【UTMB】三日快閃歐遊三國

發表於2019/09/05
4,231次點閱
1人收藏
加入收藏

人生幾何,總有一些事一些夢想想去完成。

人生也苦短,要好好善用自己所擁有的時間,還有假期。。。

就係咁,促成左今次的UTMB CCC之旅,一段用左唔駛廿四小時,用雙腳走過意大利,瑞士,及法國的旅程。

一貫作風,小學雞超長文慎入。


賽事背景:

UTMB Ultra Trail du Mont Blanc,是越野跑手的聖殿,是一項世界級的賽事。UTMB是一個系列的賽事,全都是圍繞著白朗峰山脈(Mont Blanc)跑,每個賽事各有特色。同名的UTMB 168公里固然是聖殿中的聖殿,考驗極長途的速耐力,TDS 就以technical 著稱,PTL就簡直係懷疑人生的超級極之長途自生自滅之旅。而我所參加的CCC Courmayeur-Champex-Chamonix 就係一百公里,一開波就要急上大山的賽事,以及超級緊迫的cut off time。從不同角度看,每個賽事都各有其最難最甘之處。

不過呢,呢個係環白朗峰的比賽,係唔駛及無得上白朗峰。要上就科水自己坐纜車上啦。

今年的UTMB 以漫畫公仔做主題


緊湊日程:

由於只能請三日假期,好在又咁啱用里數換來機票,咁就湊成下列的日程表

12/2018 入飛抽籤

1/2019 中籤

2/2019 加入TPH訓練班,艱苦訓練六個月

 28/8/2019 深夜上機,著晒compression gear 上腳,多飲水,去洗手間時就順便伸展一下,盡量訓多一點,落機的狀態倒保持得唔差,至少對腳無水腫,肌力值良好!

重裝Compression坐長途機有助血液循環,落機唔怕水腫唔怕攰


29/8/2019

清晨經倫敦轉機日內瓦,再坐預約好了的Mountain Drop Off Shuttle 到Chamonix

 Chamonix


11:30去落車,此時酒店未夠鐘check in ,放低行李諗住去拎BIB,點知就係Expo俾同學捉住去shopping !屎波架生多,就係要不斷買!

EXPO, 不過得幾間啱睇


歐洲人搞Expo 無日本咁多綽頭,但UTMB EXPO 算不錯,有不少event 限定產品外,仲有抽獎活動,我都抽中左個Hoka水樽及Buff頸巾!

排隊拎bib,Gear Check 一切順利!由於時間趕迫,在歐時每分鐘每小時都要善用!所以先前係屋企已將比賽袋pack 好,放在手提行李(唔怕寄失),一落機落車即刻就可以gear check。

係體育館拎bib,氣氛良好,認識各地跑手,也樂見區旗高高掛起


食完個晏,再shopping,就返去拎房,順便整理下比賽物資(食物/gel 放左係寄艙),訓一陣,就去晚飯,返酒店浸個熱水浴,拉拉筋,九點就訓覺。

Chamonix 充滿熾熱的UTMB氣氛

Road to Victory! 勝利的拱門,我一定會來到!

來多個近的!

臨睡前,欣賞下白朗峰


30/8/2019

0300 醒左去開大,再返上床碌極都訓唔著

0500 碌到鬧鐘響,起身gear up。食左一個杯麵一包脫水粥,出發

Are you ready? 自戀狂

大會俾多塊牌有名有區旗等你容易知前面係乜人,可以同佢傾計。好多外國人問候(真心)我們

0615 坐大會巴士。賽事九點開始,巴士會由法國Chamonix經白朗山隧道直出意大利的Courmayeur ,40分鐘左右,最遲架巴士7:15開出。要唔要早去,見仁見智。

巴士上盡是跑手

白朗山隧道,貫穿白朗山,連接意法兩國,攝於意大利往C1途中

0700 抵達Courmayeur,先到體育館暖暖身,食埋賽前補給品。就行落個town,寄存行李,放低幾兩就上線預備。

Courmayeur

Courmayeur

0900 賽事原訂按成績排名分三槍起步,我呢d慢腳,號碼布5字行頭放在第三槍區域。唔知搞乜,無啦啦大會將分隔二三區的分隔線移除左。在九點發左第一槍後,二三區的人都一同整裝待發,0915就全體出發。(但據在場支援朋友說,有9:30的槍,不過大家都跑光了)

