【黃浩聰跑步回憶錄】第一篇 - 加入消防長跑隊

Wong Ho Chung 黃浩聰
發表於2020/07/07
2,579次點閱
0人收藏
加入收藏

我相信運動可以改變一個人,我係一個好例子。希望透過分享自己嘅跑步故事,鼓勵人踏出第一步嘗試,會有意想不到的收穫

【#跑步回憶錄 - 第一篇 - 加入消防長跑隊】


其實我細個好窮,十四五歲就出黎兼職做野,主要做清拆同裝修,好想快啲出黎做野搵錢養家。當讀左半年中六 (預科) 嘅時候,收到消防處取錄,就決定退學。

2007 年夏,我當時十九歲,經過半年嘅操班生活,畢業成為一位消防員。

一出班就被兩個老總捉左入消防長跑隊。但當時我根本唔鍾意跑步,只係為咗襯托下老細而出席,諗住求其跑下,影張相就閃人。

點知第一課訓練得兩個人,老總揸車接我收工,想閃都閃唔到,老總仲對住我地話「九龍區 20 年未贏過,今年有潛質嘅後生仔出班係九龍區,終於有希望啦。」我聽到都已經滴汗,我諗住表現得差啲,等佢唔使咁大期望,下次唔好再搵我。

訓練開始,由鳳園跑上九龍坑山斜路五轉,個師兄一黎就衝上斜,我心諗「頂你,使唔使跑咁快,想 hea 跑都唔得,為咗唔輸太多都要死跟」

呢個師兄叫「阿競」,原來係同期出班,派咗去荔枝角,佢就係消防學校 PFA 板上 4800 米跑到 16:04,我哋嗰屆跑得最快嘅學仔,而當時我嘅成績係 17:24。可能我好細個搬水泥上落唐樓嘅關係,係斜路嘅表現唔差好遠。

跑到上山頂,老總話落斜驚我哋傷腳,要我哋保留體力集中練上斜,佢車我哋落返山腳,重複練五次。搞到佢架車臭賓賓

但係咁現實嘅社會中,尤其是階級觀念咁重嘅紀律部隊,我開始感覺到有一啲人情味,原來唔講工作講跑步,大家之間嘅距離可以拉近啲啲。

—————————

#現時視角:
由於係咁嘅環境下長大,我以前份人比較現實,亦都比較自我。尤其是啱啱入職,面對好大嘅工作壓力,邊有時間追求興趣,某程度上我都係因為人事同現實嘅考慮先試下跑步。但基於呢個出發點,唔算得上鍾意跑步。


19 歲的黃浩聰剛入班  ( 黃浩聰提供 )