【跑・台灣】台灣靚景馬拉松

Keith Chan
發表於2019/06/30
1,517次點閱
0人收藏
加入收藏

(圖片來源:123RF)

相信唔少香港跑手都會想出去唔同地方跑吓,如果無乜頭緒但係又想出去跑轉順便去旅行,台灣其實係可以成為其中一個口袋名單。老實講台港兩地相隔唔遠,坐一個鐘頭四十分鐘左右嘅機程就到桃園機場,仲快過「天水圍-東涌」和「大尾督-赤柱」之類嘅「港式long d」車程,而且台灣特別之處唔單止「最美的風景是人」,因為淨係風景已經靚得驚人。

因為作為「寶島」嘅台灣有唔少特式馬拉松賽事,無論高海拔賽事定係田野特色馬拉松都一應俱全,筆者集結六個值得跑嘅靚景馬拉松比大家參考,如果想比賽嘅話可以約埋三五知己一齊組隊,比少少時間自己練個好體能去台灣旅遊同埋跑步。


高海拔賽事 - 合歡山馬拉松(44.5K)

合歡山馬拉松有台灣最美最壯麗的馬拉松賽嘅美譽,而且合歡山係唔少香港人都會特登坐車上去睇風景嘅熱門地點之一。當地海拔高達2,300~3,400公尺,係全臺最高嘅國家森林遊樂區,賽事整個路程由清境(海拔1968米)出發,一路經過翠峰、鳶峰、昆陽,抵達全台公路最高點武嶺(海拔3275米)。最後係合歡山松雪樓原途折返,號稱是全台最高路跑活動。

因為地勢比較高,低溫且風大等等因素,跑手需要準備比較多防寒衣物,以免因為環境因素而導致失溫。記得比賽前為自己做一個簡單嘅身體健康評估,以降低係賽事期間出現高山症等等嘅運動風險。

賽事網址:https://bit.ly/2XLXm7a


稻米故鄉 - 台灣米倉田中馬拉松作為香港人,日日起身都望住石屎森林,除咗係電視入面呈現之外,大家又有無親眼睇過綠油油嘅稻米田?由參賽者一致認定,係運動筆記評分高達4.7分(5分滿分)嘅田中馬拉松,唔單止景靚,人情味仲好夠,因為呢場賽事直頭將整個鎮都封街,賽道沿途兩邊都係由民眾加油加氣,覺得大會補給站太一般?民間自設嘅補給站相信能夠令到跑手身心滿足。

賽事網址:https://bit.ly/2M9WHro


高粱生產地 - 金門馬拉松

金門地理位置獨特,隔個海就係中國大陸,所以參賽者係比賽期間能夠右邊望山,左邊望向廈門海景。而且受到政治因素影響,比賽期間隨處可見濃厚嘅戰地風情,連中華民國陸軍特種部隊嘅海龍蛙兵都會一齊參賽,如果想有一隊體能特別好嘅pacer跑全馬,可能跟住的佢地步伐嘅話好快就可以完成賽事。

賽事特點一定係賽後嘅finisher package,嫌賽牌、毛巾呢啲禮物覺得太一般?金門馬拉松特有嘅finisher高粱可以同三五知己一齊係賽後慶祝。

賽事網址:https://bit.ly/300K581


全台唯一IAAF銀標籤賽事 - 萬金石馬拉松萬金石嘅名係來自「萬里、金山及石門區」三個地區為賽道所命名,全程都係以沿岸為路線,跑手可以一路跑一路欣賞北部海岸嘅迷人風景,路線途經萬里蟹、女王頭、金山溫泉以及石門風箏等等特色旅遊景點,除咗比賽之外仲可以順便「眼睛賞旅行」。

加上萬金石馬拉松係全台唯一有IAAF銀標認證嘅賽事,如果跑手認為有專業嘅認證先能夠放心去比賽,呢個賽事絕對能夠吸引大家去挑戰。

賽事網址:https://bit.ly/2KVf81N


靚景配合新鮮空氣 - 新北市烏來峽谷馬拉松賽想係香港比賽,唔好講空氣或者環境係點樣,搵到個全平嘅賽道已經覺得好幸褔,但烏來峽谷係台日熱門觀光勝地,因為環境優美之外,豐沛嘅活氧、負離子、芬多精「烏來空氣三寶」成為賽事嘅特色,為跑手給予一個潔淨嘅空氣環境完成賽事。想跑步出番身汗之餘仲希望潔淨一下肺部,烏來峽谷馬拉松賽可以成為大家留意嘅賽事。

烏來最出名梗係溫泉,如果跑完之後可以搵個地方浸番轉,比自己身體有時間好好放鬆。

(圖片來源:Running Holidays-旅跑新北

賽事網址:https://bit.ly/2YmZ0ZL


綿延的山形背景與峽谷 - 太魯閣峽谷馬拉松

天然美景並唔係邊度都有,但台灣太魯閣就係其中一個以自然峽谷所聞名,太魯閣峽谷馬拉松嘅賽道途經太魯閣大橋、砂卡礑隧道等等迷人景觀,足以令到鍾意睇自然景色嘅跑手都會慢落黎去欣賞。

賽事網址:https://bit.ly/2KSaNvR