（圖片來源：123RF）
筆者上星期日一個人去跑山，途中碰到一個陌生跑友A，萍水相逢吹吓水本是平常事。跑友A講到四點鐘前定必要同老婆交人，因為不是可以時常出來跑山，所以要好好珍惜每分每秒，一定要用盡時限食盡今日quota。
原來跑友A老婆並非跑步一族，所以唔喜歡身邊人去玩（跑）而女人係屋企湊仔。因此跑友A每次出來跑之前必需要向老婆申請「行街紙」才能出發，而且要準時回家報到。
因為每次跑步都要老婆申請，跑友A話自己好少參加本地賽事，跑過的海外賽事更加係一隻手都數得晒。聽到筆者講到點帶住老婆同呀囡到外地跑的經驗，跑友A立即從目光中流露出羨慕的眼神。
跑友A的處境雖然有點極端，但類似嘅情況在筆者的朋友圈中都聽過不小，相差的只是程度上的不同。
一般單身人仕，出去外地跑步只要「通知」一下女朋友便成，如果女朋友也喜歡跑的話就更容易解決。
結婚後的大部分男仕，已經唔係通知咁簡單。從簽結婚証書一刻，老婆就手拿著一張有絕對否決權的皇牌，最慘就係不設上訴基制。情況就如電視機遙控器使用權一般不是在男仕手中。想去外面跑？可以申請，但不一定會被㧗準。
筆者多年前已經深明此理，還記得早兩年有人問：「跑海外跑馬拉松要帶乜嘢必需裝備？」當大部分人都討論穿甚麼衫褲鞋襪，帶甚麼補給食物之餘，筆者的一句回應即時KO全塲男仕：「最緊要係帶老婆去」。
有時朋友叫去外面跑吓，但自己又唔想去的話。「老婆唔放人」就是最佳的擋箭牌。這招簡直是萬試萬靈，應該係朋友圈中使用率最高的一個回應（不一定是藉口，可能是真正的原因）。
隨著子女成長，男人在家庭的地位可能進一步降低。一個唔覺意真係抽到一些熱門賽事，已經不是一條友話去就去咁簡單，要安排照顧小朋友之餘又要避開考試。現在的小學生又考試又測驗又默書，七除八扣後，可以去跑的日子已經不多。
如有四大長老又或有工人幫手又作別論。
想像一下，如果成功抽到一些大賽，又碰正小朋友考試，點同老婆講自己去跑而佢要係屋企陪太子讀書？單是這點已經是一個很好博奕課題。
就算唔係考試，如果想話同學校請幾日假去玩，一般學校都唔會批。如果話機票已訂就仲大件事，筆者試過同學校請一日假。結果係俾訓導主任哦咗一個鐘頭，機乎要立下毒誓下不為例才可以行出校務處。
折衷方案是申請一個三、四日快閃通行證，那怕目的地是老遠的歐美地區，真係飛過去跑完食餐飯便走。
就算真係排除萬難解決晒以上所有問題，一年可以快閃三兩次，咁又使唔使留啲假期陪老婆仔女？計吓計吓啲假期又好似唔夠洗？可以點算？
這個困局可能要等到仔大女大，又或者退休後先可以解決。
做男人不易，要做一個在家庭，工作與興趣之間取得平衡的小男人更加不易。
伸延閱讀