起步前


跟住的23小時23分如何遊走意瑞法三國就可以係個表睇得到啦:

位置

距離/上落

排名

實際需時 (路程+埋站休息)

24小時

目標需時

Cut Off/

出CP時間

Courmayeur

(起點)

 

0:00

0:00

 

C1 Bertone

14km/1448m+/712m-

1228

3:01+0:10=3:11

3:56

 

C2 Bonatti

7.4km/294m+/248m-

1335

1:15+0:06=1:21

1:29

 

C3 Arnouvaz

5.2km/137m+/358m-

1341

0:50+0:11=1:01

1:01

16:30/

14:39

Grand Col Ferret

4.6mg/746m+/17m-

1297

1:23

1:44

 

C4 La Fouly 9.5km/80m+/1004m-

1302

1:33+0:13=1:46

1:41

20:15/

17:58

C5 Champex-Lac

14.1km/592m+/711m-

1259

2:31+0:28=2:59

2:55

23:15 /

20:57

La Giete

11.4km/962m+/557m-

1140

2:46+0:04=2:50

3:02

 

C6 Trient

4.9km/90m+/672m-

1124

0:58+0:25=1:23

0:53

4:00/

1:13

Les Tseppes

3.4km/670m+/37m-

1049

1:10

1:38

 

C7 Vallorcine

7.2km/167m+/811m-

1061

1:20+0:20=1:40

1:21

7:15/

4:19

C8 La Flegere

10.6km/916m+/354m-

1010

3:40

3:09

10:45/

07:38

F Chamonix

7.4km/54m+/877m-

974

1:00

1:08

12:00 / 08:40

總數

102km/6500m+ (用錶度+ Strava correction)

 

23:23

24:00

 

(賽事摘要陣間再講)


30/8/2019

0840 一路感覺良好,自信飽滿,肌力還夠我係最後幾百米5分披跑,保持著和後面外國選手的距離,目的是確保前面的拍照通道暢通無阻,終於係0840,用23:23的成績通過最後的拱門!沒有任何哭的衝動,反而是感到很踏實,用腳走過每一座山,將訓練所得發揮出來,按自己的能力切切實實的完成了一百公里,振臂高呼!

係終點和新認識香港朋友仔寒喧幾句,之後最重要梗係拎件Finisher Vest,有同學仔接我影相(啫叔叔!你真係好好好好!)

要衝線啦

返到來啦

謝謝TPH,謝謝啫叔叔

最重要,拎呢件光榮戰衣

和啫叔叔道別。本來諗住係終點隔離間CAFE 食個早餐,但自己都覺得自己臭。所以都係慢慢行返酒店,浸個熱水浴,但還未拉得切筋就呼呼大睡了。

1200 訓左唔夠兩小時,一百公里的辛酸便從大脾走出來也痛得足以喚醒我。唯有起身洗衫,執下野。這時出面的歡呼聲也暫時告一段落。大家都悠閒下等UTMB FINISHER下午返來。

1300 對於只來快閃的我唔想放過遊玩的機會,晾好衫後,出去鋸個靚扒,食埋雪糕,四圍逛逛。還再考慮是否上Brevent 去欣賞下Mont Blanc時,收到通知原來聰sir 會係1640左右衝線,這時候更由花生同學們不斷更新,知道佢排名係咁上10 9 8 7 6 ,和其他選手相差三幾分鐘!極緊張!

