富士山馬拉松，一隻我想跑好耐嘅馬拉松，以往因為地點距離兩大城市太遠（東京及大阪），所以每年都淨係睇住人好開心咁過去玩。由於今年一早已預計呢個比賽後嘅星期一有特別假期，所以點都要把握呢個千載難逢嘅機會，三月尾攞到大大批文後就即刻卜定酒店等四月報名。
如果打算參加富士山馬拉松嘅，最好一早透過訂酒店程式預留酒店。今次我喺未開始接受報名前訂定房，都已經所餘無幾。唔係嘅話，一係好貴、一係嗰朝由東京仆入去。富士山點都係一個出名景點，所以今次大部份時間會留喺富士山唔行東京啦。
多謝跑友殊師父提醒，要預早兩個禮拜訂埋巴士飛，唔係會好麻煩，果然訂位嗰日啲位真係幾緊張。
唔少朋友問，點解星期一會有假？因為學校之前有大壇嘢要做，所以星期一補假嚟回氣。星期三搞工作坊、星期四安排歷奇活動、星期五帶完隊去海洋公園夜晚再同 Apollo Sax 隊友夾埋歌，拖住攰到爆嘅身軀出發去東京。一心諗住機上可以瞓好啲，所以畀錢揀咗個窗口位，希望可以挨住窗瞓，點知個位係可以挨住窗但因為係緊急通道前一行，所以冇得挨後，失策！睇嚟第一日行程後將會嚴重透支。
24/11
半夜機，三個幾鐘就到咗羽田機場，可能要跑富士山嘅一早已經出發，同我同機嘅得一班必達嘅跑友。日本時間四點幾五點就到咗成田，搭單軌電車同 JR 出返新宿食個早餐先。
食完個早餐都仲有兩粒幾鐘淨，早知搭七點半車入啦，唔駛窊爛腳。
晨早溜溜，好在都仲有激安殿堂同 Starbucks 坐吓。
卒之夠鐘搭九點五十五分巴士入河口湖，可以認真瞓好啲。
真係夾都冇咁啱，湯sir原來又係同一班車。
兩個鐘左右就到咗河口湖，一切順利。早咗咁多，先去 Expo 附近行吓，夠鐘就快趣攞完嘢就上一上山睇吓可唔可以影到富士山。
正值紅葉尾聲，周圍嘅環境真係一絕，今日天氣咁好，希望聽日都天朗氣清啦！
趁未開始攞嘢，喺側邊啲小食車，買啲嘢食先。
呢串嘢得！煙靱好味！
一點正準時開始攞物資，日本人多數用郵寄或者星期日先去攞，所以 Expo 裡面多數係外國人，香港同台灣人居多，周圍都講緊廣東話。
排緊隊嘅時候唔多妥，得一條龍仲要郁都唔郁。條龍唔係 S 字型排，而係圍住個場打圈，龍尾仲要屈返入去圈中間！咁唔用腦嘅人流安排真係第一次見，又唔係第一次搞，仲要係日本喎！
更刮目相看嘅，係龜速處理資料核對工作，之前已經收到報到用嘅 QR code 同跑手編號，理應好快搞掂，但原來得一部 iPad 做嘢，仲要斷吓斷咁。卒之 Scan 完，原來係要攞個跑手編號去拎號碼布·······喂？個號碼唔係一早印咗喺通知書咩？
攞完號碼布去攞衫又係一絕，攞衫 Counter 前面打晒核對資料嘅蛇餅，仲要泊咗幾架車，真係幾唔用腦。好在我一早去攞嘢，聽人講排到夜晚都未攞到選手包。
Expo 得幾檔嘢，唔似大阪同東京咁有好多紀念品同衫，冇乜點行就去搭纜車上山。
見攞輪候飛度冇乜人，即管上去啦，等咗 40 分鐘左右就買到車飛上去，仲可以喺纜車站隔離影紅葉添。上次一家人嚟天氣唔好乜都睇唔到，今次應該睇到啦掛。點知就喺我等買車飛嘅時候，天氣變得密雲，又係睇唔到，唔係咁邪呀？
都高角度望吓條賽道咁啦！
嘅然冇嘢睇，早啲返落去食飯然後返酒店休息啦！
今次兩晚都住富士山渡假酒店（Fujisan Resort Hotel），距離起點大約兩公里路程都算幾僻，所以比較平，二人房大約 $800 一晚。喜出望外嘅事件發生啦，一邊行一邊睇到富士山約隱約現喺前面，原來酒店門口對正富士山，只要天一清，成個富士山一覽無遺。
今晚晚餐，飯團、富士蘋果同柿，草草了咗餐就去浴場浸一浸就瞓覺。
25/11
唔似大阪，周圍都有 24 小時吉野家之類可以做早餐，早餐都係一個飯團一隻蕉加罐黑啡就算，點知就係今次瀨嘢嘅伏筆。
唔少人都話富士山馬拉松寄存好慢要預早去，所以我好似搭飛機咁預早兩個鐘去。一出酒店好大霧呀，弊！
入到去寄存位置暢通無阻⋯⋯係冇人理，按指示搵到所屬帳篷將行李自行放入去就走得⋯⋯咁安全？即係返嚟要自己搵返件行李？之前都會有貴重物品寄存服務吖，今次直情係信心嘅考驗。
嗱嗱臨排隊去完廁所就上線，個場冇乜位做熱身拉筋，唔通真係當長課？不過好似家豪sir 話齋，沒有奇蹟只有累積，之前各種原因搞到得一課長課，預咗頂唔到 30K。
相比上年大阪，今次又唔係好凍咋喎，都未去到凍到震嘅情況，嚴格嚟講係好適合跑步添。
