The North Face 喺 2020年 ?畀人嘅感覺係 ??乜有出過新鞋咩 ? 又或者係 ...... ??好似2018之後愈黎愈差喎 ! ...... 鞋釘又易磨蝕、鞋面又易爛、鞋踭又易扁、鞋底又跣。三個字講哂「好一般?」。點解我會知？因為我哋上年都著過哂 : Trinity、Corvara、Ampezzo?
其實 TNF 2020 出咗兩對新嘅跑山鞋 : Ultra Endurance XF、Ultra Swift。自己四月頭喺 TNF 舖頭試著對 Endurance XF，第一個感覺係呢個鞋底「不得了」，當時即刻除出嚟望下，因為我以為對鞋係同 Vibram 合作?。摸一摸塊底，同 Megagrip 有得砌?，所以即刻買嚟試下。
 試鞋 |
 開箱 |
呢對鞋官方話最適合 : 1) Technical 路；2) 需要 Cushioning 嘅運動員；3) 需要鞋頭 / 身保護嘅運動員。而我由 4 月 18 日至今日著咗接近 300 公里，主要走嘅路段都係比較技術性，有狗牙嶺、虎吼石河、青山、九逕山 等等唔同嘅碎石路段。我嘅感覺又如何呢？
攝於狗牙嶺
重量
官方數字為 320g ( 以男裝 US 9.5 計)，單從重量上睇的確唔係走長途嘅選擇，自已亦覺得鞋身偏重，
走長途會比較吃力，有少少似著住 Scott Kinebalu Enduro 咁?。不過又咁講，ASICS 又夠重啦 Xavier 未又係攞 UTMB 冠軍?
鞋底⭐️
鞋底正正係呢對鞋嘅賣點，同樣係亮點。雖然佢係用自家設計嘅物料，但係試過乾嘅碎沙碎石地同埋濕嘅石面，完全無些少覺得跣嘅感覺，而且因為物料比較厚，落腳嘅時候踩落大舊少少嘅碎石都唔會覺得痛，呢一點對於應付外國嘅地形好適合。
因為物料比較厚，落腳嘅時候踩落大舊少少嘅碎石都唔會覺得痛
吸震️
雖然中底用咗 Ampezzo 嘅 XtraFoam，理論上著上腳係會覺得好軟，但係可能塊鞋底物料比較硬，導致著上腳感受唔到應有嘅軟熟同緩衝，不過我會話 Cushion 唔係好硬好硬，至少唔會好似某啲牌子咁你摸落去都覺得硬，但又唔會去到著上腳覺得好彈好軟。
前掌空間
呢對鞋嘅前掌位置屬於闊掌，比較啱一啲著開闊掌牌子嘅人。
鞋頭好實淨，唔怕踢到石
鞋底高低差
呢樣野就好睇個人跑法，唔係愈高 drop 愈好，Ultra Endurance XF 係 6mm drop，前掌厚 19mm，鞋跟厚 25mm。個人覺得走中長距離 4-6mm drop 會比較舒適。
鞋面/鞋邊
布料嘅部位相比以前 Endurance 少左好多，成個鞋面都好似膠做咁?，好硬淨。我試過好多次踢到大石都完全無感覺。但呢個特點亦都係一把雙刃劍，膠嘅物料令到成對鞋重咗，至於有人問：「會唔會好易甩膠？」我就未好肯定答到呢一點?始終都只係着咗一段短嘅時間
鞋釘
釘嘅厚度正常 唔會太淺亦唔算大釘，一開始以為只係適合走沙石地，但係可能因為釘嘅形狀係長條形
令接觸面積增加，加上物料特別，所以走濕石都應付得到。
價錢
官方原價 $1190。撇除有唔同渠道會拎到折扣，我覺得呢個價位，Um...唔貴。你話對比坊間有啲牌子
著兩著塊 Megagrip 已經冇咗一半?（明嘅就明）。呢對鞋嘅情況同以前 Scott Kinabalu Enduro 一模一樣我會覺得係抵著。
預計壽命
無論一對鞋嘅設計幾出色都好，如果壽命短的話都唔值得買（我覺得?）。呢對鞋，我個人估計可以大約走到 700 公里，磨蝕情程度我覺得係屬於低，始終鞋底物料夠硬身。直至而家，我對鞋都未有明顯磨蝕痕跡。至於性價比。。。我覺得以宜家山鞋嘅質素佢算中上水平。
同上一代比較
補充多一點，其實感覺上呢對鞋係前年 Ultra Endurance 嘅改良版。Ultra Endurance 都曾經掀起過熱潮。賣點係硬正走長途正有 Megagrip，唯一俾人批評嘅就係個鞋面好容易爛，而呢對Ultra Endurance XF 正正將呢一點改善，鞋底就將 Megagrip 轉左自家物料。我覺得鞋底呢方面今次幾出色，重量上兩者都係差唔多：Ultra Endurance ( 313g ) vs Ultra Endurance XF(320g) 。腳感亦都相似。
結論
曾經問過聰 Sir 對呢對鞋嘅睇法，同我大致諗法相似：
- 假若你需要一對絕對防滑，鞋底耐磨，鞋面耐用，鞋邊鞋頭保護性高
- 假若你追求腳感多於 Cushioning
- 假若你係闊掌
- 假如你會玩啲 Tecnical 嘅長途賽，例如 UTMB TDG.....
Ultra Endurance XF 絕對係一對好鞋?
但係⚠️
如果你想搵對鞋係：Runnable 輕身、Cushioning 高柔軟性高、走快路或者石屎路居多，呢對鞋就唔太適合你?
對我黎講，我幾欣賞呢對鞋，坦白講唔太適合一般香港石屎路況。除非你好似我咁特登買來走一啲崎嶇路段，但絕對適合外國技術性路段嘅鞋，自 Ultra Endurance 之後，終於有一對替代品。我會入定一兩對下年玩外國比賽著?
