香港主流跑手 廿四項獨特的思考方法

園丁
發表於2015/02/08
1,019次點閱
0人收藏
加入收藏
(圖片來源:園丁)

一.堅鍾意追求PB,但年年樂此不疲,跑一條好忍難做PB嘅渣馬賽道,唔覺得有需要改動。


二.堅重視計算時間,但對一個連半程計時都唔準確嘅渣馬,卻又覺得問題唔大。


三.對自己表現嘅要求高,對其他參加者嘅要求更高,但對渣馬嘅安排又冇乜要求,有得跑、有牌攞已收貨。


四.不過,佢哋對跑步環境嘅要求又極低,如同李鵬話齋,食飽飯就係人權,所以有得跑,就唔好批評咁多。


五.覺得快腳嘅參賽權比要步行嘅慢腳重要,但就唔問始作俑者的渣馬,點解唔做好分流或限制參加人數。


六.對報名費好敏感,加價就嘈到拆天,但即使條路逼到跑唔到,全馬同半馬撞晒車,補給只有生蕉,又唔會覺得貨不對辦。


七.將渣馬和田總等同整個香港跑界,認為香港跑友一定要支持渣馬,一定要推廣渣馬。


八.所以邊個批評渣馬,邊個就係唱衰渣馬,係跑界的人民公敵。


九.批評渣馬係無建設性,更會令公眾對反感渣馬,到時分分鐘連馬都無得跑!但就睇唔到,渣馬好多進步,其實係從批評而來。


十.每當有批評渣馬嘅聲音,佢地總愛引述一啲比渣馬更爛嘅比賽,特別是大陸、東南亞同第三世界嘅比賽,力證渣馬是如何地優越。


十一.每逢有跑友以專業角度批判渣馬,佢地總愛以「要一步一步來」、「已睇到渣馬有進步」、「唔可以吓吓在專業高地批評渣馬」,力證批評係不值一曬、小題大做。


十二.每逢有跑友以歐美日的例子批評渣馬,佢地總愛以「國情不同」、「政府不同」,所以渣馬已盡晒力啦,唔可以用外國標準看渣馬。


十三.因為十、十一和十二的關係,所以香港有渣馬已經到好難得了。


十四.以自我感覺行先,因為我覺得渣馬OK喎,所以其他人的批評就是以偏概全,對大會唔公道,對大會義工唔公道。


十五.住係一個號稱為亞洲國際都會的城市,但接受這個大都會嘅代表馬拉松,係一個水平遠遠落後其他國際都會嘅渣馬。


十六.羨慕有機會出國跑,特別係參加世界六大馬拉松的跑友,但講到要提升渣馬嘅質素,等大家唔駛出國都享受六大馬拉松嘅經驗時,佢哋又唔會點出聲撐。


十七.覺得未跑完就開始收水站、收公里指示牌好正常,因為大會要趕住解封道路,要體諒大會的難處。(如果地鐵提早開尾班車,搞到你差點趕唔到,咁你又會唔會體諒,司機要趕住收工呢?)


十八.習非成是。渣馬咁多年都係XXX啦,所以唔係問題。


十九.慢腳覺得唔受尊重係抵死,係唔認真訓練而應得嘅懲罰。想要得到尊重?下年訓練好啲,唔好再包尾。


二十.香港人最鍾意乜叉都批評和投訴,所以渣馬嘅安排永遠係有理由,批評渣馬的永遠係無理的,係冇睇諒大會嘅難處。


廿一.唔係好關心報名費去咗邊,只關心自己有冇PB。


廿二.批評慢腳、受傷腳唔夠訓練,唔夠認真嘅人,成績通常都唔係好見得光。真正嘅快腳係好謙虛,明白天外有天,自己冇資格批評其他人。


廿三.覺得跑步唔應該做政治表態,但就無視係香港搵邊個搞馬拉松,已經係好重要,更何況鳴槍嘅都係官員。


廿四.呀園丁,你仲有幾多篇渣馬文要寫呀?駛唔駛講到渣馬十惡不赦呀,馬拉松乜乜乜有無咁X重要呀?唔係人人好似你咁,覺得搞個馬拉松係咁X重要。你咁叻咪用你嘅標準搞個馬拉松囉,以上廿三項全屬冇野搵野黎講,讀呢篇文都嘥X我時間。