【大魚心得】TransLantau100 2018 後記

大哥
發表於2018/03/06
1,370次點閱
0人收藏
加入收藏


由12年到今年,原來已經玩咗六次大魚,包括第一次嘅50公里。條路基本上都冇咩新意,今年應該係最後一次,所以要寫返個後記記念下。同往年一樣,今年都缺少練習,所以計劃係行多個跑,希望返到梅窩有涼沖。今次仲有一個特別,就係全程唔食gel/bar,只係帶咗朱古力同鹹果仁。


呢個比賽最辛苦嘅一樣嘢應該係要夜晚起步。晏晝已經瞓咗一個鐘,唔知點解到起步時都仲好眼瞓。十點半先去到梅窩。同朋友影完相之後就要準備上線起步。


SP:同之前一樣 ,初時都係慢慢跑。今年好似特別潮濕,見到前面有啲人成身濕曬,不停滴汗。去到牛牯灣時,唔知點解前面突然間轉右,咁我又照跟啦,不過跑咗五分鐘後前隊又返轉頭,大聲嗌話行錯路!其實呢段路我都行過好多次,只係今年冇詳細睇地圖,唔敢肯定佢哋有冇改過路先跟去。到十塱時見到ctrun嘅Brian,我同佢講笑:喺呢度見到你咁你一定又係行錯路。佢面帶苦笑,心裏便可能xxx。


CP1(6.7K):到CP時fill水即走。可能前隊太多人行錯路,呢段上山勁塞車,要落到水塘先至開始鬆動番。開始行下跑下咁樣向CP2進發。


CP2(19K): CP2其實同CP1係同一地點,一樣係冇熱飲同食,半夜比賽CP無熱啡真係有啲麻煩。我之前帶嘅電解水已經飲晒,就係呢度開始用大會嘅電解水。食咗少少嘢就即刻上大牛湖,冇幾耐就去到南山。去完厠所之後,開始南大嶼郊遊徑。唔知點解中間冇晒標記。今次我醒目少少,行返上年嘅路,仲帶埋其他人一齊行。過咗一公里之後先見番標記。之後就行下跑下咁向CP3前進。不過去到C1112牌時突然想嘔,其實喺香港100都試過一次,嘔完就完全死亡。 好彩仲有1K就忍住典埋去CP3。


CP3(29.5K):喺度坐咗十分鐘又好似好啲,不過都係食唔到嘢。唔理啦直上鳳頂。上嗰陣時諗諗下,之前試路都唔會咁差。唯一唔同嘅就可能係啲電解水,咁就試下淨飲水睇下會唔會好啲。最麻煩嘅就係手軟腳軟,只可以慢慢上慢慢落。落落下後面有人叫我,原來係蘇菲,快過佢就一定係我太快。唔理啦一於快啲去CP休息下先,今次咁早出問題,開始諗會唔會DNF?


CP4(34.5K):唔飲啲電解水真係有幫助,坐咗15分鐘之後開始食到粥同飲到水。本來想再休息耐啲,不過越坐越凍,都係快啲走人。個胃啱啱好返少少,呢段落斜路唔夠膽跑。去到羌山,前面個師兄問可唔可以一齊行。我同另外一個人就一齊跟佢行。有人陪果然容易好多,傾下跑下好快就到CP5。不過可能落得快咗少少,個胃又開始作嘔。


CP5(44.5K):今次坐夠二十分鐘,可以食返少少嘢,不過仍然手軟腳軟,都係快步唔跑好啲。心裡面諗:都唔知過唔過到個大磡森。幾經辛苦過完分流頂深坑瀝之後,終於可以慢跑返。去到大澳士多買返支寶礦力同汽水補下,之後都係行返去。


CP6(57K):去到CP,知到自己唔會DNF,個人放鬆咗,即刻覺得好眼瞓。食咗兩碗麵+麵包+大咖啡,忍唔住再瞓多十分鐘,hea足三十分鐘先肯走。去深屈途中撞到Billy,就同佢拍住一路吹水。到咗深屈士多,仲一齊坐低食綠豆沙飲汽水。好彩喺度再hea一陣間,如果唔係之後嗰段就好辛苦。Billy要等朋友,咁我先走佢仲後數請我,Thanks。東梅古道呢段好熱,應該都有30度以上,唔敢跑只係快步。就嚟到救援徑路口前,見到有support喺度擺檔,居然唔怕被人舉報。上救援徑呢段就辛苦啦,太陽就喺頭殼頂。好彩舊年喺度爆咗,今次識得慢慢上。心裡面數著123456,停半秒,再數過。最後嗰條樓梯尾段就兩步一級,就咁畀我捱到彌勒山中轉站,之後果段金腰帶就容易好多了。


CP7(75K):到CP想試下新嘢,就要咗碗米粉,點知係硬嘅,又有藉口再坐耐啲啦。落石壁郊遊徑一段好快就過,不過環引水道嗰段就痛苦囉,行極都行唔完(其實只係四十分鐘左右)。又少標記,幾乎以為自己又行錯路。之後就係全程最辛苦嗰段上山石梯路,大東鳳凰行得多都已成習慣,呢段小行真係特別辛苦。快到CP時有個師姐問我係唔係火車站人,話我側面好似一個師兄,有咁嘅事?


CP8(87.5K):去到CP已經過六點,都要休息下先上大東。對腳好似冇咩事,又覺得肚餓,即係個胃冇事,開始諗緊終點啲芝士火腿。慢慢上其實唔係好辛苦,不過都要成個鐘先到頂,呢個時候已經好大霧。行行下旁邊草叢突然有人嗌行錯路,好彩電筒可以照得到,執番佢之後就拍住一齊行。都係嗰句,有人陪住傾下計時間好快過。其實大東山天黑大霧時唔夠標記真係有啲危險。


CP9(97.5K):大約八點四十分到最後一個CP,已經餓到手軟腳軟。本來唔想停低,不過唔食啲嘢又真係去唔到。真係要讚下呢度啲粉麵,全部已經準備好曬,一加水同味粉就可以食得。十分鐘內搞掂即走,又要上斜路。前面有個鬼妹超快,追咗一陣間就放棄。不過到望渡坳最後2K牌時又見返尾燈,一於推住佢上去。佢可能初時太快宜家開始無力,咁我就爬頭一口氣繼續跑過去。呢次到我跑得太快,入到村後望下個錶已經過廿二,突然間想嘔,不過冇嘢嘔出嚟。淨低嗰啲路只可以行返去,最後22:03完成。其實唔望隻錶會唔會唔洗嘔呢?最失望嘅就係體育館唔夠熱水,等咗廿幾個鐘都係等呢個目標…


今次過CP4之後都有啲唔正常:太少人啦。以前成日都無位坐,今次就隨便坐。相信頭隊好多人行錯路,又或者大濕熱所以DNF。其實錯標可大可小,唔通要玩到有人命損失先知玩出禍?


延伸閱讀

兼論今年賽事引發的港中矛盾暗湧

跑進北極圈 - 零下二十度的越野賽 

以HK100為賽季正式作結