「吳師傳」的原名是吳輝揚，這個稱號竟是由港姐兼藝人蔡思貝替他起的。追溯起來，是當年仍在紐西蘭留學的蔡思貝趁暑假返港渡假期間，跟隨吳輝掦學跑步而改的。活潑調皮的蔡思貝一見到他便叫「師傅！師傅！」。初初聽她和其他學員叫這稱號，他有點不習慣，心諳自己又不是全港跑步最快的人，似乎擔當不來。不過，久而久之，越聽越順耳，他笑言：「依家個個都唔知我叫咩名了，其實我叫吳輝掦。」提起蔡思貝，吳師傅記得當年她只有 15、16歲，常蹦蹦跳，動若脫兔。

2007年吳師傅與蔡思貝的合照

吳師傅對她讚不絕口：「她肯練習，捱得苦！試過脛骨發炎，她仍忍痛訓練。」吳師傅還道：「唔係我馬後砲，當年我已看準佢會當選港姐，因為每次帶佢出外比賽，其他男仔總係眼定定望住佢。」當時年紀輕輕的蔡思貝，跑 10 公里都只是 45 分鐘左右。

2018 年渣打馬拉松和蔡思貝 Sisley 一同参與半馬拉松 蔡思貝在忙碌下訓練 4 個月跑出 1 小時 47 分的成績

初中時，吳師傅鍾情踢波，並入選校隊，當年要入足球校隊是需要具有一定的競爭力。後來，他又跟鄰居去參加田徑班，可見他十分喜愛運動。入了訓練班後，他發現自己長跑比短跑優勝，「跑 100 米，總是差人哋少少，人哋跑 12 秒頭，我就 12 秒尾。」反之，長跑計時比賽的時候，由政府大球場外起步，棉花路 > 東華東院 > 印度遊樂會 > 紀律人員中心，他次次都是第一個回來。中二的時候，教練幫他報名參加 1500 米學界公開賽，中一至中六生都可以參加。「我無諗過竟然攞到銀牌，輸咗畀一個讀高中嘅校隊。」證明吳師傅在長跑方面確有天份。

1980 年，年僅 20 歲的吳師傅正式加入南華會田徑訓練班，開始中長跑的運動員生涯。「現實係，畢業後進入職場，約齊腳踢波唔易，最多星期六或星期日先可以踢，平日難以練習，點樣取得好成績呢？」取勝心強的吳師傅於是轉戰跑步，「跑步比較個人，練習時間嘅彈性大好多，可以俾我去追成績、追高門檻比賽同埋追代表……」「仲記得第一次參加嘅長跑公開比賽係柴灣環島賽，由柴灣足球場起步，跑上山再落番嚟，當時香港人少車少，較容易安排封路。呢個係我全港公開比賽第一個奬。」之後吳師傅不斷參加各項長跑比賽，包括懲教署部門陸運會（ 3000 米），金一哩選拔（香港組）等等。相信大部分讀者都猜不到吳師傅第一個馬拉松是什麼？因為小編連聽都未聽過。答案就是石崗馬拉松。「當年要圍住軍營跑 4 個圈，終點喺軍營入面嘅運動場，但跑完最後一圈，要返入去運動場，咁啱有架軍車擋住了入口，我仲被人老點，嗰個人可能諗住我無咁快跑完，指示我向前繼續跑，終於最後跑多了 2K ，初馬完成時間是 3 小時 03 分。從今以後，我每逢比賽前都會睇清楚地圖，避免犯同樣嘅錯誤。」

長跑兩年之後，吳師傅發現原來會友早晚各操一課，於是他返工之前和返工之後練跑，他身為懲教署教練，朝早要返 06:45 ，所以他 04:45 便要起床，放工是 14:00，他一除掉制服便穿上跑衫跑褲去練習。「除咗耐力，還要練速度和體能，試過參加體育導師班，情況更甚，簡直可以用個「慘」字來形容！早上五點起身後跑山兩小時，上堂還要做體能，放學再跑多兩小時，由於出汗過多，成個人散晒，一看有關筆記，五秒後即瞓著。」生活離不開跑步，幸得賢內助體諒，「太太之前都有跑步，成績唔錯㗎！ 10K 走 40 分；半馬都1 小時 29 分。太太也要返工，時間有限，明白不能兩人同時外出練習，體諒之餘還專注照顧家庭。讓我無後顧之憂，十分感謝她！」「因為操練編排得十分緊湊，為咗爭取時間回老家探望家人，試過由上環孭住背囊跑去北角。」

吳師傅表示許多科研證實羣體練習可以提升運動表現。「人係會自我保護，跑得辛苦梗係想抖下，容易鬆懈下來。如果有人一齊練，可以跟人擋風，又或是互相交流技巧和外國知識。你鬥我、我鬥你，鬥志越鬥越高昂！」一班志同道合的朋友，一同追求長跑成績。通常犀利的跑手會有犀利跑友一齊練，當年陪吳師傅練習的除了必達 4 條 A 外，還有陳楚佳、馮宏德等。「我哋當年可說「身逢亂世」，跑進 2 小時 30 分以內嘅最少 20 個，但由於人數太多，唔容易出名。」吳師傅還提及「積極性疲勞」，不少世界級運動員均經歷過，「由於心急突破，長期抑壓疲勞，休息同埋營養方面稍有差池便中招，所以要留意呢個問題。」