賽後補充蛋白質

係Chamonix 點可以唔食雪糕!十球我食唔起,兩球已好飽

1600 我地大隊等聰SIR返終點前,見佢同其他選手係離開CP時間都鬥到難分難解。本來諗住出賽道拍片迎接佢返來,都怕阻住佢地鬥到最後一秒。點知,現實係,他們展現了高尚的情操及體育精神,聰sir和另一厄瓜多爾選手最後攜手一同以第六名衝線!締造港人最佳時間最高排名,亞洲第一(太興奮了!睇埋佢篇後記,更佩服阿sir)。

整個城巿的人聚在賽道旁,夾道歡迎及見證頭幾名選手回終點一刻

一班志同道合的一同接放學,仲要係UTMB 第六名喎!(Photo credit: TPH 同學)

1930 成班同學,教練,新知舊友一同食飯慶賀,順便一齊食住花生睇UTMB的進程,這時得知La Fouly 落雹,天氣唔多好,這時很感恩上天給了我一個好天氣的CCC賽事!

2200執完野想拉筋時,又呼呼大睡了


31/8/2019

0730 一早起身執行李然後去終點食住早餐接放學。

0830 點知,收到英航通知當日原訂日內瓦去倫敦班飛機取消左!佢好快offer我遲一天走。計過條數唔化算,那那臨訂中東三寶同一時間係日內瓦出發返香港!不過咁搞一搞心血少左,錢又洗左,個肚又餓左。

0930 終於settle 一切,出去食早餐,亦遇上幾位高手同學仔以under 40小時返到來!非常戥佢地高興。

繼續接放學。有人一家大細來迎接Hero Baba

1050 準時上mountain drop off shuttle 去日內瓦機場。旅程亦於此作結。(我都好想接埋其他在UTMB作賽的同學!係離開日內瓦的航班上,,睇住通訊群組的不斷更新,見證他們非常厲害,最後三位同學壓住條死線手牽手完成,太堅啦!不在現場太可惜了)

如是者,在3日5小時的時間,我進出了歐洲,用腳橫跨意瑞法完成CCC,夠閃未~

感想:

抽中獎的一刻,心諗,死啦,我有無這個能力。然後在籌劃行程中,意識到超快閃乜氣候時差都未適應得切時,就知到事前準備有多重要。

呢半年來,好多謝太太的體諒,給予我非常多的空間及支持,令我好放心去準備及專心練習,因為這半年真心非常刻苦!同時太太亦不斷俾正能量我給我士氣及信心。小魔法「哈!哈!哈!」所以呢,錫晒你!

以往預備不同賽事時操山總是自信滿滿,對香港的山賽,要練幾多有多少成績自己有得計。但對住CCC,自知力有不逮,唯有跟班受訓。這半年來,跟住聰sir TPH的訓練班的系統式訓練,頂硬上都只食左七八成左右,而且訓練班的同學全是我心目中的各路外星人。期間無論點比力,係山上追不上就是追不上,實力明顯有落差,對自信心不多不少有壓力。在賽前作戰會議更知曉班上一些同學以往完成CCC的時間及經驗,便更認清楚現實的殘酷及自己的不足。但與此同時,訓練班上學了太多太多以前自己不曉的技術,補足了能力的不足。班上的教練及同學們亦好樂意分享山上山下的大小事情,放毒是必然,但點善用各式各樣的裝備補給才是重點!這些都大添了完成目標的勝算。

我自己的目標很簡單,和我夾過隊的人都知我有明盤暗盤,明盤係26.5小時完成,唔會俾人掃尾。暗盤個人覺得開得好進取,24小時!要記住喎,一落機就要落場啦喎!(參考下,我2019 逆走21:30,ITRA 419,用ITRA估算要24:33)但說實在,體重瘦了十磅,上山好力左自己是知的。

最後,多得聰sir為我們每個人的賽前分析部署,為我們訂下時間表及策略。我被給予的能力值係23小時,目標23-24小時,但被指派的任務係,CP5前用22小時課表,然後再收慢。今勻跟足指示(其實係隨體力而行,後半無力就是無力),成功達標!任務完成!希望無令聰sir 你失望啦~

I am proud of myself!

I am proud to be a TPH-mate!

聰sir 傑sir 徐sir 小秘書 Waiyi 助教 一眾社長一眾同學,多謝大家!

