一切準備就緖, 終於等到出發啦!
長途機都好對我無乜影響，因為我鐘意坐窗口位會見倒好多平時見唔倒嘅景觀，一路睇住靚景啲時間就過得好快
由於要不停轉機, 行李運送出錯嘅風險相當大, 於是我將比賽嘅大部份物資都跟身帶埋上飛機; 不過CHECK IN 嗰陣就發現原來響加拿大轉機嗰兩個城市都要清關拎返晒啲行李再CHECK IN過 （好大工程呀！）響加拿大轉機雖然唔似美國咁要做簽證, 但係要之前響網上eta 先可以入倒境. Vancouver 嘅機場相當繁忙, 過關排晒長龍. 關員亦好嚴肅地問你問題。佢問我做乜要嚟加拿大, 我話只係 transit ; 佢然後問我 final destination 係邊度, 我回答去玻利維亞. 跟住佢再問去玻利維亞做什麼, 我直答: 去跑比賽啊! 佢跟住抬頭望一望我, 然後笑住點頭就比我過了~
06年膽粗粗一個失落嘅人走去尋找失落嘅天空之城，從此撻著左坐唔定成日週圍飛
由香港經 Vancouver 再轉機落到秘魯嘅利馬, 已經用左差唔多 43 個小時, 好多人都會覺得身心疲累, 但因為已經好接近玻國, 我反而係越嚟越雀躍同興奮. 利馬係去玻國 La Paz 必經嘅中轉站, 但係由利馬去La Paz 嘅航班時間一啲都唔「靚仔」; 最後我要響利馬機場等多5個鐘, 然後再搭去天空之城馬丘比丘嘅 gateway Cuzco 庫斯科, 落機辦出境手續後先再飛去 La Paz. 去到Cuzco, 又係另一番感受。 12年前人生第一次自己盲中中乜都唔識咁揹住個背囊去尋找呢個失落之城, 無穿無爛返嚟後壯大左個膽，從此就啟動我係都要四圍去嘅旅遊人生。會有南北極同呢次嘅玻利維亞競賽之行, 都真係多得 06 年呢次冒險之旅。
見倒呢一排安帝斯山脈嘅雪山，就知道已經接近La Paz 了
終於飛到去La Paz 了! 落機嗰陣我嘅心跳開始加速，除左因為緊張唔知入唔入倒境外，La Paz 機場 Elto International Airport 位於海拔 4050 米高, 係全世界最高嘅機場, 屬於高原地帶空氣變得稀薄, 行步路都需要吸多一口氣. 我行到去入境櫃台, 關員果然第一句就係: “you have no visa!” 於是我好有禮貌咁講話我係打算落地簽證, 然後拎晒 D 文件同埋嗰張申請書, 我仲特埋PRINT 埋比賽參賽者名單指指我自己個名: “I come to run a race”；跟住關員就已經問我：“Do you have Bolivian money?”嘩！我知道自己已經半隻腳踏入左玻璃維亞啦！我急忙咁去附近嘅找換店唱錢，然後依指示去到一個窗口交埋費用，跟住個關員再指向一個特定嘅櫃位，我響嗰度好順利就ｄｕｍ 左個印就過左關啦！好野！我終於成功嚟到玻璃維亞啦！
機場正正望住海拔6400多米高嘅雪山 Illimani，感覺好似平視個雪山咁，可想而知呢個機埸都有返咁上下高
一落地已經海拔4000幾米高都無高山反應，我覺得已經賺左了！但響比賽又會係另一回事（因為耗氧量會更多）。香港跑手參加高原地方嘅比賽就真係輸晒地利，所以今次行程我特登安排自己早一星期到達La Paz，除左預自己唔能夠順利入境要即刻飛落秘魯做簽證外，我都希望身體可以有多啲時間適應高地環境。頭兩日我都無特定行程都係諗住週圍行下。La Paz 整個地市都係依山而建，度度都係斜路，頭兩日真係行幾步路都會扯大氣腳重重，行一陣仲要抖一抖。不過我反而覺得係一個好好嘅鍛鍊環境更加不停行多啲，果然響第二日就已經開始唔太喘氣啦～
開始行去另一個頂，望返轉頭嗰陣係咁樣
好多國家代表隊響重要比賽之前都會特登上高地進行兩星期左右嘅高原訓練，目的係令身體自然制造多啲紅血球增強帶氧能力，返回平地比賽時能量多左發揮就會更佳。本著呢個原則我響有限嘅時間下我 join 左local tour上左去5400多米高嘅Chacaltaya; 其實之前都曾經參加過珠峰馬拉松，都試過上過去差唔多高度嘅Everest Base Camp, 所以都適應倒呢個高度，感覺唔太吃力。其實我都發現自己適應高原嘅能力不俗，上左去一陣已經可以jog下跳下，去到上第二個頂嗰陣都係得返我同個guide可以上到去咋～
途中見倒Lama 呀～