起步前大會安排法師頌經祈福，全場安靜默禱，雖然我係基督徒，但都會尊重其他人保持肅靜。不過清晰聽到一班人大聲講嘢，無錯係廣東話！我知大家一齊去外地跑會好興奮，但可唔可以唔好咁丟假呢？
隨著煙花嘅燃放，第七屆富士山馬拉松準時九點起步，初段人多慢慢跑，都急唔嚟，一直提住自己係長課模式，心跳唔去去到 Zone 5 就得啦！
兩公里過後，一條直路見到富士山，個天好清呀！靚呀！沿途見到 NSF 跑友，傾咗一段，可能佢覺得我打亂佢節奏叫我去先，我見都順喎咁唯有跑快少少，不過呢位師姐兩個禮拜前金沢初馬跑 401，都知佢遲早實過返我（後來真係 30K 畀佢過咗）。
跑咗 10K，得喎！58分仲要好似冇乜點用力，快過上年大阪添喎！
返入河口湖，紅葉富士山紅葉富士山，淨係睇景都抵呀！
唔駛兩個鐘 20K，但開始肚餓同攰，22K 上斜咪大鑊？
見到條斜路啦，唔少人開始行，我就碎步慢 Jog 上去（其實同行差唔多）。上到頂啦！以為 OK 啦，點知右腳舊患嚟料，兩隻腳大脾位輪住抽甚至一齊抽。入到西湖啲景又冇咁靚（都好靚），辛苦好多！
捱到 27K 個肚餓到打鼓，正想隊包 Gel 頂住，點知有個大站，大部分跑手都入站補給，有小飯團有熱湯粉，因為太肚餓食咗兩個飯團加兩碗湯粉，仲未有飽肚感覺，仲攞多個好好味嘅紅豆大福，咁就出事啦！食嗰時冇嘢，入咗胃之後個大福發漲撐著個胃，好在一路平路，但就慢咗好多。
跑完西湖落返斜，卒之可以爽返啲。
返落河口湖需然係平路一條，但雙腿梗晒，想快都快唔到，心裡面淨係計住唔慢過幾多就可以 sub 5，所以每一公里都覺得賺咗，心理上返而舒服啲。
多謝沿途攝影師，喺臨尾就冧時畀咗最大嘅動力。
衝線啦！4:50，以前嚟講係唔錯嘅成績，但話晒都上咗年幾堂，天氣仲要咁好，呢個成績真係唔敢見人。
由童軍仔掛上特色奬牌，五個奬牌夾埋可以砌個富士山出嚟，唔記得搵其他人一齊砌嚟影相，可惜呀！
跑完之後最擔心係乜？行李呀！原來仲有好多人未返，喺行李堆中搵到自己個行李，好在安好無缺，拎行李時完全冇人理，只係見兩個姐姐仔抽樣核對號數。
拎到行李就安心好多，去印完賽証書，呢樣真係抵讚，上網入完編號，即時彈出幾張啱啱跑緊時影嘅相，揀啱相就可以攞個 QR code 去印完賽証書，大會網頁仲有每個參賽者嘅路線動畫，效率超高同好專業！
最後，又點少得人人都讚嘅完賽關東煮？雖然真係好飽，個大福都未落隔，但點都要食一碗啦。
搞完一輪，買咗兩個柿同富士山 Sake 慢慢散步返酒店，將到酒店時會場放出最後煙花，第七屆富士山馬拉松正式完結。
（罐 Highball 漏咗喺酒店雪櫃）
返酒店即刻去浴場浸個熱水浴，果然係對住富士山浸，正！
嚟嘅時候撞到湯 sir 一齊入河口湖，估唔到咁啱有個靚女舊生又一個人入嚟富士山玩，點都要食個靚飯啦，唔覺唔覺畢咗業八年啦！佢就越嚟越靚女，我就越嚟越老添！佢啱啱玩完富士急，第二日就諗住去玩滑翔傘，最衰趕住走，唔係真係去玩埋一份。
26/11
最後一日，起身買杯即磨咖啡再開個電視睇，明明唱緊一首匙羮同叉嘅愛情故事（餐刀係第三者），點知突然變成真人說故事，個造型仲鬼咁恐怖添呀撞鬼！
終於要走啦！望住呢個富士山真係好唔捨得。
食過最後一餐富士山做餸嘅早餐後，開始返東京啦，噚日 YC Lai 搭車話塞咗五個鐘。梗係啦！星期日仲要大賽過後梗塞啦！呢個就係點解以前一直唔敢報呢個比賽嘅原因。
搭富士急行返新宿，十幾個講廣東話嘅人一齊上車，跟住其中一個人大大聲話唔駛跟位坐，坐埋一齊就可以，如果人地冇乜所謂就唔緊要，當然梗係搞到其他人好麻煩，到頭來咪又係坐返自己個位！可唔可以唔好咁失禮？
最後，呢程只係用咗粒半鐘多啲就返到新宿，真係未瞓著就到站。
因為唔係好多時間淨，新宿最就近嘅樂器街係新大久保，需然唔係好多間啱我睇，但貴精不貴多，都有斬獲呀！
最後去上野轉京成線去機場，仲有啲時間，又點可以唔食返餐壽司呢？
小插曲，到機場時呢張車飛跌咗喺㗎車度出唔到閘，即刻衝返落㗎車度又搵唔到，正想落返車，架車又開出，好在係去 Terminal 1 唔係返上野，唔係就係咁先！反正落唔到車，就再搵吓，原來跌咗喺後兩行，唯有搭回頭車返去 Terminal 2，但咁樣搞一搞，就喺佢 Close counter 前十分鐘攞到張機票，呢個關閘比馬拉松嗰啲仲刺激，鍾意馬仔衝閘嘅朋友不妨試試。
再見啦！唔知幾時再有機會參加嘅富士山馬拉松！
延伸閱讀