完賽日的下午,接完聰sir 。我和太太分享了那刻振奮的感覺。太太就問我,其實你呢刻有無覺得要報埋玩埋UTMB先完滿呢。坦白講,不了,立此為記。

High數據總結:

2019年CCC

大會計算距離99.2KM 6156M攀升 (6.89EP/HR)

用錶及Strava 計就102KM 6544M攀升 (7.2EP/HR)

落場人數2132人

完賽1578人

DNF 554人

完成率74%

我的時間為23:23,以第974/2132名完成(45.7%),一路上總共追趕過367人!

香港78人參賽,43人完賽,完成率55%。我亦有幸排11!簡直係完成不可能的任務!

排名數值慢慢下跌,即係排名不斷升呀


YEAH! 睇完?未有耐

山長水遠飛過去再行足一日一夜,仲有半年時間的策劃,邊止咁少。如果你未來有興趣參與其中,就可以睇下跟住的心得分享及實用部分,否則,係度大家應該足夠感受到晒我的喜悦!多謝收睇!(不過下面多圖喎)


路況:

約100公里,六千米爬升的CCC,和香港的一百公里賽大不同!!好的係有崇山峻嶺,風光如畫,無乜樓梯(除左最後大佬),唔好的係,超大上大落,一開波先直上千四,之後仲要係最尾三座大山等於直上大帽山三次!

大會上落圖

整體路況方面,石屎路只有少量連接小鎮及CP。其餘有相當大部分的天然山徑和麥八四方山一段好似。落山路其實唔太難,但如落左雨就會好似雞公嶺落山咁。另外最後一座大山Tete aux Vents 就有少少似麥三上雞公咁的大樓梯,不過你係要一口氣上3個雞公山。當然還有一些石河的路段。總體來說,是好跑的,technical 路段有,但不太多,都不難處理。

反而要留意一下最頭段由起點至入山路的一段。賽事二千五百人,但山路只係one man width,可想而知頭段會幾咁塞人。要搶著先機,頭段就要俾力,不過那是全上斜的馬路。久經練習的上斜跑原來就係為左呢刻。平時賽長途總講求留前鬧後,但在這頭段cut off 緊迫的情況下,呢條rules 就用不上了。簡單說,一開波就要跑!亦因為咁,往後就唔駛太過趕cut off,keep 住有一至兩小時buffer。

頭段係巿內要係咁跑,搶著先機。所以平時練斜好重要

辛苦過後,還有更辛苦的直上千幾米的大山一號,N個heartbreaking Zigzag!不過呢,呢個時刻可以抖一抖,正如前述,開始塞車,一條人龍塞到上山頂成千米咁高。特別是頭段,有些跑完斜就跑爆會塞住變做樽頸,然後有些就唔跟山路踏坡而上,俾人係咁噓的又進一步加劇塞人情況。做個有品的跑手,跟住行,借機回一回氣。上多一點陣條龍會鬆左點,呢個時候第一樣野係要深呼吸去看下周圍的風景,第一座山望過Mont Blanc山脈的景色絕對是震撼的(要睇家下好睇晒佢,慢慢你會開始無心機睇,最差情況係,你甚至會咒罵座山,點解要咁巍峨要咁高);第二樣野呢,最緊要搵啱pacer跟住 ,慢過你的就俾力過佢,追唔到就不要太勉強,到轉彎位就俾過(不過最好都係頂住,因為你唔係讓一個,而係要讓N個跟係你後面的列隊)。同樣的事情,會重覆又重覆咁係之後四座山發生。

入左山路,塞車更見嚴重(不要錯重點)

上大山的Z路 (放大張相,再放大d ,原來好多人,即係話,條路好長上好高)

前面全是人

開始條龍鬆左,鬼咩,上千四呀

風境太靚

回眸一看

就到頂咁喎(天真!)

