【麥徑FKT】聰 Sir 過程分享 - 為何當初會挑戰 FKT ?

Wong Ho Chung 黃浩聰
發表於2020/12/05
1,523次點閱
0人收藏
加入收藏


FKT - MacLehose Trail  挑戰成功
一個人的麥徑挑戰,但我並不孤單,因為我知好多人留意住挑戰進度,所以我一邊跑一邊發咗好多動態時報,比多啲人睇到 FKT Self supported 嘅玩法同過程。

原來⋯麥里浩徑真係足 100 公里,我仲度到 4890 米攀升。整體黎講,麥徑全走同毅行者路線有9成相似,但麥徑難少少,主要係距離攀升多啲,加上最後 8 公里全平嘅引水道很折磨。

最好玩嘅地方,係經過鋪頭要拎錢買野,或者取用天然水,而呢啲路上嘅資源往往難以預測,今日遇到幾個 case 分享下:

- 去到西灣時,因為太早士多無開,最後搵到一間,但搵唔老闆俾錢
- 去到水浪窩,八達通嘟唔到,浪費左啲時間
- 上馬鞍坳,跌爛左個樽,漏晒啲水,當時只剩低一枝超濃縮運動飲品,唔可以直接飲。之後要控制住強度,減少水份流失,直到1.5小時後到達基維爾裝溪水。中間經過一條溪,但嗰個水質確實唔放心取用
- 鉛礦坳,水機水又售罄

聰 Sir 全程自行補給 ( 圖片來源: Wong Ho Chung 黃浩聰 Facebook )


不過我都安慰自己,咁先係越野跑,唔好埋怨,懷住樂觀心態解決好眼前問題。

我係 0630 啱啱日出時出發,最後 1708 日落前走完全條麥里浩徑去到屯門,挑戰成功
完成時間:10:38:08
分段時間:
北潭涌>北潭凹2:16:00
北潭凹>荃錦坳6:27:00(8:44:00)
荃錦坳>屯門1:56:08(10:38:08)

Strava 紀錄連結 

最終以 10 小時 38 分 08 秒完成麥徑 FKT ( 圖片來源:Wong Ho Chung 黃浩聰 Facebook )

圖片來源: Wong Ho Chung 黃浩聰 Facebook )
感謝 THE PEAK HUNTER 全日追蹤進度 The North Face Adventure Team 派出強大攝制隊,期待後製紀錄片。

FKT 原意鼓勵採用有特色路線,吸引其他人重覆挑戰。期待下一位能夠劃破紀錄嘅香港年輕跑手出現

FKT有感
運動員生涯好短暫,今年,眼見好多唔同項目嘅運動員相繼退役,我又能夠做點甚麼呢?

於是係 5 月,炎熱嘅夏天,疫情緩和時,發起 #HK360Challenge,當時幾十人 Full Supported 幫助我環繞香港跑左360公里。

寒冷嘅冬天,嚴峻嘅疫情及緊張嘅限制措施,我選擇 Self-supported 一個人挑戰全走麥里浩徑 #FKT

其實8月嘅時候,Tony 向我提議 FKT,一齊搜集資料,並開始籌備,仲將Strava改埋名,搵路線進行測試。但一個突如其來嘅嚴重扭傷,當時傷到連行都行唔到,見著狀態倒退,距離目標越來越遠了,令我所有計劃同期望都落空。係 10 月見到小強打破衛徑紀錄時,心情真係好興奮,仲曾經一度發文宣佈挑戰麥里浩徑,但當時傷勢根本未康復,最後只能刪除貼文。

對比之下令自己更失落,因為自己想跑但跑唔到 但繼續耐心地等候,尋求朱醫師針灸治療,亦定時食骨膠原產品促進康復。慢慢地,我可以跑得返,進行咗 5 次 50 公里訓練,而10 公里時間更跑出 PB 34 分 43 秒  但同時又犯下另一個低級錯誤,FKT 前 5 日受邀請下去踢足球,又再次整到傷患⋯

雖然我經常面帶笑容,但有一些壓力,有一些痛苦,只有自己才知道,或者還有太太 Viann都知道。

聰 Sir 太太 Viann 在終點迎接聰 Sir ( 圖片來源: Wong Ho Chung 黃浩聰 Facebook )


我都曾經埋怨自己唔夠完美,但越野跑教識我世事沒有完美。就好似山路本身就崎嶇不平,無辦法期望好似平路一樣平坦,係山路上你每踏一步,都一定有改善空間,亦無可能係100公里路上踏出完美的每一步。更重要係用咩心態去面對唔自己完美嘅時候,如何找出當中嘅平衡,盡力將自己發揮到最好。

今次 FKT 麥里浩徑挑戰,持續幾個月的掙扎,再一次引證 ” 你的心態如何,你的境界也必如何 ”,我學懂很多,感恩感恩

相片: Calvin Cheng

來源:Wong Ho Chung 黃浩聰 Facebook