（2011年9至12月）

呢班師兄弟（圖左至右：呀競、歷蘇、宏俊、子威、聰），從來都唔鬧人，又唔講粗口，淨係講鼓勵嘅說話：

加油！

做得好！

Keep住！

頂埋佢！

唔好放棄！

就快到終點！

⋯⋯

原來鼓勵嘅說話可以有咁多，每次聽到就好有動力跑落去。或者跑步真正嘅魅力唔止係跑，而係帶你跑嗰班人。

鑽一里之後，我開始習慣一星期一賽嘅節奏：匡智跑樓梯，PACER來回跑，各大路賽及部門邀請賽........佢地實力差唔多，唔同賽程有唔同表現。我暫時低一截，但進步緊，追緊上黎。雖然好多時團體賽中計分計唔到我，但就成為最可靠嘅候補。

作為一個新手，有幾件經常做嘅事：

1.成日上網睇比賽嘅隊際組合同獎項。

2.每次都會好重視選手包入面有咩禮物。

3.拎晒隊友唔要啲比賽Tee同毛巾仔。

4.跑完爭住同獎盃影相。

5.仲會每場比賽之後寫比賽紀錄。

6.宏俊仲用折扣卡帶我買左人生第一對石墨底跑鞋。

我由9月第一次做10k測試38分鐘，兩個月內跑到36:20。

長跑隊領隊粦Sir宣布：「今年渣打馬拉松10公里紀律部隊盃，部門會派10位精英落場，衛冕前輩創下嘅10年連勝紀錄！」之後走埋黎搭膊頭同我講「聰仔，通常跑到37分就有資格入選，你已經係跑隊嘅主力，今年靠你啦！」

食飯嘅時候，子吳形容「師兄弟，係呢幾年啦，係我地嘅黃金時代，乾杯」

岩岩先進入跑步嘅世界，基礎都未打好，越野跑果邊嘅Mark哥，扒完龍舟，路過時比左塊號碼布我「喂，聰仔，過兩日有場樂善盃，有塊號碼布多左，你去試下，去學下野」

於是我就拎左人地塊號碼布去學下野，點知有意想不到嘅體驗⋯⋯

———————————

現時視角：

我形容果陣係新手村磨練嘅日子，一個新角色，擁有無限可能，跑兩跑就升級換裝備，又可以組隊落場比賽，最重要係有一班隊友，為共同目標拼搏同苦練，係一段青澀嘅回憶

———————————

人物介紹：

呀競 - 潘競雄，同期出班師，一齊守九龍區，一齊跑大帽山，一齊入PTI，擅長800米至10公里，後期轉戰10公里至半馬

歷蘇 - 擅長800米至1500米，後期淡出一段時間照顧家庭，再於最近復出

宏俊 - 李宏俊，同期PTI，前10公里青年組紀錄保持者，擅長10公里，後期轉戰全馬

子威 - 吳子威，同期PTI，擅長800米至10公里，後期轉玩龍舟及斯巴達挑戰賽

粦Sir - 鍾德粦，我細細個就跟佢跑步