都話仲有段路,所以要熟讀賽道數字,及用一隻值得信賴的GPS 高度計手錶

到頂,要釋懷一下

望住個雪山落山去

大會攝影正呀

過左呢度,體力開始跌架啦,要專心路面情況就夠了,總之就大上大落啦。係最尾見到條雞公山一般的樓梯,我總覺得那是港人恩物,試問有幾多外國選手有我們那麼多上落樓梯的經驗。

C1 C2之間的7km路段,可跑性極高,風景指數亦極高

離開C3 ,真係不捨的風景。同時個陽光開始將我烹煮中

上Grand Col Ferret,路段夠闊,夠力就過人

快到Ferret,之後要有20公里超長落山路,適合為C4 La Fouly 及C5 Champex-Lac 的CUT OFF 奮鬥賺Time Buffer

上呀!

回望Arnouvaz,係咪痴架,我究竟上左幾多

Grand Col Ferret

廿公里落山路,向 La Fouly 出發

La Fouly ,重回文明的地方,係人類呀

Champex-Lac 的晚霞


天氣

歐洲山區天氣變幻莫測,即使如夏天,仍可以在高山落雹落雪,也可以橫風橫雨超凍,令到天然山徑變得泥濘滿路跣到hi hi(試諗下連落二十公里泥pat路的滋味。2017年我玩OCC時全水戰玩50km,已覺超凍超慘超辛苦及想死),更可以來個熱浪,你咪以為食熱浪薯片咁爽,熱死你都得。

今年好好彩,天氣好到一個點!全程藍天及少少白雲,日間整體稍熱,但不時有清風送爽,一路睇住日落,咸旦黃就無,但卻有壯麗晚霞。

2017賽OCC時,因為天氣差及勁大霧,根本將一切景緻遮蔽,而原來我係瑞士 Champex-Lac 經過個湖也不知道。這事一直糾結於心。今次諗住天氣好的話應該有得睇,點知,計下條數,去到時日落左啦喎。我係比賽期間同自己講,行快兩步,那怕只是日霞的尾巴我也想一看Champex-Lac 個湖!去到Champex-Lac 時已開始天暗,入埋個大CP搞得來,又真係勉強夠我影張相喎!呢個係今趟賽事的一大滿足位,解了我兩年來的糾結。

Champex-Lac 的完夢湖(個名我作的)

說時遲那時快,卻望到遙遠的天空有雲對雲閃電,不時傳出連串的大雷聲音,心諗,唔係夜晚落雨咁黑仔呀,經驗話我知條路濕左勁跣,仲要加埋晚上情況,不妙。(同時,係Chamonix的UTMB剛於六時起埗,之前仲落左雨...)幸好,天佑CCC,整個晚上是繁星蓋頂,但遠方就繼續呯呤嗙?。

山區即使不下雨,但一入黑,溫度跌好多,一陣風吹埋成身汗的衫,會感覺超冷。好在手多係mandatory gear 外帶多件base layer,連埋件mid layer ,係Champex-Lac 湖邊換上一直賽到尾。朋友問,你唔熱咩?我寧可出汗補多點水都好過凍親。另外值得一提係打最後大佬前,離開C7 Vallorcine 的一段河邊路,可能太近河的關係,超凍!但離開河邊後就回復正常,唔駛太擔心,要擔心都係驚上個3座雞公山的最後大佬好過。不過,樓梯,我愛!

C7後上Tete aux Vents正值日出前,好眼訓,但要跟緊前方走上去,好高,好大級的樓梯

過完最後大佬,仲有一段山腰路要走,呢段路已可望見Chamonix,風景超美,我走過時剛好日出時分,天空由黑轉藍,遠處東方漸露曙光,映照在南針峰的白雪頂蓋,變成金頂一般,美不勝收!

