山友近日傳來維基百科上一條名為「綠蛋島」的條目，內文如下：「綠蛋島（英語：Green Egg Island），又稱爛排，是香港的一個島嶼，地區行政上屬於西貢區清水灣，位於清水灣郊野公園外海域。」

唔睇由自可、一睇把幾火，簡直荒天下之大謬！翻查典籍，不論係70年代的《長風野外之友遊踪彙刊》、90年代的《香港奇景探勝遊》、00年代的《西貢海嶼美》及《香港海岸洞穴圖鑑》，地圖均標示該處島礁名為「爛排」或「牛仔排」，「綠蛋島」呢個名根本從來無出現過。

關於呢兩個名，有人話主島係「爛排」、副島係「牛仔排」；亦有人認為「爛排」同「牛仔排」都係該處島礁的統稱。麻煩各位打卡人士同 KOL 留意返，「綠蛋島」不過係近年大家去多左影相而老作出來的名而已。你睇開的「香港遠足路線」App 不過係人人都改得的地圖黎，絕對唔代表正確地名。

每一個地名都有背後的獨特文化同意義，唔係任由我哋去胡亂纂改。大家改下別名叫佢綠蛋島本身無咩所謂，但如果唔了解埋真實地名，其實又同我地笑人用匪語有咩分別呢？一眾標榜推廣行山文化的專頁同 KOL，如果連你地都宣揚錯誤資訊，久而久之其實同幫手抹煞歷史有咩唔同？

大家都話自己很鍾意香港，但真係愛呢個地方的話，就應該追本溯源，虛心學習下先係呀。

▼ IG：instagram.com/hkhiker