋，佢哋真係仲辛苦過返工！」
問到她除了 2022 UCI Cycling Esports World Championships 之外其他的新方向或新目標，她指：「希望疫情盡快完結，可以出國參加一次真正嘅 70.3 鐵人比賽，同埋完成台灣嘅單車環島之旅。」小編亦祝願她於接下來的賽事可以做到她理想的成績，繼續「以生命影響生命」，運動表現更上一層樓！
江琳小檔案
Facebook：Kong Lam
大埔女子足球隊 Facebook：大埔女子足球隊 TPFC Women’s Team
大埔女子足球隊 Instagram：taipofc_girl
賽事資訊：ZwiftInsider
