【茅薑湯】毅行民間自發補給站<茅坪薑茶>

Jeanne Wong
發表於2018/11/20
2,347次點閱
0人收藏
加入收藏

「我會叫自己做茅薑湯,因為茅坪薑茶個名好普通。」四哥說。

最近三年,自發在茅坪為毅行者設立大型補給站,在寒冷夜間送上暖胃薑茶,Facebook 樂山行專頁的版主,就是我今次的訪問對象 - 四哥。
(圖片來源 樂山行 專頁)


參與過毅行者賽事都會知道,到達 CP 4(驗查站4)前,在茅坪一個有涼亭的平地上,有著一個派發薑茶的地方。那個補給點,在官方的資料上並沒有列出,但卻人人皆知。事源因多年之前,一位熱愛山藝的老前輩黃山先生,自發到西貢茅坪,通宵達旦為毅行者及其支援小組免費提供薑茶。而且一做便是十多年風雨不改,凡是毅行者賽事,經過茅坪就定會經過黃山先生的薑茶檔,從此「茅坪薑茶」就成了毅行者賽事的另類 Check Point。


「好多年前我現毅行者時,第一次喺茅坪見到有薑茶派。我都覺得好驚訝!點解幾丁友可以喺道派到幾千人嘅薑茶?」 四哥本身是一名資深山友,跟黃山先生的認識,就在毅行者賽事。其後因黃山先生年紀老邁,無法再繼續薑茶派發的支援,茅坪薑茶亦一度停辦了幾年。「除左玩過毅行者嘅人,先會明白同做埋啲咁戇居嘅事。因為茅坪呢個地點,我可以形容為一個零資源嘅地方,無車到又無水,要做非常困難同辛苦。」但作為多年毅行者的參賽者,四哥因不忍茅坪薑茶從此消失,就毅然擔起此任。「我膽粗粗去聯絡黃老先生,問佢點做。得佢分享咗唔少經驗,喺三年前開始,我哋樂山行就開始喺茅坪派薑茶。」

(圖片來源 樂山行 專頁)


「其實因為地點偏遠,車唔能夠到達,同無水同其他資源,我哋係有考慮過轉到其他地點做。但按我多年毅行者嘅經驗,到達茅坪呢個地方大多數已經入黑,離基維爾大站仲有4.5公里。而晚上嘅馬鞍山大風大霧,仲多好時會落雨,喺呢個地方其實最有需要為大家驅寒同加油!」正因如此,四哥堅持在茅坪那個荒蕪之地,為毅行者及其支援隊伍,訪過一杯薑茶為大家打氣。「凡途經我哋帳篷,我都希望大家可以暫停落黎,飲杯薑茶,之後再上路。大家喺馬鞍山食咗成晚風,薑茶正好可以保暖又提神;而入面有糖又可以補充體力。希望可以支持大家到一個安全的地方(CP4 基維爾營)。」


「玩毅行者唔只係四個參賽者嘅事,其實 support team 都佔好大嘅功勞。毅行者原本唔係一個比賽,而係一個軍訓,就係要大家鬥智鬥力,連埋 support team,點樣大家一齊做,另四個人full team 完成。」四哥表示,毅行者要比的不是速度,而是團體合作。「點解毅行者唔係二個人,或三個人一隊? 因為四個人玩,要 full team 完成難度就會增加。豈呢個賽事中,有好朋友會豈賽事人反面,亦有人會因經歷咗呢 100K 之後成為忘年好友。」此番說話我感受至深,其實我曾兩年為朋友做毅行者的陪行,去年更親自參加。在途上看見有著說說笑笑的,也有著不停埋怨的,更有不少是獨自行動的。那100公里的山路,考驗的不只是體能,更是人心。


問到今年薑茶檔的預備,四哥娓娓道來:「按過去兩年既經驗,今年我決定要用泥薑(即老薑),足足五十四斤。我分兩晚洗,洗左成十個鐘。因為薑上面有好多泥,洗到屋企好似山洪暴發咁(笑)。」為著薑茶的供應不會中斷,而味道份量更一致,今年樂山行的一眾義工們都先分好薑/糖的比例,一包包分好,並因今年預期有雨及寒冷,預定更多的份量去應付需求。「我哋第一煲由下午五點鐘煲起,一直無間斷好順利地派到第二朝6點,基本上經過既都飲到。」廚藝了得的四哥更笑言今次薑茶的味道,會比家中煮的更好。足見四哥的一番心思,及對一眾毅行者及支援小隊的照顧。

(圖片來源 樂山行 專頁)


要做薑茶還需要水,而要做給幾千人飲用的薑茶,需要的更是大量的水。在前文中提及,茅坪是一個沒有供水的地方,那水從何來?「無架,我地係自己義工孭上去。今次大約用左 350 - 400公升水,我地義工一人一次孭10公升水上山,再來回上落山運水上去,一次來回大約要一個至個半鐘。」大家如果曾到茅坪嘗過薑茶,要知道一切得來不易,也要記得感恩。「每年我哋孭百幾 kgs 上山,又要孭番百幾kgs 落山。因為除左工具同剩餘物資,我哋更會將所有垃圾,包括毅行者留底嘅垃圾都會清走。做好事未必有人多謝,但你試下比人睇到有垃圾留底,第二日就好可能被人公審。我哋唔怕麻煩,只本著幫人唔計較嘅心,但都希望各位可以自行將隨身嘅垃圾帶走,唔好留喺山上。」

(圖片來源 樂山行 專頁)


問到可會一直繼續每年搞茅薑湯,四哥說暫時沒有放棄的想法,因為要找人接手著實不易。希望籍此呼籲有興趣幫忙成為義工的朋友,可以透過 Facebook 專頁《樂山行》聯絡四哥。


除了人手問題,另外就是離不開最現實的一環,金錢。「我哋樂山行年年搞派薑茶,都係免費義派,每年都係大家朋友夾下夾下,所以長期年年做都要考慮呢個問題。畢竟大家都係打工仔,唔係老闆大把錢。」問到四哥可會接受商業贊助,去減輕負擔,四哥說:「你可能比較年輕,唔清楚黃山先生有另一代號,人人叫佢『山友黃』,因為佢其實係一間賣行山裝備鋪頭嘅老闆。但佢派薑茶十幾年黎,都無將自己舖頭嘅名放出黎,只係年年單純咁嚟支持。其實今年都有人接觸我地,話贊助呢件事,不過好似黃老先生咁,我哋都堅持呢個係一個義派活動,所以拒絕咗。」


承受著不同壓力及困難,四哥及一眾樂山行義工最開心的,就是聽到大家的一句「多謝!」 、「好好飲 !」、「正呀!」、「醒晒!」


訪問完結之時,四哥千叮萬囑,說希望可以籍此多謝各位歷年來曾經參予義派薑茶活動的義工,感謝大家辛苦幫忙,因過程都不輕鬆,但希望大家都開開心心。就如四哥當年開設群組,命名為「樂山行」,意思就是「行山要開心」。此訊息我希望借四哥之言跟大家分享,並樂在山野之中。


伸延閱讀

【台灣跑者心得】香港毅行者100公里越野賽賽後快報

甚麼是毅行者?

致毅行者support team的一篇心酸長文