最後大佬回望,日出東方,燃點希望

說時遲那時快,有隻健碩的羚羊突然係我面前跳過,雄糾糾在看著呢班傻仔選手

日出

打落雪山上變左金頂。咪顧向上望,下面已是終點Chamonix

再來

最後 CP La Flegere,那時離24小時仲有一個半鐘,準備走的時候,山上伯伯話一定要幫我影相,伯伯影得好靚喎!好在影左,等大家知我瘦左

Hearthbreaking Stairs 屹立於進入Chamonix 的聖殿前,爆粗,是少不免

終點呀

大會,賽事安排,住宿

UTMB 的系列賽事以Chamonix為中心,所有賽事均以Chamonix 為終點。這裏的氣氛固然最熾熱。個鎮不大,我選了住Expo 附近的酒店(Alpina),以令快閃之旅可慳盡一分一秒。近Expo等於近終點,近坐大會巴士,近拎drop bag,近拎Bib。仲可以安坐酒店幫返終點的選手打氣。(當然人多住Bnb 煮飯仔係好過癮,provided有人買有人煮,同埋有人洗~)

酒店外貌

酒店望住Expo 及下面的賽道

拎bib時要 gear check ,千祈咪博大霧。所有mandatory gear 都係救命用品,缺一不可。你可以輕量化(即係富貴化),但切不可慳。大會義工不是省油的燈,認真睇,尤其係防水褸,電筒及可用後備電等,必睇咁滯!

Gear Check List,random 幾項,認真檢查架。記住叫佢蓋章,否則去唔到下一關,我就係咁又要排過隊

大會去起點巴士講左唔再提。不過中途CP都有巴士的,你唔剪帶唔啱用但唔代表你尊貴的supporter唔要知~

CP方面,伙食一般般啦,未必合香港人口味。我主要只取餅乾吃,其他的生果,沙樂美腸,芝士等一概唔掂,大會供應的power bar , energy drink唔掂。阿sirs及師兄們的忠告,唔食唔熟悉的食物,否則腸胃一冧,上肚下瀉就只有剪帶。但代價係,自己要孭好多補給。孰重孰輕,自行定斷。不過值得一提係CP5 有長通粉及蕃茄肉醬,真心好食唔怕太酸無得頂!飲品方面礦泉水(有樽裝及來自水喉的,而樽裝的其實也是水喉斟出來),有氣水,可樂等,後半段會有熱飲,上山前整杯熱茶,感覺良好!

同埋要留意CP好多人,好messy,又要搵位又要拎野食斟水食補給品,所以記住計數時要預埋補給時間,我有兩個CP停左差不多半小時。所以如果你有邊位親朋好友願意坐十幾個鐘飛機過去歐洲唔shopping 睇museum,而係半夜三更坐巴士追星,係CP食住風,痴痴的等你來見那十數分鐘,任憑你差遣,仲要食你脾氣的話,請你好好多謝佢報答佢!

CP 真係好messy,但有時卻因此識到朋友

仲有時會遇上稀客為你打氣 (La Fouly)

記住呢個係 La Giete的豬欄 不 是 C P! 唔好計錯 cutoff

補給品

有氣有力,食得到仲要吸收得到先可以增加完賽成功率!power bar power gel 幾十種牌子味道,食到啱食到愉快先至好用!

但廿幾個鐘得bar 及gel會好寡,配合埋適當的小零食如朱古力或鹽糖,仲有近排各超巿都有賣的日本啫喱,有隻係加鹽的!

不過都係未夠,行到五十公里,好有需要一個正餐,要有米落肚。係香港,由支援帶的牛肉飯是首選。歐洲無,但可幸有日本的脫水飯脫水飯團!唔太重唔太bulky!最尾CP時,個人都無乜力,包括個胃,所以帶定包蛋白粉沖水飲,即刻有力!

另外適量生化武器如BCAA等,至少令心裏踏實感到肌肉耗損減少,肌肉又真係無咁易疲倦。

生化戰。帶定去,再按天氣情況執袋,無帶晒上山嘅

訓練

半年內跟住TPH的訓練,內容不詳談,有需要都係跟班操。簡單說,系統化,目標化,大課配合合理休息。更重要識一班新知舊友,一同上山作戰,先係訓練的皇道。試想下係終點有班人會等住你返來,是幾幸福滿足的事!(老實講,唔想再去回想那些大帽輪迴N次,兩日五吃之類的地獄苦況)

大帽無限食,諗起都反胃

寫到呢度,航班快抵達香港國際機場,香港人加油!明天繼續上班去!


延伸閱讀

【賽後感言】UTMB 2019 很榮幸登上這個頒獎台