雙坳（即麥理浩徑 3 段 - 8 段），由西貢北潭凹行去大帽山荃錦坳，我細細個就聽過呢個名（誤），我剛剛玩山嗰陣就聽過呢個名，嗰時心諗究竟幾時我先可以成功挑戰一次呢？
報了這比賽後，這兩三個月一直在努力備戰，先玩麥7 - 8（麥理浩徑 7 段 - 8 段），成績滿意後就慢慢加長，試完麥 3 - 5，跟住麥 3 -6，再跟住麥 4 - 8，中間仲有加插其他長途短途訓練。
遇上惡劣天氣 負傷繼續跑
然後今日（ 3 月 6 日），終於要嚟打雙坳呢個大佬，可惜竟然就遇到咁惡劣嘅天氣 。
8 點 05 分北潭涌起步，56 公里入面，除咗中途沙田坳 - 城門水塘呢10零公里，其他路段能見度幾乎不足20 米，三段雞公山，四段馬鞍山彎曲山山頂尤甚，能見度更加只有 5 米左右，又大風，地下又濕又有積水，快就冇可能快，只能小心翼翼一步一步行。
最後都係撲咗一嘢，成隻腳同小腿都係泥，左腳小腿仲擦損咗，跟住到獅子山嗰段，一分心又跣咗一嘢 。呢下仲甘，左手手掌、右手手踭、右腳膝頭哥都損埋，終於成身都係傷口 。我在心裡鬧自己：「千其唔好再撲第三次啦！」幸好，檢查後發覺都喺皮外傷，於是繼續行。
重新燃起鬥志 挑戰最後大佬針草帽
兩點半左右嚟到城門燒烤場，得返針草帽呢個大 boss 要打。呢個時候覺得身體情況仲 ok ，望望時間過咗 6 個半鐘，而我針草帽 pb 係 206（兩小時六分鐘），即係話只要我兩個半鐘內搞掂針草帽，就可以 sub 9 完成雙坳了，於是重新燃起鬥志，輕鬆開住 5 分披向針山出發。
天氣開始轉差 只能慢慢行
但沒料到自針山開始，天氣又開始轉差，上針山嗰陣，又濕又焗又冇風，成身好似被汗水包住一樣。差唔多到針頂嗰陣，能見度又去返 5 米左右，伸手不見五指，只能一步一步慢慢行。
辛辛苦苦去到草山，情況都係同針山一樣；去到鉛礦坳，情況依然一樣；上到燕岩頂之後，情況就更加惡劣。跟住仲衰，唔止大風，仲開始落雨，雨仲越落越大添……上草山嗰陣我已經知道 sub9 是不可能了，再加上依家落大雨，其實能順利完賽，已經很好。於是放低包袱，小心謹慎向前行。
終於到達終點 56KM完成時間09:47:23
17:45 分，終於嚟到終點，心入面有說不出的輕鬆和快樂！除咗係終於順利完賽，更加係在今日這段行程中，縱使遇到種種難關，我卻從未萌生放棄嘅念頭。
完賽時間縱使未如理想，但正如筆記主編話齋：「認真準備而完賽的滿足感，也許未必能感動別人，但一定感動自己。」
//