於 90 年代期間，吳師傅代表香港征戰四方，不斷挑戰馬拉松成績。1990 年夏天，吳師傅和必達 4 條 A 中之李嘉綸，同被㨂選代表香港參加北京亞運。為了參加亞運，他特別請假，希望盡量抽時間多練習。猶記得在炎夏三十多度高溫下，他倆一早一晚在科硏運動室內用跑步機練跑。「啪！啪！啪！啪！」跑時發出巨大的聲響，可以說「噪到拆天！」當日在北京比賽，「後段十分大風，整個過程像「乾曬」，曬到甩皮。」「能夠代表香一港參加亞運，我覺得係一種榮譽！當時嘅成績，我和嘉綸都係 2 小時 28 分。排第九和第十名。」

1990年北京亞運 左一吳輝揚 右一李嘉倫

吳師傅早於 1984 年代表香港前往檳城參加馬拉松比賽，9 月的東南亞天氣濕熱，完成時間是 2 小時 46 分鐘。他心想：「咁熱都跑到呢個成績！」於是對自己的信心又增加了。由 1989 年至 1992 年，吳師傅在訓練上採用一套策略，就是在以下四方面著手，「我相信在次數、里數、強度和速度上增加，會明顯提升水準。」他認為 1992 港深馬拉松的成績可以引證他的方法成功。港深馬拉松是由香港粉嶺起步至深圳完結。這個馬拉松是為紀念 1997 年香港回歸中國而舉辦的。由於當年仍未通關，他是本地第一批北上跑馬的運動員，入境事務處收起所有運動員護照，讓他們手持一個牌仔過關，護照放在深圳關口，是一個特殊的安排。這條賽道除了深圳橋上有小斜坡，幾乎是全平路，頭 10 公里他走了 32 分鐘，半馬用了 1 小時 11 分，當知道有機會破自己的最佳時間，到 30 公里便發力衝，創下 2 小時 24 分的香港華人紀錄，不單是香港第一，也是全場第八。此紀錄封塵 26 年，至 2018 年才被徐志堅打破。

1992 年港深馬拉松頒獎典禮 1992 年 港深馬拉松 香港選手名次，左起 吳輝揚，植浩星，張文豪，李嘉倫，馮宏德

1994 年，吳師傅被部門調駐離島，不得已暫停了比賽和訓練。至 2000 年重出江湖，他已經 40 歲，發現「桃花依舊，人面全非」，所有同輩已經沒有在跑了。他自忖：「自己年紀大了，可以撐到個會（必達）幾耐呢 ?」馮宏德也留意到青黃不接的現象，邀請他一齊搞靑訓，可謂一拍即合。

2004 年吳輝揚與愛徒於NIKE 10公里賽合影 左起：李宏俊，徐弘泰，劉廣文 梁婉芬奪得 2006 年渣馬本地女子組冠軍

他的高足包括梁婉芬（Ada）、李宏俊（Macro）、徐弘泰（Winter）和蔡雯斯（Mandy）等等，他們均曾代表香港參加國際賽事。至 2014 年，他放下教鞭，停教必達跑班。吳師傅於 2015 年 4 月 24 日榮休，同日創立吳師傅長跑大本營，繼續為本地體壇培育出不少精英跑手。

縱橫香港跑壇 40 載的吳師傅，退休後最大的心願是推動香港的長跑。早於 1988 年，他便代表香港前往日本比賽，「適逢奧運年選拔，在記者招待會上，日本國寶「瀨古利彥」好像明星一樣被記者追訪，訪問完畢甚至要搵路走。」可見日本傳媒如何重視跑手。「日本人從小學開始培育運動員，精英中學生跑手 10 公里可以走到 28 分尾。日本人重視每個運動項目，每個月會出版刊物列出各項比賽的得奬者，又會列出全國十大，提升運動員的鬥心和興趣。因為當你看到別人做到呢個成績，自然會激起你嘅鬥心去追求進步。他們甚至會訂門檻把運動員分成精英、專業同埋一般跑手。」

吳師傅當年練完好攰，仍需返工的時候都想過當全職運動員，希望衝做更佳的成績，「同輩嘅女將如伍麗珠、羅曼兒就要半職上班，畀自己有更多練習和休息時間。不過，計完數發覺無可能，男人要養家，唯有苦苦撐住。」「業餘和全職運動員嘅訓練始終有很大分別，好似川內優輝，2018 年波士頓馬拉松獲得巨額奬金後，就可以轉做全職運動員。」

「始終運動要趁年青去搏，所以希望香港可以有一個較完善嘅制度，讓全職運動員可以無後顧之憂，全心全意投入訓練，爭取最理想成績。也希望社會各界更重視和關注運動界，令運動員有更多贊助或其他資助。」

「要有好成績，自然要投放更多時間練習，吸收不同嘅練習方法，睇下邊啲適合自己。任何方法都有可能得。聽過美國有一選手，淨練跑步機都可以 2 小時 16 分完成馬拉松。我心諗『部機被你踩爛喇』！」

「作為過來人，並且參考過世界馬拉松高手嘅戰績，要在馬拉松取得佳績，先要打好速度底，頂尖高手都喺 1500 米、5000 米、10000 米主項獲奬，才轉去跑馬拉松。」

吳師傅希望香港跑壇的年青跑手可以不斷突破，代表香港往世界各地參賽，奪取殊榮。

文 : Fiona Chiu
圖 : 受訪者提供
編輯 : 艾頓
美術 : La Pau