之後，我仲特登請左個Private mountain guide 帶我去攀爬一個響La Paz 相當出名嘅山 Huayan Potosi. 呢個山超過海拔6000米高，話就話合適初階者去攀爬。我地先搭車去到4700米高嘅base Camp，然後自己揹晒所有登頂所需要嘅工具行上去5100米多高嘅Refuge。其實呢段路只有2.5公里同埋只係攀升400米左右，我開始係自己揹個背囊順便當練下比賽負重；但原來負重向上行同響平路jog 又完全兩回事！我行左1 公里去到休息站已經索晒氣兼用左成個鐘！最後我要額外比小費個導遊幫我揹埋個背囊先可以慢慢行埋上去，真係慚愧！
剛剛好睇住個咸蛋黃升上嚟，曙光初現，處處呈現生機
雖云Huayna Potosi 係Beginner 程度都爬得，但我確實係一個不折不扣嘅beginner, 對攀山唔多經驗兼未試過上呢個高度，個guide 亦難得唔係騙子好坦白話比我聽係有排上……結果響第二日開始攻頂嗰陣，一程唔夠3km 嘅路，攀升差唔多900米，我總共用左5 個半鐘。寒風刺骨、缺氧無力、對腳好似紮左幾斤鉛咁重；我諗過無數次不如返轉頭反正我都已經上左過5400米，但我不停提自己，如果想個比賽發揮得好啲就要克服呢啲辛苦，於是我咬緊牙筋一步一步咁繼續行上去，最後，我終於登到Summit 了，亦趕得切見倒個旭日地徐徐升起。我到頂嗰一刻，真係激動到好想喊。總覺得，只要懷著信念，不輕言棄，目標、夢想，總有一日係能夠達到。
（遺憾地因為上面太凍部相機 function 唔倒手機張卡亦凍壞左，呢兩日大部份嘅相都無晒。好彩都拍倒小小片capture倒返部份畫面出嚟有返個紀錄）。
女子組大部份都響齊度，佢地全部嚟自意大利，最後面嗰位Chiara 仲好年輕得廿八歲，我地好快就熟落了
落山後我休息左一日，然後就係同大會會合嘅日子。各國嘅跑手陸續出現，大家都好熱情咁互相打招呼，參與呢個比賽嘅目的其實都係以earn 個 special life experience 為主，我地好快就熟落了。比賽起步嘅地方叫Salina, 由La Paz 搭車過去都要9個鐘頭。沿途都好荒涼，中間只停過一個較大嘅城市Oruru 做休息站，然後經過嘅都係一啲得幾間屋仔嘅小村落，Salina 已經算係較大嘅 town了。去到Salina 已經入黑，大會安排左入住酒店（其實似旅館）後就食晚飯，第二天再做 Gear check。嚟到Salina 真係好反璞歸真，無訊號、無Wifi ，開水喉沖涼開到最大啲水都係一滴滴咁滴落嚟，啲水亦時冷時熱。不過我都幾鐘意體驗呢啲原始風味，純真、簡單，無爭，給予人一種平靜嘅感覺，我地城市人早已遺失及遺忘了。
嚟到比賽前最後一日，就係Technical Day 要做好多Checking。我地嚟到玻國前要先交左心電圖同埋香港醫生幫我地寫嘅健康證明比大會，嚟到呢度後亦都要逐一見醫生做consultation，問下你玩過什麼比賽，最長玩過幾多、最近嗰次比賽係幾時等等，跟住就同你量升壓，check 心跳，仲要度埋你血液含氧量添。我嘅含氧量都唔錯，有84 喎，不過女子組嚟講法國嘅阿Anne 係最高，原來佢響玻國住左十幾年，仲經常響玻國爬山登頂，所以早已經適應左高原了。見完醫生後就係Gear Check, 佢有張Check list 逐樣同你核對你啲裝備，無問題先比BIB 你，檢查過程都相當的謹慎同認真。
Gear check 後晚飯前仲有個比賽前嘅Briefing, 我返到酒店再執返好個背囊，之後見仲有時間淨，於是就走左去廣場圍住個公園仔跑圈等自己適應下高原耗氧。平時我嘅馬速可以跑倒5’10至5’20左右，但係響嗰度，跑平路、無揹任何野都好，我最多都只係能跑倒7’30，而且已經係爆晒肺個心好似想跳出嚟咁嘅感覺。練習過後到大會Briefing 講解比賽要注意同留意嘅事項， 嗰陣我先睇得明嗰張之前派發左嘅比賽地圖，我當堂嚇左一大跳！原來除左跑42公里嗰日之外，其他日子全部都只係得一個Check Point!最短嘅check point 距離約有13公里，而最長嗰個有19公里之多（仲要係響第一日！我記得UTMB 最長嗰個cp 距離都只係16公里！）雖然check point 只係補水所有食物都係早已揹響背囊裡面，大會規定要帶夠裝倒兩 Lit水嘅container 下我裝滿晒水都應該夠跑到去下一個CP, 不過個背囊就會重好多加多左負重。高海拔尤其乾燥陽光亦特別猛烈耗水量會特別多，嗰陣我真係好好好擔心，究竟我能唔能夠應付得好呢？
呢度係中央廣場，我趁住仲有小小時間我就圍住響廣場中間嗰個花園仔跑左一個鐘，等自己適應多啲高原耗氧
延伸閱讀
