【渣馬】渣馬有幾尊重跑手? 未跑完就上賽道掃地!

高達奔
發表於2015/01/31
1,005次點閱
0人收藏
加入收藏

渣馬,究竟有幾尊重參加者?唔該睇下呢兩幅圖:

clean

clean 2

(圖片來源:高達奔)

個清潔工唔單止係路邊握地,仲走埋入條賽道,係跑手同跑手之間掃,而呢個候仲有好多人跑緊。

以一個專業比賽的標準,莫講話條路仲有咁多跑手,就算仲有最後一個人跑,都唔應該有清潔工人,肆無忌憚入賽道掃地,呢樣嘢賽會一定要同清潔工講清楚。唔單止喺安全的角度(清潔工在賽道中間掃地,好容易造成危險),更加係尊重的問題。

比賽都未完就掃地,有無尊重仲努力跑緊的參加者?飯都未食完,人地就黎收咗你個碗,你覺得有無問題?有無顧及最後的跑友之感受?

渣馬粉聽唔落批評,高達奔連日向渣馬發炮,就係話畀大家知,批評全部有根有據,唔係無的放矢亂噏。

走入賽道掃地呢啲危險和唔尊重參加者的場面,根本唔應該係一個正常的比賽度出現。可惜渣馬每一個細節,由網頁無醫療資料、找人神共憤的秃鷹鳴槍、派生蕉、半程計錯時、未完就掃地、派無電解質的蒸餾水、受傷者攞個垃圾袋保暖都唔得,都證明呢個比賽,對每個參加者起碼的尊重和愛護都無。

如果你仍覺得渣馬做得好好呀,批評全部不值一晒,渣馬無必要改善。我只好祝福你,明年你地仲有蕉食、唔會只剩下蒸餾水喝、唔會有掃把叉住你隻腳、受傷後唔會連要個垃圾袋保暖,都冇。