【筆記會客室】匯聚點滴 湧泉相報大自然 - 小水滴召集人 Rita

艾頓
發表於2020/06/03
2,295次點閱
0人收藏
加入收藏


自從農曆新年以來,因為疫情群肆虐,香港熱門郊遊地點突然之間多了很多人,小編在山上都經常見不少新手,最經典有一幕,有次跟朋友行狗牙嶺,竟然有人在閻王壁前問路「點樣去南天門?」。在一些高難度的路線尚且也有行友毫無準備的,可以想像在一些郊遊熱門地點真是「乜嘢人都有」。從各大媒體均有郊外垃圾為患的報導,可以估計到不少郊遊人士毫無愛護環境的意識。

如果你在郊遊時看到垃圾,你會有何反應?視若無睹?搖頭嘆息?幫忙拾起?小編最新認識了一位山友 翟里得 Rita,她得知郊外垃圾為患,毅然組織了一個小隊伍,定期舉行清徑活動,帶領義工到郊外清垃圾。

每次出動都要準備很多物資


為何會組織清徑活動?

Rita 有個信念「生命除了家庭、事業、關係等,仲有貢獻社區,其實都係生活的一部分」,所以一直都有參加不同的義工活動,「今年年頭喺日本旅行嘅時候,有次見到好多新聞都講山上面突然多咗好多垃圾,見到一張又一張佈滿垃圾嘅照片簡直不敢相信,其中有一張塔門嘅相,唔只垃圾又多又包得唔好,竟然有牛喺垃圾堆中搵嘢食,見到真係好心痛。」因此,令 Rita 有跟隊上山執垃圾的念頭。「我返到香港,同 Partner 食飯,佢突然叫我自己組隊上山執垃圾。咦......!我就覺得好神奇,因為呢個想法我未同任何人分享過,唔通係個天要我去做呢件事?」


「之後傻更更同朋友食飯講開,想問下大家意見,發現佢哋都好支持,其中一個朋友,佢未行過山,得閒多數去行商場嘆冷氣嘆下午茶,但佢竟然叫我預埋佢,仲幫手一同組織義工隊,嗰種感覺真係好開心,覺得件事好有意義同價值。」


小水滴成員每次都是超認真地清徑


為何叫「小水滴」( DRIP )?

就這樣「小水滴清徑小組」誕生了。為何叫「小水滴」?其實當中的意義很大「意思是每個人的力量雖然很小,但只要集合起來、都可以係源源不絕嘅水源。水滴雖小但都不忘滋養大地,其實同樣每個香港人都可以為社區、為我哋嘅家出一分力。」Rita 再補充「不因力少而不為嘛!」

小水滴核心成員,各有分工 :David, Jason, Rita, Bela, Tracy, Kenny ( 左至右)


壯大小水滴

有了核心成員,便開始組織活動。當然首先是要身體力行,每次活動前,核心成員先會選定路線,然後一同去試路,預備所需物資,再去召集一班志同道合的義工「我哋也會分享比身邊的朋友知道,其實係想講比佢地知:喂我做緊清徑喎,啱嘅一齊嚟吖!」

近來,雖然有限聚令,令他們清徑活動組織上有不少困難,不過每次活動,各成員也分成多個小組,以符合政府限聚令的規定。成立了短短數月,便已有三百多人次出席過他們的活動。

每次清徑活動吸引不同義工來參加,有一家大小,有年青男女。



郊野垃圾大開眼界

他們執拾過的垃圾種類繁多,最常見的有各類飲品膠樽、膠袋、包裝紙、汽水罐。特別一點有紅酒樽、瑜珈墊、喺沙灘執過電池。「完全想唔通點樣喺山上飲紅酒,咁重都肯帶上山,飲完點解唔帶走個樽呢?」

義工在城門水塘的野餐區的草叢之中,拾得一整袋包得很好的垃圾,他們表示,掉垃圾的人明顯不想給人看見,才會掉入草叢之中。既然知道掉垃圾是不對,但依然這樣做,很難理解他們的心態。


Rita 見過最深刻的垃圾

「有次我地去清沙灘,喺沿海岸線上我發現了好多啡色一堆堆的嘢,一隻夾夾埋去就一堆烏蠅飛起來,原來嗰啲係魚嘅屍體,佢地被『鬼網』( 棄置在海中的漁網 ) 纏到,游唔到出嚟,連網帶魚沖上岸邊活活曬死,成個合成畫面喺我腦中浮現,明明魚喺海係最安全,點解都好似危機四伏?」

Rita 認為最離譜的垃圾是煙頭「煙頭本身對山嚟講係一個好大嘅敵人,星星之火可以燎原,唔能夠睇少一支煙頭的威力,足以燒起整個山頭。」


活動結束,義工 Jessica 分享當日經歷,她主力執煙頭,共有 100 個,即是有 5 包煙之多。


郊遊人士最大謬誤 - 食物殘渣

相信不少人覺得棄置食物殘渣都只是讓其回歸大自然「我哋喺上山見到好多橙皮、香蕉皮、雞蛋殼等食物殘渣,不少郊遊人士也誤以為這些殘渣會自然分解」「佢哋以為掉喺山上無傷大雅甚至可成為肥料,但其實食物殘渣都需要經過很長嘅發酵過程先可以變成肥料,否則短時間都會繼續留喺個郊野,唔會有任何變化。」

每次都收獲豐富


最想向郊遊人士說的是

1)自己垃圾自己帶走 - 帶得上山就有辦法帶走,唔想掉咪唔好帶上山。如果人人都覺得自己掉完垃圾喺山會有人幫手執,就大錯特錯!
2)其實大自然消化唔到垃圾,垃圾係唔會自己消失,你掉嗰一下好隨意,只係有人喺背後幫你負代價。「代價係咩?一係有清潔工、義工幫你執;二係垃圾會同大自然共存幾千甚至幾萬年,垃圾係唔會自己消失的」



文 / 攝影:艾頓
平面 : La Pau